Дэлхийн улс орнуудын хэрэгжүүлж буй 14 хоногийн хорио цээрийн дэглэмийн хугацааг зохистой хугацаа хэмээн үзжээ

Twitter Print
2020 оны 03-р сар 24-нд 18:00 цагт
Мэдээний зураг,

Сүүлийн хагас сарын хугацаанд МУ-ын Засгийн газар, УОК-ын шийдвэрийн дагуу тусгай үүргийн онгоцоор нийтдээ 1000 орчим хүн эх орондоо харьж ирсэн байгаа юм шиг байна. Эдгээр гадаад улсаас эх орондоо харьж ирсэн хүмүүсээс КОВИД-19 батлагдсан 9 тохиолдол, гадны 1 иргэн нийт 10 тохиолдол одоогоор бүртгэгдээд байгаа билээ.

Эдгээр онгоцоор ирсэн иргэдийг илэрсэн шинж тэмдэг эсвэл суурь өвчний улмаас эрүүл мэндийн тусламж авах шаардлагатай эсэхээс нь, эсвэл голомтот газраас ирсэн гэдэг утгаар нь ажиглалт хяналт хийх гэх мэтээр 14 хоног орчим тусгаарлаж хорио цээрийн дэглэмд оруулаад байгаа билээ. Дээр нь бас энд тэндэхийн боомт энэ тэрээр нэвтэрсэн сэжигтэй гэх мэтээр хилийн боомтын ойр орчмын хот, орон нутагт нь гээд ер нь л хамгийн багадаа 14 хоног орчим тусгаарлах арга хэмжээг авч байгаа. Энүүний хүчинд ч бас хөдөлгөөн хязгаарлагдаад бид улс дотроо хараахан батлагдсан тохиолдолгүй, бэлэн байдалд ажиллаж хичээж байгаа.

Хөл хорионы хугацаа дуусдагаараа дуусна. Тусгаарлалтанд байсан хүмүүс маань гэр орондоо харьж очно. За зарим хүмүүсийн дунд бас гэр орныхон маань гайгүй байгаа гэх мэт айдас хүйдэс байгаа байх. Магадгүй зарим нэг нь хөл хорионд байсан нэгнээсээ дөлж эмээх, санаа зовох асуудал байгаа л болов уу. Төр засаг ч бас эдгээр хүмүүсийгээ гэртээ хариад, дахин 14 хоног өөрсдийгөө хөл хорионд байлгаарай гэж гуйж байх шиг байна. Хэн хүнгүй л тусгаарлалтаас гарсаныхаа дараа энэ хэдээс маань өвчин илэрч орхих вий гэсэн зовнил болгоомжлол байх шиг байна. Тэгвэл энүүнд хариулт болохоор нэг судалгааны өгүүлэл нийтлэгдэж гарсан байгааг товчлон хүргэж байнаа.

ШИНЭ КОРОНАВИРУС, НУУЦ ҮЕИЙН ГОЛЧ УТГА 5.1 ХОНОГ.
14 ХОНОГ БОЛ ОДООГООР ХОРИО ЦЭЭРИЙН ЗОХИСТОЙ ХУГАЦАА ЮМ БАЙНА.

АНУ-ын Жонс Хопкинс Нийгмийн эрүүл мэндийн Блумберг сургуулийн судлаачдын баг шинэ коронавирусын халдварт өвчин (COVID-19)-ний талаар нийтлэгдсэн өгөгдлүүдэд дүн шинжилгээ хийж, шинэ коронавирус (SARS-CoV-2)-т өртөснөөс өвчин эхлэх хүртлэх цаг хугацаа (нууц үе)-ны голч утга нь 5.1 хоног байгааг олж тогтоожээ.

Энэ үр дүнгээс харахад дэлхийн улс орнуудын Эрүүл мэндийн төв байгууллагуудаас авч хэрэгжүүлж буй халдварын сэжигтэй тохиолдлуудын 14 хоногийн хорио цээрийн дэглэмийн хугацаа “тохиромжтой” байна гэдгийг харуулж байгаа бол нөгөө талаар хамгийн цөөхөнөөр тооцоолсон ч 10,000 хүн тутамд дор хаяж 101 хүн хорио цээрийн хугацаа дууссаны дараа өвчин эхэлж буйг бас харуулж байгаа гэж үзжээ.

97.5% НЬ 11.5 ХОНОГИЙН ДОТОР ӨВЧИН ЭХЭЛЖ БАЙНА

Судлаачид COVID-19-ийн энэ оны 1-р сарын 4-ээс 2-р сарын 24-ний хооронд Хубэй мужаас бусад муж, улс, бүс нутагт халдвар батлагдсан хэмээн зарлагдан, халдварт өртсөн болон өвчилсөн өдөр нь тогтоогдсон 181 тохиолдлын вирусын халдварын далд хугацааг тооцоолсон байна.

