Байнгын хороо 6 хүртэлх сая төгрөгийн тэтгэврийн зээлийг тэглэх чиглэл өглөө

Twitter Print
2020 оны 01-р сар 08-нд 13:58 цагт
Мэдээний зураг,

Даваа гараг буюу нэгдүгээр сарын 6-ны өдөр Засгийн газраас “Иргэдийн тэтгэвэр барьцаалсан зээлийн төлбөрийг төрөөс нэг удаа төлөх тухай” хуулийн төслийг өргөн барьсан. 

Хуулийн төслийг нэн яаралтай горимоор хэлэлцэх бөгөөд өнөөдөр байнгын хороогоор хэлэлцүүлж байна. Уг хуулийн төслийг УИХ-ын чуулганы нэгдсэн хуралдаанаар хэлэлцэх эсэхийг НББСШУБХ-ны хуралдаанаар хэлэлцлээ. Хуулийн төслийг ХНХ-ын сайд С.Чинзориг танилцуулсны дараа асуулт асуух гишүүн байгаагүй тул санал хураалт явуулахад хуралдаанд оролцсон гишүүдийн олонх төслийг УИХ-ын чуулганы нэгдсэн хуралдаанаар хэлэлцэхийг дэмжлээ. 

ХНХ-ын сайд С.Чинзориг, ҮАБЗ-ийн зөвлөмжийг хэрэгжүүлэх зорилгоор Засгийн газраас тэтгэвэр барьцаалсан зээлийг төрөөс нэг удаа тэглэх тухай хуулийн төслийг өргөн мэдүүлсэн. Байгалийн баялгийн өгөөж болох Салхитын алт, мөнгөний ордны орлогоос нэг удаа төлөх хуулийн төслийг санаачилсан. НДС-гаас 2019 оны 12 сарын 31-ний байдлаар 422.9 мянган иргэн тэтгэвэр авчээ. Тус сангаас тэтгэвэр авч буй иргэний 54.5 хувь нь буюу 220.6 мянган иргэн 757.6 тэрбум төгрөгийн зээлтэй байна. 

Хуулийн төслийг танилцуулсны дараа үг хэлэх гишүүн байгаагүй тул байнгын хорооны гишүүдийг төлөөлж, Байнгын хорооны дарга Д.Оюунхорол чиглэл өгсөн юм. Тэрбээр тэтгэврийн зээлтэй 229 мянган иргэний 91.5 хувь нь 6 хүртэлх сая төгрөгийн зээлтэй байна. Тиймээс асуудлыг энэ хүрээнд шийдвэрлэж, өр төлөх дээд хязгаарыг тогтоох чиглэл өглөө.

Түүнчлэн, "192 мянган ахмад зээлгүй. Тэдэнд зориулж ямар нэгэн шийдлийг оруулж ирэх ёстой. Хэлбэр, агуулгын хувьд ямар байх уу гэдэг саналаа оруулж ирээрэй.  Асуудлыг цогцоор нь ярих хэрэгтэй. Нийгэмд ч гэсэн ийм хүлээлт байна” гэв. Тэтгэврийн зээлийн үлдэгдэл төлбөрийг “Эрдэнэс Монгол” ХХК-ийн эзэмшлийн Салхитын мөнгө, алтны ордыг эдийн засгийн эргэлтэд оруулснаас олох орлогоос төрд ногдох өгөөжийг барьцаалан үнэт цаас гаргах замаар бүрдүүлэх аж.

Салхитын мөнгөний орд нь 808.3 тонн мөнгө, 1117.1 кг алтны нөөцтэй бөгөөд урьдчилсан тооцооллоор цэвэр ашиг нь 1 их наяд 50.4 тэрбум төгрөг болохоор байгаа юм.

Г.Ганаа 

Иргэдийн тэтгэвэр барьцаалсан зээлийн төлбөрийг төрөөс нэг удаа төлөх тухай хуулийн төслийг ЭНДээс үзнэ үү. 

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.