Бахрейн улс их хэмжээний нулимс асгаруулагч хий худалдан авах тендер зарлажээ

Twitter Print
2013 оны 11-р сар 01-нд 15:48 цагт
Мэдээний зураг,

Бахрейн улс их хэмжээний нулимс асгаруулагч хий худалдан авах тендер зарласан нь хүний эрхийг хамгаалагчдын анхаарлыг татлаа. Бахрейний Дотоод хэргийн яам 1,6 сая ширхэг нулимс асгаруулагч хийн сум, 90,000 ширхэг хийн тэсрэх бөмбөг зэргийг худалдан авахаар тендер зарласан юм.

Харин хүний эрхийг хамгаалагч бүлгүүд Бахрейний эрх баригчид энэ бүхнийг босогчдын эсрэг хэрэглэхээр завдаж буйг анхаарууллаа. Арабын Бахрейн улсад сүүлийн үед хаант засгийг эсэргүүцсэн жагсаал болох нь эрс нэмэгдсэн. Цэрэг, цагдаагийн хүчээр жагсаал цуглаануудыг тараасаар байгаа юм. 2011 оноос эхлэлтэй Арабын хавар Бахрейнд ч бас нөлөөлсөн нь энэ юм. Босогчдын эсрэг хүч хэрэглэсний улмаас 2011 оны 2-р сараас хойш 80 орчим хүн нас барсан гэж тус улсын сөрөг хүчин мэдээлдэг. Харин Бахрейний эрх баригчид харьцангуй бага тоо хэлдэг юм. Тус улсын хүн амын олонхийг Шийтүүд бүрдүүлдэг. Иймд тэд улс орныг удирдах бүх эрх мэдлийг гартаа төвлөрүүлсэн Сүннит гэр бүлээс томоохон хэмжээний өөрчлөлт шинэчлэлт хийхийг шаардаж байна.

АНУ-д төвтэй Хүний эрхийг хамгаалагч эмч нар байгууллага Бахрейнд бослогын үеэр нас барсан иргэдийн 39 нь нулимс асгаруулагч хийнд хордсон гэж мэдээлжээ. Битүү барилга байшин руу нулимс асгаруулагч хий цацсанаас олон тооны хүн хараагүй болж, амьсгалын замын өвчин болон цус багадалтад өртөн нас баржээ. Мөн хийн сав иргэдийн толгой, биед ч томоохон гэмтэл учруулдаг байна.

АНУ өнгөрсөн онд Бахрейнд нулимс асгаруулагч хий экспортлохыг хориглосон. Иймд тус улс Бахрейний Дотоод хэргийн яамнаас зарласан тендерийг эсэргүүцэж байгаагаа нээлттэй илэрхийлэхийг АНУ-д төвтэй Хүний эрхийг хамгаалагч эмч нар байгууллага шаардаж байгаа юм байна.

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.