"Камертон" хамтлагийн үргэлжлэл хөгжмийн ертөнцөд тэсрэлт хийх үү?

Twitter Print
2014 оны 08-р сар 11-нд 17:09 цагт
Мэдээний зураг,

"В” продакшны уран бүтээлчид болох “Бид 4” хамтлагийг сонсогчид хэдийнээ таних болсон билээ. Монголын рок попын ертөнцөд өөрийн гэсэн байр суурьтай, фэнүүдийн хүрээллийг бий болгож чадсан “Камертон”-чууд өөрсдийн залгамж халаагаа бэлдэж, шинэлэг өнгө, аясыг рок поп урлагт төрүүлэх боломжийг бүрдүүлж байсан цаг саяхан мэт. Тэгвэл “Камертон”-чуудын үргэлжлэл “Бид 4” хамтлагийнхан шинэ уран бүтээлийнхээ ажилд ханцуй шамлан орсон бөгөөд тэд саяхан “Хайртай” дуугаа албан ёсоор цацсан нь хэдийнэ үзэгчдийн сонсох дуртай дууны нэг болжээ.

Шинэ бүтээлийн араас бас нэгэн шинэхэн бүтээл үзэгчдэд хүрсэн нь “Бид 4” хамтлагийнханы анхны бие даасан цомогт нь багтсан “Оройтоогүй” хэмээх дуу. Энэ дууныхаа клипийг сонсогч түмэндээ саяхан өргөн барьсан. Харин уран бүтээдчид маань их ажлынхаа хажуугаар цаг зав гарган манай редакцад зочилсон юм.

“Камертон-2” шоунд оролцсноор та бүхний урлагийн алтан шар зам нээгдсэн. Бүтэн нэг жилийн турш бэлтгэл сургуулилт хийгээд зав муутай байсан байх. Одоо уран бүтээлүүдээ үзэгч түмэндээ хүргэх үү?

Бид өөрсдийгөө энэ шоунд оролцсондоо их азтай гэж боддог. Яагаад гэхээр бид багаасаа л “Камертон” хамтлагийн дууг сонсож, бишэрч ирсэн. Хэзээ нэгэн цагт монголдоо хөвгүүдийн band  хамтлагтай болчихсон явбал мөн сайхан аа гэсэн хүсэл мөрөөдөлтэй байсан.

Тэмцээн бүтэн жилийн турш явагдсан тул энэ хугацаанд өндөр ачаалалтай, маш чанартай, өдөр бүр тасралтгүй бэлтгэл сургуулилт хийж ирсэн. Энэ шоу дууссанаас хойш жилийн хугацаа өнгөрсөн байна. Уран бүтээлээ туурвиж гаргахын тулд энэ хугацаанд бас л багагүй хөдөлмөрлөж, бэлтгэл сургуулилтандаа их анхаарал хандуулсан. Энэ хугацаанд “Бид 4” Сингапур улсад хоёр сар англи хэлний сургалтанд сураад хажуугаар нь энэ улсын соёл урлагтай тодорхой хэмжээгээр танилцаад ирсэн.

760 гаруй залуусаас шилэгдэж ялагч болох тэр мөчид юу бодогдож байв?

Тэр үед бид дөрвийн мөрөөдөл биелсэн. Багаасаа “Камертон” хамтлагийн дуунуудыг сонсож, өссөн болоод ч тэр юм уу урлагт хүчин зүтгэж хамтлаг байгуулна гэсэн бодол төрж байсан. Ингээд л урлагийн хүн болох талаар байнга боддог болж мөрөөдлийнхөө төлөө бага, багаар хүчин зүтгэсээр СУИС гэх том айлд хаалгыг нь тогшоод орж байлаа. Манай хамлагийн гурав нь СУИС, харин хамтлагийн гишүүн Д.Зоригийн хувьд МУИС-ийг төгссөн. Ер нь бид дөрөв өөрсдийн зорилго, хүсэл эрмэлзлэлийнхээ төлөө явж буй учраас энэ шоу бидэнд асар том боломжийг олгосон. Дөрвөн хоолойгоор дуулах чанартай сайн хамтлагтай болох нэг л мөрөөдөлтэй, тэр л хүсэл тэмүүлийнхээ төлөө бид зүтгэж яваа.

Монголын хамгийн анхны өндөр шагналтай шоу гэдгээрээ өрсөлдөгч залуучууд хүчтэй байсан биз?

Аливаа шоу тэмцээнийг өрсөлдөгчгүйгээр төсөөлөхийн аргагүй. Мэдээж тэр үед “Камертон” шоуны шагналын сан маш өндөр байсан. Гэхдээ бид дөрвийн хувьд энэ нь тийм чухал байгаагүй. Хамгийн гол нь энэ шоуны ард “Камертон"-чууд байсан учраас шоунд оролцоход их нөлөөлсөн. Түүнээс биш өөр уралдаан тэмцээнд оролцох хүсэл байгаагүй.

