Нийслэл Европын хөрөнгө оруулалтын банктай хамтран ажиллана

Twitter Print
2014 оны 05-р сар 28-нд 12:12 цагт
Мэдээний зураг,

Улаанбаатар хотын гэр хорооллыг иргэдийн оролцоотой дахин төлөвлөх, усан хангамж, цэвэрлэх байгууламж, дулааны үйлчилгээг нэмэгдүүлэх, нийгэм эдийн засгийн дэд бүтцийг сайжруулж, бичил санхүүжилтийг дэмжих, төслийг хэрэгжүүлэх байгууллагын чадавхижуулах зэрэг зорилго бүхий “Гэр хорооллыг хөгжүүлэх, хөрөнгө оруулалтыг дэмжих хөтөлбөр"-ийн санхүүжилтийн ерөнхий хэлэлцээр Монгол Улсын Ерөнхий сайдын 2013 оны 11 дүгээр сарын 06-ны өдрийн 172 дугаар захирамжаар Эдийн засгийн хөгжлийн сайдад гарын үсэг зурах эрхийг олгосон.

Энэ хөтөлбөрт Европын хөрөнгө оруулалтын банк Нийслэлийн гэр хорооллын усан хангамж, ариун цэврийн байгууламжид зориулан 50 сая еврогийн (60.3 сая ам.доллар) санхүүжилтийг хийхээр тусгагдсан бөгөөд 2014 оны 5 дугаар сарын 19-нөөс 21-ний хооронд Люксембургийн Их Вант Улсад зохион байгуулагдсан Европын хөрөнгө оруулалтын банктай хийх зээлийн нөхцөлийг тохирох урьдчилсан хэлэлцээнд Эдийн засгийн хөгжлийн яамнаас Хөрөнгө оруулалтын газрын даргын үүргийг түр орлон гүйцэтгэгч С.Жавхланбаатараар ахлуулсан ажлын хэсэг оролцон урьдчилсан хэлэлцээг амжилттай хийлээ.

Тус ажлын хэсгийн бүрэлдэхүүнд нийслэлийн Засаг даргын Хот байгуулалт, хөрөнгө оруулалтын асуудал хариуцсан орлогч дарга С.Очирбат, Нийслэлийн Засаг даргын Тамгын газрын  Төсөл, хамтын ажиллагааны хэлтсийн дарга Д.Отгонбаатар, мэргэжилтэн Ц.Баярсайхан, Эдийн засгийн хөгжлийн яамны Эдийн засгийн хамтын ажиллагаа, зээл, тусламжийн бодлогын газрын  мэргэжилтэн Ц.Равдандаш нар ажиллажээ.

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.