181 тохиолдлын 69 нь эмэгтэй, 108 нь эрэгтэй, хүйсийг тэмдэглээгүй 4 тохиолдол, насны голч утгна 44.5 нас, эх газрын Хятадын 73 тохиолдол, Япон зэрэг бусад 24 улс орон, бүс нутагт 108 тохиолдол байжээ. Халдварт өртсөн байдлыг харвал ихэнх нь Хубэйгийн оршин суугч (84 тохиолдол), Ухань руу зорчсон түүхтэй (77 тохиолдол) хүмүүс, бусад нь Ухань хотоос аялагчид эсвэл халдвар батлагдсан тохиолдлуудтай ойрын хавьталтай хүмүүс байв.

Нууц үеийн тооцоолж гаргасан хугацааны голч нь 5.1 хоног (95% итгэх интервал 4.5-5.8 хоног). Өвчтөнүүдийн 97.5% нь халдвар авсан үеэс 11.5 хоногийн дотор (8.2-15.6 хоног дотор) өвчин эхэлж, халдвараас 2.2 хоногийн дотор (1.8 - 2.9 хоног дотор) өвчин эхлэх нь 2.5%-иас бага байна гэсэн тооцоолол хийгдэж. Гэхдээ, эдгээр үр дүнд үндэслэх юм бол 14 хоногийн хорио цээр дууссаны дараа өвчлөх нь 10.000 хүнд 101 хүн (992 хувь 482) байхаар байгаа юм байна.

coronavirus stay home-н зурган илэрц

УРТ ДААН ХУГАЦААНЫ ЯВЦАД ГЭЭГДЭХ ТОХИОЛДЛУУД Ч ГАРЧ МАГАДГҮЙ

Энд тооцоолсон нууц хугацаа нь өмнө хийгдсэн жижиг хэмжээний судалгааны үр дүнг баталгаажуулж буй бөгөөд 2002-04 онд тархсан хүнд хэлбэрийн амьсгалын замын цочмог хам шинжийн вирусын халдварын (SARS-CoV) нууц хугацаатай ижил байна. Харин нөгөө талаар Ойрхи Дорнодын амьсгалын замын синдромын вирус (MERS-CoV) нь дундаж нууц хугацаа нь 5-7 хоног, зонхилон тохиолдох ханиадны коронавирус бол 3 хоног байдаг аж.

АНУ-ын Өвчин хяналтын төв болон дэлхийн олонхи улс орнуудын Эрүүл мэндийн төв байгууллагууд өндөр эрсдэлтэй хүмүүс эсвэл идэвхтэй тандалтын хорио цээрийн хугацааг 14 хоногийн хугацаагаар тогтоосон байгаа.

Судалгааны баг "Одоогийн байдлаар зөвлөмж болгож буй идэвхтэй хяналт эсвэл хорио цээрийн хугацааг зохистой гэж үзэхээр байгаа боловч удаан хугацааны туршид тохиолдол орхигдож гээгдэж болзошгүй байгааг үгүйсгэхгүй" гэж үзэж байгаа юм байна.

Шинэ тутам дэлгэрч буй халдварт өвчин гарч ирэх үед вирусын нуугдмал хугацааг нарийн таамаглаж чадвал тархалтын динамикийг үнэлэх, хорио цээрийн эсрэг үр дүнтэй хариу арга хэмжээг төлөвлөхөд хялбар болно. Хорио цээрийн хугацаа дууссаны дараа өвчлөх тохиолдлын тоо цөөн байх ч, ерөнхийдөө хорио цээрийн улмаас халдварын хурд нь саарч, халдвар дамжилт нь зогсож эхэлсэн байдаг үе.

"Тусгаарлагдсан хүмүүс ажил хийх боломжгүйгээс болж, хувь хүн, нийгэмд эдийн засгийн асар их дарамт учруулдаг. Ийм их хэмжээний дарамттай анхлан нүүр тулдаг хүмүүс бол анхны урьдчилан сэргийлэх хариу арга хэмжээнд дайчлагдан хорио цээрийн дэглэмд ажилладаг эрүүл мэндийн ажилтнууд, онцгой байдлын мэргэжилтнүүд байдаг” гэдгийг онцлон дурдсан байна.

Судалгааны багийнхан хорио цээрийн хоногийн тоо өөрчлөгдсөн тохиолдолд илрүүлэх тохиолдлын тоо болон орхигдуулж болох тохиолдлын тоог тооцоолох хэрэгслийг онлайн байдалд оруулсан байна.

Эх сурвалж: https://iddynamics.jhsph.edu/apps/shiny/activemonitr/

Format: The Incubation Period of Coronavirus Disease 2019 (COVID-19) From Publicly Reported Confirmed Cases: Estimation and Application. Ann Intern Med. 2020 Mar 10. doi: 10.7326/M20-0504.
https://www.ncbi.nlm.nih.gov/pmc/articles/PMC7081172/

Ойдовын Батгэрэл Ph.D

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.