"Токио-2020" олимпод Монгол Улсын нэрийн өмнөөс барилдан мөнгөн медалийг авчирсан Саид Моллай Азербайжаны иргэншил хүссэн тухай мэдээлэл тархсан билээ. Түүний хүсэлтийг Олон улсын жүдо бөхийн холбоо хэлэлцээд ёсоор болгожээ. Тэрбээр өнгөрөгч лхагва гарагаас эхлэн Азербайжаны нэрийн өмнөөс барилдахаар болжээ.
Моллай хэлэхдээ, түүний хамгийн том мөрөөдлийн нэг нь Азербайжаны төрийн далбаан дор тоглолтоо хийх байсан гэжээ. "Монголын жүдо бөхийн холбоотой байгуулсан гэрээний хугацаа дууссаны дараа би анхны санаачилгыг гарган ACF-д хүсэлтээ гаргаж, Азербайжаныг төлөөлөн оролцох хүсэлтэйгээ илэрхийлсэн. Одооноос эхлэн төрөлх Азербайжан улсынхаа далбаан дор тэмцээнд оролцох болсондоо маш их баяртай байна. Биднийг дэлхийн болон Европын аварга шалгаруулах тэмцээн, 2024 оны Парисын зуны олимп хүлээж байна. Бидэнд цаг бага байна, өндөр амжилт үзүүлж, тугаа өндөрт мандуулахын төлөө би чадах бүхнээ хийх болно" гэжээ.
Түүний хувьд Ираны Засгийн газраас тамирчдаа Израилын бөхчүүдтэй барилдахыг хориглосон. Улмаар Ираны жүдочид энэ жил Токиод болсон ДАШТ-д барилдаж чадаагүй юм. Үүнтэй холбоотойгоор өөрийн хүсэлтээр Иран улсын иргэншлээс татгалзаж, 2019 оны арванхоёрдугаар сард манай улсын иргэн болсон байдаг. Моллаи Иранд төрсөн ч Азербайжан гаралтай.
Азербайжаны жүдо бөхийн холбооны Ерөнхий нарийн бичгийн дарга Рашад Расуллу “81 кг-ын жин манай жүдогийн хамгийн асуудалтай жин байлаа. Авьяаслаг бөх олон байгаа ч Эльнур Мамедлигаас хойш хэн ч олимпын медаль авч чадаагүй. Энэ жингийн дэлхийн шилдгүүдийн нэг Саид Моллаи энэ асуудлыг шийдэж өгөх болно. Залуу бөхчүүдэд ч үлгэр дуурайлтай” гэж мэдэгдлээ.
Эх сурвалж: judoinside.com/news/5313/Saeid_Mollaei_will_fight_for_Azerbaijan
Д.Ананд
Энэ мэдээ танд таалагдаж байвал LIKE хийгээрэй. Танд баярлалаа.
