Гэр бүлийн хүчирхийлэлтэй тэмцэх хуулийг олонх дэмжлээ

Twitter Print
2014 оны 06-р сар 13-нд 16:11 цагт
Мэдээний зураг,

УИХ-ын чуулганы өнөөдрийн нэгдсэн хуралдаараар Гэр бүлийн хүчирхийлэлтэй тэмцэх тухай хуулийг хэлэлцэх эсэх асуудлыг хэлэлцлээ. Гэр бүлийн хүчирхийлэлтэй тэмцэх тухай хууль 2004 онд батлагдаж, гэр бүлийн хүчирхийллийг хүний эрхийн зөрчилд тооцон, Гэр бүлийн хүчирхийлэлтэй тэмцэх, урьдчилан сэргийлэх үндэсний хөтөлбөрийг 2007 онд батлан хэрэгжүүлж байжээ. Засгийн газраас гэр бүлийн хүчирхийллийн хохирогчдод хамгаалах байр, зөвлөгөө өгөх утсаар үйлчлэх үйлчилгээг мэргэшсэн төрийн бус байгууллагаар гэрээний үндсэн дээр гүйцэтгүүлж, нэг цэгийн үйлчилгээний төвүүдийг байгуулан ажиллуулж байсан.

Гэвч дээрх арга хэмжээг хэрэгжүүлж байгаа хэрнээ манайд одоог хүртэл гэр бүлийн хүчирхийлэл буурахгүй, харин ч хүний амь нас хохирох, хүүхэд гэмтэж бэртэхэд илүү эрсдэлтэй нь ноцтой хэлбэрт шилжсэний илрэл гэлтэй. Үүний жишээнээс дурдвал цөөнгүй л тохиолдлууд байдаг. Өнгөрсөн жил л гэхэд Б.Алтанхүүд 48 цагийн турш зэрлэгээр зодуулан нас барсан Цэдэн-Иш бүсгүйн хэрэг одоо хүртэл эцэслэн шийдэгдээгүй явж байна. Хүчирхийлэл хийсэн хүн хуульд заасан ял оноох байтал манай хуулийн заалт дэндүү сул, бас арын хаалга ихтэй байх тул иймэрхүү хэргүүд замхраад өнгөрөх нь элбэг.

Ер нь гэр бүлийн гишүүдийн аюулгүй байдлыг хамгаалах асуудлыг хуульд орхигдуулаад байгааг анзаарах хэрэгтэйг онцолмоор байна.

Иймд гэр бүлийн хүчирхийлэлтэй тэмцэх эрх зүйн зохицуулалтыг хохирогчийн аюулгүй байдлыг нэн тэргүүнд хамгаалах, хүчирхийлэл дахин давтагдахаас урьдчилан сэргийлэх, салбар хоорондын хамтын ажиллагаанд тулгуурлах зарчимд нийцүүлэн хуулийн шинэчилсэн найруулгын төслийг боловсруулсан байна.

Түүнчлэн уг санал хураалтад хуралдаанд оролцсон гишүүдийн олонх тус хуулийн төслүүдийг дэмжиж, анхны хэлэлцүүлэгт шилжүүллээ.

Хэлэлцүүлгийн үеэр зарим гишүүд саналаа хэллээ.

УИХ-ын гишүүн Ж.Батзандан: Гэр бүлийн хүчирхийллийн хууль шинээр орж ирж байгааг дэмжиж байна. Энэ хуулийг батлан гаргаснаар  улсын төсвөөс ганц ч төгрөг нэмж гарахгүй гэсэн байх юм. Хууль гарснаар илүү их нарийн бодлого хэрэгжүүлж, илүү их зардал гаргах хэрэгтэй. Байгаа нөөц бололцоогоор энэ хууль бүрэн утгаараа хэрэгжих боломжгүй гэдгийн яамныхан санах хэрэгтэй.  Шат шатны хуулийн байгууллагын ачаалал нэмэгдэх учраас төсөв, мөнгөө зөв товлоорой

УИХ-ын гишүүн, хууль зүйн сайд  Х.Тэмүүжин: Гэр бүлийн хүчирхийлэлтэй холбоотой механизмыг зохицуулах ёстой. Эдийн засаг хүндрэлтэй байгаа ч орон тоо нэмэхгүйгээр албажуулан гэр бүлийн хүчирхийллийн эсрэг ажиллах ёстой. Гэр бүлийн хүчирхийлэлд өртөөд байгаа орон зайг тодорхойлох хэрэгтэй. Хүүхдээрээ дамжуулж хүчирхийлэлд өртөж байна. Манай амьдралын хэв маяг өөрчлөгдлөө. Хүүхэдтэй боловч салсан. Тиймээс хүүхдээрээ дамжаад ямар нэг байдлаар холбоотой байдаг. Тиймээс хамтран амьдарч байсан эмэгтэйгээ дарамталдаг. Тухайн эмэгтэй төдийгүй хүүхэд, эмэгтэйн аав ээж өртөж байна. Тиймээс гэр бүлийн хүчирхийллээс урьдчилан сэргийлэх зорилготой хууль

УИХ-ын гишүүн Г.Уянга: Нийт гэр бүлийн хэдэн хувьд хүчирхийлэл байгаа. Үүний судалгаа байна уу. Хүүхэд асран хамгаалах төвүүд байсан. Хүүхэд асран хамгаалах төвүүд хичнээн байна вэ? Хүчирхийлэгч этгээдүүдтэй зөвхөн хуулийн хэмжээнд тэмцэх үү. Урьдчилан сэргийлэх аргуудыг харахад нэг их доривтой зүйлүүд харагдахгүй байна.

УИХ-ын гишүүн Д.Лүндээжанцан: Нийгмийг түгшээсэн анхаарал татсан асуудал бол Гэр бүлийн хуулийн шинэчилсэн найруулга орж ирж байна. 2004 онд анх удаа Гэр бүлийн хүчирхийлэлтэй тэмцэх хуулийн төсөл болсон.Хууль гарснаар хэдэн газар хамгаалалтын байртай болж, төсөв мөнгийг хаанаас гаргах вэ.

Энэ хуулийг Эрүүл мэндийн яам дэмжихгүй гэсэн нь ямар шалтгаантай юм бэ” гэсэн асуултад Хууль зүйн сайд Х.Тэмүүжин “2004 онд батлагдсан хууль шинэ хандлага байсан. Гэр бүлийн хүчирхийлэлтэй холбоотой асуудал дээр юу тулгарч байгаа, ямар туршлага байна вэ гээд өнгөрсөн 10 жилийн хугацаанд сайн туршлага хуримтласаныг хуульд тусгасан байгаа.

Эрүүл мэндийн яам татгалзаж байгаад харамсч байгаа юм. Өөрсдийн салбарт байгаа мэдээллээ мэдэхгүй байгаад нь шүүмжлэлтэй хандсан” гэлээ.

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.