“Ноёд” группын Ерөнхийлөгч Г.Буяндоржийн гомдлыг АТГ-т шилжүүлжээ

Twitter Print
2020 оны 02-р сар 04-нд 10:19 цагт
Мэдээний зураг,

“Ноёд” группийн Ерөнхийлөгч Г.Буяндорж өчигдөр өөрөөс нь төрийн байгууллагын хүч, албан тушаалаа ашиглан 100 мянган ам.долларын авлига нэхэж, улмаар өгөх боломжгүй гэхэд нь 409 хоног цагдан хорьж, 25 тэрбум төгрөгийн хохирол учруулсан нэр бүхий прокуроруудын талаар гомдол гаргаж, нотлох баримтыг ЕТГ-ын дарга З.Энхболдод хүлээлгэн өгсөн.

Тэгвэл нэр бүхий албан тушаалтнууд эрх мэдэл, албан тушаалын байдлаа урвуулан ашиглаж, эрх ашигт нь ноцтой хохирол учруулсан тухай гомдол уг гомдолтой Ерөнхийлөгчийн Тамгын газрын холбогдох хэлтэс танилцаж, иргэдээс төрийн байгууллага, албан тушаалтанд гаргасан өргөдөл, гомдлыг шийдвэрлэх тухай хуулийн 13 дугаар зүйлийн 2-т заасны дагуу иргэн Г.Буяндоржийн өргөдөл, гомдлыг Монгол Улсын Ерөнхий Прокурор, Төрийн хууль цаазын тэргүүн зөвлөх Б.Жаргалсайхан, Авлигатай тэмцэх газрын дарга, Тэргүүн комиссар З.Дашдаваа нарт “Гомдол шилжүүлэх тухай” албан бичгээр шилжүүлж, иргэний гомдлыг зохих журмын дагуу судлан шийдвэрлэж, хариу өгөхийг хүссэн байна.

Тодруулбал, өчигдөр буюу 2-р сарын 3-ны өдөр “Ноёд” группийн Ерөнхийлөгч Г.Буяндорж төрийн байгууллагын хүч, албан тушаалаа ашиглан 100 мянган ам.долларын авлига нэхэж, улмаар өгөх боломжгүй гэхэд нь 409 хоног цагдан хорьж, 25 тэрбум төгрөгийн хохирол учруулсан тухай мэдээлэл хийхдээ "Миний компанийг дээрэмдэж авсан, надаас 100 мянган ам.долларын авлига өгөхийг шаардсан прокуроруудын үйл ажиллагааг онцолж ярих нь зүйтэй байх. Энэ бол нийслэлийн прокурорын орлогчоор ажиллаж байсан, одоо Баянзүрх дүүргийн ерөнхий прокурор хийж байгаа Ц.Батболд, Улсын ерөнхий прокурор Ж.Сандагсүрэн, нийслэлийн прокурорын газрын Хяналтын прокурор н.Халиун нарын үйл ажиллагаатай холбоотой гомдол байгаа.

Тэд зохион байгуулалттайгаар миний хэргийг шалгах явцад НПГ-ын Хяналтын прокурор н.Халиун надаас 100 мянган ам.долларын авлига нэхэж, дарамталсан. Тэр үед би хэрэгт шалгагдаж байсан учраас түүний санал болгосон гэр бүлийн гишүүний өмгөөлөгчтэй нь очиж, 100 мянган ам.долларын гэрээ хийсэн. Өөрөөр хэлбэл, 10 мянган ам.долларын урьдчилгаа өгөөд, хэрэг ашигтайгаар шийдэгдсэний дараа үлдсэн 90 хувийг нь өгнө гэсэн гэрээ хийсэн.

Үүний дараа уг мөнгийг өгөх бололцоогүй гэдгээ хэлсэн ч, үүний улмаас надад таван зүйл ангиар эрүү үүсгэж, таван удаа 409 хоног буюу 1.2 жил цагдан хорьсон. Үүний дараа надад холбогдох хэргийг шүүхэд шилжүүлж, би 16 удаагийн шүүх хуралд орж, компанийнхаа 25 тэрбум төгрөгийн хөрөнгийг алдсан. Ийм ноцтой баримтын би зөвхөн нэг баримтыг нь л дурьдаж байна. Сүүлийн үед баялаг бүтээгчид, бизнес эрхлэгчдийг дээрэмддэг, төрийн байгууллагын хүчээр айлган сүрдүүлдэг, дарамталдаг ажиллагаанд төр засгаас тодорхой арга хэмжээ авч байгаа учраас энэ үйл ажиллагааг зохих хуулийн дагуу шалгах байх хэмээн итгэж, 65 хуудас нотлох баримтыг ЕТГ-ын даргад хүлээлгэн өгч, Ерөнхийлөгчид гомдол гаргаж байна" гэсэн билээ.

Г.Ганаа 

Холбоотой мэдээлэл: Нэр бүхий прокурорууд бүлэглэн “Ноёд” группын захирал Г.Буяндоржоос авлига нэхсэн баримтыг дэлгэлээ

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.