Афганистаны төрийн эрхийг баригч Талибан хөдөлгөөн бүх эмэгтэйчүүд олон нийтийн газарт нүүрээ халхалсан байх ёстой гэсэн журам гаргажээ.
Өмнө нь тус хөдөлгөөн эмэгтэйчүүдийг хол замд ганцаараа зорчих, эрүүл мэнд, боловсролын салбараас өөр салбарт ажиллах, дунд сургуульд сурах зэргийг нь хориглосон билээ.
Шинээр гаргасан журмын дагуу олон нийтийн газар эмэгтэй хүн нүүр царайгаа ил гаргасан явж байвал түүний асран хамгаалагчдад торгууль ноогдуулж, хорих ялаар хүртэл шийтгэх аж.
Түүнчлэн уг журмыг зөрчсөн эмэгтэйн гэр бүлийн гишүүн, хамаатан садан нь төрийн албан ажилладаг бол тэдгээр хүмүүсийг ажлаас нь халах аж. Талибан хөдөлгөөний зүгээс эмэгтэйчүүд аль болох гэрээсээ гарахгүй байхыг шаардаж байгаа билээ. Афганистанд эмэгтэйчүүдийн дийлэнх нь хижаб өмсдөг ба зарим хотуудад эмэгтэйчүүд зөвхөн үсээ халхалж алчуур зүүдэг байсан аж.
Талибан хөдөлгөөний эмэгтэйчүүдийн эрхийг зөрчсөн дүрэм журмууд нь эдийн засгийн хямрал, хоол хүнсний хомстолд орсон Афганистанд олон улсаас тусламж дэмжлэг авах явдалд нь саад болно гэдгийг ажиглагчид онцолж байна.
Афганистаны эрх баригчид эмэгтэйчүүдийн эрхийг хамгаалах тал дээр бодитой арга хэмжээ авч, олон улсын өмнө хүлээсэн үүргээ биелүүлэхгүй бол барууны орнууд тус улсын эсрэг хориг арга хэмжээгээ цуцлахгүй билээ.
1990-ээд оны сүүлээр Афганистаны төрийн эрхийг атгаж байхдаа Талибан хөдөлгөөнийхан эмэгтэйчүүдийн ажиллах, сурах бүх боломжийг хааж байсан бол өнгөрсөн жилийн 8-р сард дахин Афганистаны төрийн эрхэнд гарахдаа талибанчууд өмнөх шигээ хатуу харгис дэглэм тогтоохгүй хэмээн амлаж байсан юм.
Гэсэн ч уг амлалт нь АНУ-ын зэвсэгт хүчнийхнийг эх орноосоо хурдан гаргах зорилготой байсан нь охид эмэгтэйчүүдийн эсрэг гаргасан журмуудаас нь харж болох юм.
Талибанчууд өмнө нь охидыг дунд сургуульд сурахыг, охид бүсгүйчүүдийг эсэргүүцлийн жагсаал цуглаанд оролцохыг нь хориглосон билээ.
Эх сурвалж: BBC
Содномцэрэнгийн Энхзаяа
mongolcom.mn
