БНХАУ-ын Батлан хамгаалахын сайд Вэй Фэнхэ Бээжин Тайвань тусгаар тогтнолоо зарлахыг зогсоохын тулд эцсээ хүртэл тэмцэх болно хэмээн мэдэгджээ. Тэрээр, "Бид бүх чадлаараа эцсийг нь хүртэл тэмцэх болно. Энэ бол Хятадын цорын ганц сонголт." хэмээн Сингапурт болсон аюулгүй байдлын чуулганы үеэр мэдэгдсэн ба Тайвань нь юун түрүүнд Хятадын нэг хэсэг гэдгийг онцолжээ.
Вэн Фэнхэ, "Хятадыг хуваах оролдлого хийж, Тайванийг тусгаар тогтнохыг дэмжигчдэд сайн зүйл тохиолдохгүй. Хятадын зэвсэгт хүчний газар нутгийнхаа бүрэн бүтэн байдлыг хамгаалах чадвар, хүсэл зорилгыг дутуу үнэлэх хэрэггүй." хэмээн мэдэгджээ.
Түүний энэхүү мэдэгдлээрээ АНУ-ын Батлан хамгаалахын сайд Ллойд Остины мэдэгдэлд хариу өгчээ. Ллойд Остины зүгээс БНХАУ Тайванийн аралтай ойрхон цэргийн үйл ажиллагаа явуулж байгаа нь "өдөөн хатгасан, бүс нутгийн тогтвортой байдлыг алдагдуулсан" үйлдэл хэмээн Бээжинг буруушаасан мэдэгдэл хийсэн аж.
Бээжин Тайванийг өөрийн газар нутгийн нэг хэсэг хэмээн үздэг ба сүүлийн үед Бээжингийн байлдааны онгоцнууд Тайванийн агаарын хилийг зөрчих явдал нэмэгдсэн нь АНУ-Хятад хоёр улсын харилцаа хурцдахад нөлөөлөөд байгаа билээ. Тайванийн Гадаад харилцааны яамнаас, "Тайвань хэзээ ч Хятадын засгийн газрын эрх мэдэлд байгаагүй бөгөөд Тайванийн ард иргэд Хятадын засгийн газрын сүрдүүлгэнд автахгүй." гэж мэдэгдэхийн зэрэгцээ АНУ-ын дэмжлэгэд талархаж буйгаа илэрхийлжээ.
Тайванийн Ерөнхий сайд Сү Цэньчан Тайваний хувьд Хятадтай эрх тэгш харилцааны үндсэн дээр, улс төрийн ямар ч нөхуөл болзолгүйгээр харилцахад бэлэн байгааг илэрхийлжээ.
Нөгөө талаас Вэн Фэнхэ Бээжинтэй харилцаагаа сайжруулах эсэх нь Вашингтоноос шалтгаална хэмээн мэдэгджээ. Тэрээр, "АНУ БНХАУ-ыг гүжирдэж, дарамт үзүүлэхээ зогсоох хэрэгтэй. Хятадын дотоод асуудалд хөндлөнгөөс оролцохоо зогсоо. АНУ тэгэхгүй аваас хоёр улсын харилцаа хэзээ ч сайжирч чадахгүй." хэмээн онцолсон байна.
Эх сурвалж: Reuters
Содномцэрэнгийн Энхзаяа
mongolcom.mn