“Бид 4” хамтлагийн хувьд мэргэжлийн урлагийн сургуулийн оюутнууд тус шоунд оролцсон нь бусад өрсөлдөгч нарт хэцүү байсан байх?

Мэдээж хэрэг бидний хувьд өрсөлдөгчдөөсөө бэлтгэл сургуулилтаар илүү байсан байх. Гэхдээ өрсөлдөгчид маш хүчтэй, ширүүн байсан. Бид дөрөв анхнаасаа л түрүүлнэ гэсэн зорилт тавьж, түүндээ хүрэхийн тулд өөрсдийгөө дайчилж бэлтгэлээ цаг ямагт хийж, үе шат бүртээ хариуцлагатай хандаж оролцсон нь үр дүнгээ өгч, ялагч болсон.

Шоунд оролцсноор та дөрвийн амьдралд хэр өөрчлөлт орсон гэж үзэж байна?

Мэдээж хэрэг өөрчлөлт оролгүй яахав. Бид дөрвийн хувьд хүүхэд наснаасаа хамтлагтай болохыг хүсдэг байсан. Тэр утгаараа хүсч байсан хамтлагтай орж, продюссероор төрийн соёрхолт дуучин Д.Болд ах ажиллаж байгаа учраас маш том ахиц дэвшил гарсан гэж боддог. Тэр утгаараа төсөл дуусаад бид дөрөв шууд цомгийн ажилдаа орсон. Энэ үед бидний дуунууд аль хэдийн зохиогдчихсон байсан.

Анхны уран бүтээл болох "Хайртай” дуугаа үзэгчдийн хүртээл болголоо. Цомогт хэдэн дуу багтсан бэ?

Манай хамтлагийн анхны цомог таван дуутай. Одоогоор гурван дуугаа дүрсжүүлсэн Soul R&B album гарч байгаа. Цомгийн бичлэг “White Arch” студид хийгдсэн хөгжмийн найруулга дээр "Mix master", “В production”-тай гэрээтэй ажилладаг Оросын холбооны улсын "Vivo" студид хийгдсэн байгаа.

Хэвлэлтэнд мөн “В production”-тай хамтарч ажилладаг Солонгосын маш чанартай сайн студид орсон. Одоо хэдхэн хоногийн дараа цомог маань ирэх гээд догдлон хүлээцгээж байна.

Ихэнх хамтлагууд дууныхаа үг, аяыг өөрсдөө зохиодог. Танай хамтлагийн хувьд өөрсдийн бүтээл бий юу?

Манай хамтлагийн хувьд өөрсдөө зохиосон дуунууд байгаа. Одоохондоо гаргах төлөвлөгөөгүй ч дараа дараагийн цомгуудаар гаргах бодол бий. Эхний гарч буй “Бид 4” цомгийн бүх дуунуудын аяыг “B” продакшны захирал, Төрийн соёрхолт, продюссер дуучин Д.Болд ах зохиосон. Шүлгийг Quiza, Нарангэрэл, Золзаяа буюу ZZ ажилласан. Хөгжмийн найруулгийг Баярхүү, Халиун, хоолойны бичлэгийг “White Arch” студийн Мөнх-Оргил ах хийсэн.

Тайзан дээр гарах үед хэр зэрэг сандардаг вэ. Оюутан байх үедээ шоунд оролцож дуулж байсан гэсэн?

Дуулахаас өмнө сандарч, догдлох, гэгэлзэх асуудал зөндөө гардаг л даа. Ерөнхийдөө бэлтгэлээ сайн хийгээд явчихвал тайзан дээр гарах тэр айдас алга болдог. Гол нь бэлтгэл сургуулилт энэ бүхэнд маш их нөлөөтэй. Сандрах тусам үзүүлэх гэж байгаа зүйлээ гүйцэд үзүүлж чадахгүй шүү дээ. Тиймээс сандарч тэвдэхгүйгээр сэтгэл зүйгээ сайн бэлдэх л хэрэгтэй.

Тэмцээнд оролцож байх үедээ дууныхаа үгийг гэнэт мартчихсан тохиолдол гарч байсан уу?

Яг тоглолтын үед бол тийм зүйл тохиолдож байгаагүй. Хааяа гэнэтийн тохиолдолд дуулах үе гарч байсан. Тэр үед урд хойно нь оруулаад л дуулж байснаа санаж байна /инээв/. Түүнээс биш хариуцлагатай тоглолтын үед тийм хайхрамжгүй зүйл гаргаж болохгүй.

Ер нь дуучид хүүхэд байхдаа урлагийн хүн болно доо гэж бодож мөрөөддөг юм шиг санагддаг. Харин та дөрвийн хувьд?

