ОХУ-ын газрын тосны импортонд хориг тавих дээр зөвшилцөлд хүрчээ

Twitter Print
2022 оны 05-р сар 31-нд 11:20 цагт
Мэдээний зураг,

Европын холбооны зөвлөлийн тэргүүн Шарль Мишелийн мэдэгдсэнээр Европын холбооны улс орнууд ОХУ-ын эсрэг тогтоож буй 6 дахь багц хориг арга хэмжээний хүрээнд ОХУ-ын газрын тосны импортонд хэсэгчлэн хориг тавих дээр зөвшилцөлд хүрчээ. 

Европын  холбооны орнуудын удирдагчдын ОХУ-ын газрын тосны импортонд тавьсан хоригт далайгаар тээвэрлэн ирдэг газрын тосны импорт багтаж байгаа ба энэ нь ОХУ-аас Европын холбоонд импортлодог нийт газрын тосны 2/3-ыг эзэлдэг аж. 

Шарль Мишелийн онцолсоноор ОХУ-ын газрын тосны импортонд хориг тавьснаар ОХУ-ын зэвсэгт хүчний  санхүүжилтын гол эх үүсвэр хумигдах ба   энэ нь ОХУ-д Украинд явуулж буй дайнаа зогсоох хүчтэй дарамт болж өгөх аж. 

Түүнчлэн Европын холбоо ОХУ-ын эсрэг тогтоох багц хориг арга хэмжээнд Оросын "Сбербанк" банкийг SWIFT олон улсын төлбөрийн системээс хасах, Украинд дайны гэмт хэрэг үйлдэхэд оролцсон болон холбогдсон албан тушаалтнуудад хориг тавих, Оросын төрийн өмчит телевизийн 3 сувгийг Европын холбоонд дамжуулахыг хориглох зэрэг арга хэмжээнүүд багтжээ. 

Европын холбооны зөвлөлийн үеэр ОХУ-аас газрын тосныхоо 65 хувийг импортлодог Унгар улс ОХУ-ын газрын тосны импортонд хориг тавих асуудлыг эсэргүүцэж буйгаа илэрхийлсэн байна. Түүнчлэн далайд гарцгүй Словак, Чех зэрэг улс ОХУ-ын газрын тосны импортын хамаарлаасаа гарахад хугацаа хэрэгтэй гэдгийг онцолжээ. 

Унгарын Ерөнхий сайд Виктор Орбан Европын холбооны зөвлөл ОХУ-ын газрын тосны импортонд хориг тавих асуудлаа гишүүн орнуудтайгаа хангалттай хэмжээнд ярилцаж, хэлэлцэж чадаагүй хэмээн шүүмжилж, "эрчим хүч бол асар чухал асуудал учраас эхлээд шийдлээ олчихоод дараа нь хоригоо тавих ёстой" гэжээ. 

Европ даяар бараа бүтээгдэхүүний үнэ нэмэгдэж, үүн дээр эрчим хүчний үнэ огцом өссөнөөс болж Европын зарим орнуудад ОХУ-ын эсрэг хориг тавьж, давхар эдийн засгаа доройтуулах хүсэл үгүй болжээ. 

Европын холбооны зөвлөлийн хуралд утсаар холбогдож оролцсон Украины Ерөнхийлөгч Владимир Зеленский Европын улс орнууд хоорондоо үл ойлголцож байгаа нь ОХУ-д л ашигтай гэдгийг онцолжээ. Тэрээр, "Европын улс орнууд хоорондын бүх хэрүүл маргаанаа зогсоох хэрэгтэй. Дотроо хагаралдсанаар ОХУ-ын зүгээс та нарт бүр ч их дарамт шахалт ирэх болно. Эвлэлдэн нэгдэх цаг болсон." хэмээн ярьжээ. 

Латвийн Ерөнхий сайд Кришьянис Кариньш улс орнууд зөвхөн өөрсдийн ашиг сонирхлоо бодох ёсгүй гэдгийг онцолж, "Мэдээж энэ хориг арга хэмжээ эдийн засагт хүндээр тусна. Гэхдээ энэ чинь зүгээр л мөнгө. Гэтэл украинчууд амь насаараа дэнчин тавьж байна." гэжээ.

Эх сурвалж: Reuters

Содномцэрэнгийн Энхзаяа

Mongolcom.mn

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.