Оюутолгойн ажиллагаа зогсонги байдалд орсноос Изинис Эйрвэйз дампуурахад хүрсэн үү

Twitter Print
2014 оны 05-р сар 29-нд 10:55 цагт
Мэдээний зураг,

“Оюутолгой” компанийн ажилчид өчигдөржин түгшүүртэй өнжлөө. Учир нь тус компанийн Удирдах зөвлөлөөс 300 ажилтнаа халах болсон талаар мэдэгдсэн юм. Эдгээр ажилчдаас туслан гүйцэтгэгчээр ажилладаг компаниудаас 100, үндсэн ажилчдаасаа 200 нийт 300 хүнийг халахаар болжээ. Компанийн зүгээс "Дэлхийн зах зээл дээр зэсийн үнэ буурсанаас дотоод зардлаа хэмнэх шаардлагатай болсон" гэсэн тайлбар ажилчдадаа өгчээ. 

Өнгөрсөн онд тус компанийн далд уурхайн ажил зогсонги байдалд ороход туслан гүйцэтгэгчээр ажиллаж байсан компаниуд ажилчдаа цомхотгож байсан билээ. Тухайн үед сайн сайхан амьдрал мөрөөдөж Өмнөговийг зорьсон 2000 гаруй залуу өмссөн хувцаснаас өөр зүйлгүй гэртээ ирж байсан. Тэдгээр залуус холын мөрөөдлөө гээгээд зогсохгүй байр, машины зээлтэй хоцорсон байдаг. Харин үүнээс жил хүрэхгүйн хугацаанд дахин 200 залуу ажилгүйчүүдийн эгнээнд нэгдэж байгаа нь харамсалтай.

Хэдхэн хоногийн өмнө Үндсэний агаарын томоохон тээвэрлэгч “Изинс Эйрвэйз” компани санхүүгийн алдагдлаа нөхөж дийлэхгүйд хүрч, 230 ажилтнаа халж, үйл ажиллагаагаа зогсоосон юм. Тус компани нь 2006 оноос хойш хөдөө орон нутагт тогтмол нислэг үйлдэж, чанартай сайн үйлчилгээ үзүүлж ирсэн гэдгээрээ олны талархал хүлээсэн билээ. Хөдөө олон нутгийн иргэдийн санхүү, эдийн засгийн чадавхи доройтсоноос онгоцоор нисэх иргэдийн тоо эрс цөөрсөн аж. Изинис компанийн голлох нислэгүүдийн нэг нь яах аргагүй Оюутолгойн захиалгат нислэгүүд байжээ. Гэвч өнөөгийн эдийн засгийн хямралаас гадна санхүүгийнх нь багагүй хувийг бүрдүүлдэг Оюутолгой компанийн үйл ажиллагаа зогсонги байдалд орж, ажилчдаа халж буй нь тэднийг дампуурлаа зарлахад хүргэсэн бас нэгэн хүчин зүйл болсон нь ойлгомжтой.

Ийнхүү шил шилээ даран дамдуурч, хаалгаа барьсан компаниудын жагсаалт үргэлжилж хохирогч нь нөгөө л ядарсан ард түмэн болж байна. Монголын эдийн засагт томоохон нөлөө үзүүлдэг Оюутолгой  компаниас халагдаж байгаа эдгээр хүмүүсийн цаана хамгийн доод тал нь гурван хүн байдаг гэж бодоход 600-700 хүний амьдрал хаашаа эргэх нь тодорхойгүй байна. Ганц Оюутолгойгоор зогсохгүй "АПУ", "МАК", "МСS" гээд үндэсний томоохон компаниуд ажилчдаа цомхотгож, цалинг нь танаж байгаа, Мобиком компани мөн ажилчдаа олон зуугаар нь цомхотгож байгаа гээд сүүлийн хэдэн сар дандаа л ажилгүй болсон гэсэн үг чих дэлсдэг болсон гэхэд хэлсдэхгүй. 

Долларын ханштай бол ярих зүйл үгүй болсон. Өнгөрсөн жилийн өдийд 1400 байсан ханш одоо даруй 450 төгрөгөөр нэмэгдэж, хөөрхий муу үндэсний мөнгөн тэмдэгт маань ноён долларт өвдөгөө тултал бөхийгөөд байгаа. Өргөн хэрэглээний бараа бүтээгдэхүүн, хоол хүнсний үнэ амаа авч давхидаг морь шиг дээшээ алга болоод өгсөн. 

Эдийн засгийг эрчимжүүлэх 100 хоногийн төлөвлөгөөг Засгийн газраас хэрэгжүүлээд 20 хонож байна. Гэтэл томоохон аж ахуйн нэгжүүд дампуурлаа зарлаж, ажилчдаа халж байгаа нь хүссэн хүсээгүй улс орны эдийн засаг тун ч дорой байгааг улс төрчид, эдийн засагчид хүлээн зөвшөөрч дорвитой арга хэмжээ авахаас өөр аргагүй байдалд хүрээд байна. Өдрөөс өдөрт өсөн нэмэгдэж байгаа ажилгүйчүүдийн тоо ихсэх тусам нийгэмд архидалт, гэмт хэрэг, янхандалт, гуйранчлал гээд олон олон сөрөг үр дагавар авчирдаг гэдгийг өнгөрсөн он жилүүдийн гашуун туршлагаас дээр дооргүй мэдэж л баймаарсан даа.

 

Сэтгүүлч Ц.Мөнхбаяр

E-mail: mongolcom.mn@gmail.com
Утас: 76110303, 76110505

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.