Ялгаа байхгүй их мөрөөдөмхий хүүхэд байсан. Миний хувьд 6-7-р ангиасаа дуулж эхэлсэн. Улмаар хамтлаг байгуулж нэг хэсэг явсан ч зарим нь дундаасаа өөр юм хөөгөөд салцгаасан. Гэхдээ хүсэл мөрөөдлөө орхихгүйн тулд СУИС-д орсон. Сонирхуулахад, манай хамтлагийн Б.Баярмандах, Б.Оргил бид гурав "Soul mate crew” хамтлагт байсан. Бид чанартай бүтээл хийх гээд үздэг, оролддог, хичээдэг байсан. Мөнгө, санхүү, сайн продюссер хэрэгтэй байсан болохоор нэг л болж өгөөгүй юм. Бүх зүйл дээр нарийн тооцоолж зөв хөдлөхгүй бол болохгүй байсан үе. Яг тэр үед “Камертон-2” шоу болж, гар гараа бариад шийдвэр гаргасан нь бидний мөрөөдөл биеллээ олсон. Хэрэв шоунд оролцоод тэнцэж чадахгүй бол тус, тусынхаа уран бүтээлээ хийе гэж шийдээд оролцсон чинь гурвуулаа тэнцсэн. Үүнийг бид их аз завшаан, хувь тавилан гэж боддог.

Та дөрөв хөгжимд хэр авьяастай вэ?

Ер нь хөгжим оролдоно шүү. Одоохондоо хоолойны бичлэг, фитнессийн бэлтгэл хийгээд завгүй яваа учраас хөгжмийн талд дээр бэлтгэл хийдэггүй. Амьд хөгжмийн хамтлаг биш учраас. Гэхдээ мэдээж хэрэг хөгжимтэй ойр байлгүй яахав. Хэрэв зайлшгүй тохиолдолд амьд хөгжимтэй тоглох болвол манай Зоригоо бөмбөр, Оргил төгөлдөр хуур, би гатар тоглох байх даа.

Хамтлагийн нэрний хувьд?

Нэрний хувьд “Бид 4” гэдэг нэр их утга учиртай. Их удаан бодож, ярилцаж байж өгсөн. Нэр гэдэг цаашдын хувь заяатай холбоотой байдаг учраас зүгээр нэг сэтгэлийн хөөрлөөр өгч болохгүй асуудал. Тиймээс хамтлагтай монгол нэр өгье гэж бодоцгоосон. Ер нь ямарваа нэрийг хэрхэн авч явах нь эзэнтэй хамааралтай. Тийм болохоор “Бид 4”-ийн нэрийг цаг хугацаа, хийж буй уран бүтээлүүд харуулах болно.

Хэрэв "Бэрд" гарч ирээд ганц хүслээ хэл гэвэл?

Нэг бодол бий. Бид дөрөв чанартай уран бүтээл хийсээр байгаад үхэн үхтлээ хамт байхыг боддог. Ямарваа нэг хамтлаг шиг тарж бутраад алга болчихгүй юмсан гэж их хичээдэг. 

Үхэн үхтлээ бид хамтдаа гэлээ. Тэгэхээр уран бүтээлийн хувьд ч тэр муудалцаж сайндах зүйл бишгүй л гарна биз?

Муудалцаж, санаа оноо зөрдөггүй ажил гэж юу байхав. Нэг талаасаа ам мурийх зүйл гарлаа гэж бодоход нэг их ач холбогдол өгдөггүй. Яагаад гэвэл бид дөрвийн хүсэл эрмэлзэл, зорилго нэг болохоор муудалцах зүйл гардаггүй дээ. Нэгнийхээ үгийг сайн сонсож чаддаг.

Монголын хөгжмийн урлагт залуу хамтлаг мэндэллээ. Хамтлагийн хэтийн зорилго?

Монголдоо Soul R&B чиглэлээр чанартай сайн уран бүтээл хийж, цаашдаа гадагшаа чиглэх зорилготой байгаа. Мөн “Камертон” хамтлаг шиг урт удаан настай, чанартай boyband болохыг зорьсон.

Урлагт хүчин зүтгэж буй өрсөлдөгчөө ямар нүдээр хардаг вэ?

Бид эхлээд өөрсдийнхөө уран бүтээлээ маш сайн чанартай хийх хэрэгтэй. Мэдээж хэрэг манай үеийн зөндөө авьяастай хамтлаг дуучид гарч ирж байна. Тэд нартай өрсөлдөж үзмээр санагдалгүй яахав. Өрсөлдөөн дундаас чанартай бүтээл гарна шүү дээ.

-Санхүүгийн асуудлаа хэрхэн шийдэж байна вэ?

-Манай анхны цомгийг "Скайтел" групп ивээн тэтгэсэн. Нэг жилийн хугацаанд гэрээтэй ажиллаж байгаа. Бид дөрвийг дэмжиж хамтран ажилладаг “В production”-тай”, “Боловсрол” суваг телевиз “Anti garavity” студи "Сарангоо" фитнесс клубын хамт олондоо болоод биднийг уран бүтээлийг сонсдог, дэмждэг бүх хүмүүсдээ баярлалаа гэж хэлье.

 

 

Сэтгүүлч Г.Ганчимэг

E-mail: mongolcom.mn@gmail.com
Утас: 76110303, 76110505

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.