ХҮҮХДИЙГ АСРАН ХАМГААЛАХ
Хүүхдийг асран, хамгаалах гэдэгт юуг хамруулж ойлгох вэ? Бага насны хүүхдийг асарч, халамжлан, аливаа учирч болзошгүй эрсдэлээс сэргийлж, хамгаалах нь эцэг, эх, асран хамгаалагчдын маш чухал үүргийн нэг бөгөөд тэдний ирээдүйн сайн сайхны төлөө хийж бүтээж буй том гавьяа юм. Ирээдүйд нийгэм, хамт олны дунд идэвхтэй байр суурь эзэлж, эсэн мэнд, аз жаргалаар дүүрэн амьдрахын тулд хүүхэд бухэн хайр, халамжаар дуталгүй, аюул, ослоос ангид өсөн торних эрхтэй.
Эцэг эх гэж хэн бэ, асран хамгаалагч гэж хэнийг хэлэх вэ?
Хүүхэд эрүүл саруул өсч, торниход шаардлагатай хамгийн чухал хэрэгцээ нь эцэг, эхийн хайр энхрийлэл, халамж гэдэгтэй хэн ч маргахгүй бизээ. "Асран хамгаалагч" гэсэн ойлголтонд хүүхдийг эсэн мэнд амьдарч, өсч торниход нь шаардлагатай дэмжлэг үзүүлж буй бүх хүнийг хамруулдаг. Төрүүлсэн эцэг, эх нь хүүхдийг асран хамгаалах шууд үүргийг ихэвчлэн хүлээдэг боловч, эмээ өвөө, ах эгч, гэр бүлийн бусад гишүүд, хамт олны төлөөлөл ч энэхүү үүргийг гүйцэтгэнэ.
Аав ямар үүрэг гүйцэтгэх вэ?
Ихэнх гэр бүлд "хүүхдээ асрах ачааны" дийлэнхийг эмэгтэйчүүд үүрдэг ч гэлээ аавууд хүүхдийг асран хамгаалахад эхчүүдтэй адил үүрэг гүйцэтгэх шаардлагатай байдаг. Учир нь хүүхдийнхээ төлөө чин сэтгэлээсээ хийж буй аавын алхам бүхэн хүүхдийн ирээдүйн хөгжил, төлөвшилд томоохон нөлөө үзүүлнэ.
Ялангуяа хүүхдээ асрахад аав биечлэн оролцох нь хүүхдийн нийгэмд биеэ авч явах, өөрийгөө илэрхийлэх, сурч боловсроход чухал нөлөө үзүүлдэг болохыг олон судалгаагаар тогтоожээ.
Зарим аав нялх, бага насны хүүхэдтэйгээ хамт байх, асран халамжлахад дуртай байдаг. Олон аав эхнэрээ амаржихад хажууд нь байж, халамжит ханийн, эцгийн үүргийг сайн гүйцэтгэдэг.
Харин зарим нь эцэг хүний үүрэг, хариуцлагыг өөрөөр ойлгож, биелүүлдэг. Тэд орон гэрээ төвхнүүлэх, хоол хүнсээр дутаалгүй хангах гэх мэтчилэн гэр бүлээ авч явах ерөнхий үүргээ хүлээж, сайн биелүүлдэг ч хүүхдийнхээ өдөр тутмын амьдралд биечлэн оролцдоггүй. Энэ нь нэг талаас тухайн нийгэм дэх хүүхдийг өсгөн хүмүүжүүлэх соёл, уламжлалтай холбоотой хэдий ч нөгөө талаас эцгийн хувьд хүүхдээ асрахад илүү идэвхтэй байхыг сайшаадаггүй үзэл бодолтой нь холбоотой байж болох юм.
Эрэгтэйчүүд хүүхдийн асаргааны тухай илүү их мэдэхийг хүсдэг боловч үүнийгээ илэрхийлэх, өөрсдийн мэдлэгээ дутмаг гэдгийг хүлээн зөвшөөрөхдөө дурамжхан байдаг нь олон оронд хийсэн судалгаагаар батлагджээ. Мөн бага насны хүүхдийг хэрхэн асрах талаар зохиогдож буй дийлэнх сургалт эмэгтэйчүүд, өсвөр үеийн охидод илүү зориулагдсан байдаг тул эрчүүдийн хувьд эмэгтэйчүүдтэй хамт энэ төрлийн сургалтад суухаас санаа зовох, ичих, бусад эрчүүдэд шоолуулахаас эмзэглэдэг болох нь мөн судалгаагаар тогтоогдсон.
Энэ мэдээ танд таалагдаж байвал LIKE хийгээрэй. Танд баярлалаа.
