Хятадын эрх баригчид Цагаан сарын үеийн хөл хөдөлгөөнийг багасгахыг зорьж байна

Twitter Print
2021 оны 01-р сар 28-нд 13:01 цагт
Мэдээний зураг,

Өнөөдрөөс эхлэн Цагаан сарын баярыг гэр бүл, ойр дотныхонтойгоо тэмдэглэх гэсэн сая сая хятадууд төрсөн хот, тосгод руугаа аялж эхэлж байна.

Дэлхийн хамгийн том хүний нүүдэл Хятадын Цагаан сарын үеэр болдог ба сая сая хятадуудын хувьд энэ нь гэр бүл ойр дотныхонтойгоо жилдээ ганц удаа уулзах боломж болдог юм. Нөгөө талаас Цагаан сарын энэ их хөл хөдөлгөөний үеэр коронавирусын халдвар тархах эрсдэл өндөр болохыг мэргэжилтнүүд онцолжээ. Өнгөрсөн жилийн Цагаан сарын баяр нь Хятадад КОВИД-19 тархах гол шалтгааны нэг болсон билээ.

Үүнтэй холбогдуулан Хятадын эрх баригчид ард иргэдийнх хувьд чухал ач холбогдолтой Цагаан сарын баярыг цуцлалгүйгээр хүмүүсийг гэр гэрт нь үлдээхийн тулд олон төрлийн арга хэмжээ авч эхэлжээ. Энэ жил Хятадад Цагаан сарын баярын амралт 1-р сарын 28-наас 3-р сарын 8 хүртэл үргэлжлэх ба энэ нь иргэдэд Цагаан сарын баярын өдөр гэр бүл, ойр дотныхонтойгоо амжиж уулзах хангалттай хугацаа болж байгаа аж. Коронавирусын цар тахлаас өмнө Хятад даяар Цагаан сарын баярын амралтын үеэр ойролцоогоор давтагдсан тоогоор 3 тэрбум хүн аялдаг байсан ба өнгөрсөн жил энэ тоо талаас илүү хувиар буурсан юм. Тэгвэл энэ жил коронавирусын халдварын тохиолдол буурч, хятадууд хэвийн амьдралдаа эргэн орсонтой холбоотойгоор Цагаан сарын үеэр давтагдсан тоогоор 1.7 тэрбум хүн аялах тооцоотой байгаа аж.

Бээжингийн зүгээс Цагаан сарын их нүүдэл эхлэхээс өмнө хүн амынхаа 3.5 хувь буюу 50 сая хүнийг коронавирусын эсрэг вакцинд хамруулахаар төлөвлөжээ. Түүнчлэн Хятадын Үндэсний Эрүүл мэндийн зөвлөл иргэдийг хөдөө орон нутаг руу зорчихоосоо 7 хоногийн өмнө шинжилгээ өгч коронавирусын халдваргүй гэдгээ батлахыг шаардаж байгаа ба орон нутагт ирсэн иргэд 14 хоног өдөр бүр биеийн халуунаа хэмжиж, 7 хоног бүр коронавирусын шинжилгээ өгч, 14 хоногтоо ямар ч уулзалт цуглаанд оролцохгүй байх журам гаргасан байна.

Chinese New Year: Clamping down on going home for the holidays - BBC News

Ханжоу хотын удирдлагууд Цагаан сарын баярын амралтын үеэр төрсөн хот, тосгон руугаа яваагүй ажилчдад 1000 юаний тэтгэмж өгч байгаа бол Жежян, Ниньбо, Цюаньжоу хотод үйл ажиллагаа явуулдаг коипаниуд мөн адил орон нутаг руу яваагүй ажилчиддаа мөнгөн тэтгэмж олгохоор болжээ. Компаниуд Цагаан сараар аялаагүй ажилчдад мөнгөн тэтгэмжээс гадна үнэгүй хоол хүнс, түүх дурсгалын газраар үйлчлүүлэх эрхийн бичиг зэргийг санал болгож байгаа аж.

Зарим хотууд хөдөө орон нутгаас ирж ажиллаж буй ажилчдаа Цагаан сараар гэртээ хариагүйн төлөө зөвхөн тухайн хотын иргэншилтэй иргэдэд олгодог байр орон сууц, эрүүл мэндийн хөнгөлөлт урамшууллыг олгохоор болсон байна. Иу хотын удирдлагууд Цагаан сараар нутаг буцаагүй ажилчдад түүх соёлын дурсгалт газар үзэх тасалбар үнэгүй олгож, хүүхдүүдэд нь өвлийн зусланд амрах эрхийн бичиг өгч, Цагаан сараар хаагаагүй үйлчилгээний байгууллагуудад тэтгэмж олгохоор шийдвэрлэсэн ба эмнэлгийн үзлэг шинжилгээнд хамрагдах төлбөрийг 50 хувиар хөнгөлөхөөр болжээ.

Эх сурвалж: BBC

Содномцэрэнгийн Энхзаяа 

mongolcom.mn 

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.