Ононгийн эхийн лицензийг цуцал, ард нь асар том авлигал, албан тушаалын сүлжээ бий

Twitter Print
2020 оны 05-р сар 03-нд 18:58 цагт
Мэдээний зураг,

Ононгийн эхийн лицензийг цуцал. Яг Салхит шиг. Ард нь асар том авлигал, албан тушаалын сүлжээ бий. 

ОНОНГИЙН ЭХИЙГ ОНГИЧИЖ БУЙ “САМРЫН КОНТРБАНД”-ЫН ГЭМТ ХЭРЭГТНҮҮД ОЛОН УЛСЫН АРБИТРЫН ШҮҮХЭД ХАНДАНА ГЭЖ АЙЛГАСАН ГЭНЭ ҮҮ. 

Анхнаасаа хууль зөрчиж олгосон лицензийг цуцалж, голын эхээ тусгай хамгаалалтад авахад ямар ч асуудалгүйг батлах баримтуудыг хүргэж байна.

Баримт-1: Хуулиар хориглосон газарт лиценз олгожээ.

Ононгийн эх “Гутайн даваа” нь ойн сан, усны эх бүрэлдэх газар. Энд “Гутайн даваа“ хэмээх компанид 2015.08.13-ны өдөр АМГ-аас Ашиглалтын лиценз олгосон. Мөн оныхоо 10-р сард “Гутайн алтны үндсэн ордыг далд аргаар ашиглаж, уусгалтын аргаар баяжуулах үйлдвэрийн ТЭЗҮ”-г баталжээ. Гэтэл Монгол улс 2009 онд “Урт нэртэй хууль”-иар ойн сан, усны сав газарт лиценз олгохыг хориглосон. Хуулиар хориотой газарт хууль зөрчин Ашиглалтын лиценз авангуутаа “Гутайн даваа” компанийхаа нэрийг “Пегматит майнинг” болгон өөрчилсөн билээ.

Баасанжавын Отгон-н зураг.

Баримт -2: Лиценз “самрын контрбанд” гэмт хэрэгт холбогдогсдын гарт оржээ.

“Пегматит майнинг“ компаний 51 хувийг Довчингийн Ганхуяг гэгч Эрүүгийн гэмт хэргээр шалгагдаж байгаа нэгэн эзэмшиж байна. 4 жилийн өмнө ЭЦГ-аас Довчингийн Ганхуягийг бусадтай бүлэглэн их хэмжээний хуш модны самрын идээг хуурамч бичиг баримтаар гаалийн бүрдүүлэлт хийж Замын үүдийн боомтоор удаа дараалан экспортолсон гэх хэрэгт сэжигтнээр саатуулж байжээ. Д.Ганхуягийн эхнэр С.Ариунзаяагийн “Эм Ди глобал трейдинг” компани нь 2016 оны 3-р сард Замын–Үүд боомтоор хуурамч бичиг баримтаар 133 тн буюу 2 вагон самрын идээ экспортлох гэж байгаад Замын-Үүдэд саатуулагдсан. Хураагдсан 2 вагоныг лацдан Улаанбаатарт авчирсан ч гаалийн хяналтын талбайгаас С.Ариунзаяа болон хадам ах Д.Ганболд нар хулгайлж Толгойтод аваачиж, самрын идээг нь өөрсдийн агуулахад хийсэн. 

Хураагдсан самрын идээг БОАЖЯ-аас дуудлага худалдаа зарлан 2 компанид 2.6 тэрбумаар зарахаар шийдвэрлэсэн ч тэд хамгаалалт хөлслөн хүч хэрэглэснээр өгөлгүй авч үлдэж чаджээ. Энэ үйлдэлдээ эрүүгийн алдартай гэмт хэрэгтнүүдийг ашигласан гэдэг. Дараа нь хууль хяналтынханы тавьсан лацыг хөндөн уг самрын идээг хулгайлан ор сураггүй болгосон түүхтэй. Энэ үйлдэлд Довчингийн Ганболд, С.Ариунзаяа нар яллагдагчаар татагдаж ЭХ-ын тусгай ангийн 260.1-ээр зүйлчлүүлж байсан ч хэргийг янз бүрийн аргаар завхаруулсаар өнөөдрийг хүргэсэн юм. Хэрэгт холбогдогчдын өгсөн мэдүүлгээс тэд самар авах мөнгөө Хятадуудаас авдаг, хууль бусаар хил давуулахын тулд төрийн албан хаагчдад авлигал өгдөг байснаа ярьсан байдаг.

Баасанжавын Отгон-н зураг.

Баримт-3: Хориотой газарт лиценз авахын тулд БОАЖЯ-ны албан тушаалтнуудыг ашиглажээ.

Довчингийн Ганхуяг, түүний эхнэр С.Ариунзаяагийн компаниуд тус тусдаа БОАЖЯ-наас авдаг самар экспортлох тусгай зөвшөөрөлтэй. Олон жил Хятадуудтай хамтран самрын бизнес эрхлэхдээ БОАЖ яамныхантай салшгүй холбогджээ. БОАЖЯ-д Төрийн захиргаа удирдлагын газрын орлогч хийж байсан Ховдын уугуул Нэргүйн Баатарнямыг “Пегматит майнинг“-ийн гүйцэтгэх захирал болголоо. Дараа нь ”Пегматит майнинг” компаний лиценз нь ойн сантай давхцалтай ч ашиглалтын лиценз олгоход татгалзах зүйлгүй гэсэн бичгийг яамнаас Ховдын засаг дарга асан, БОАЖЯ-ын Байгалийн нөөц, Хүрээлэн буй орчны газрын дарга Г.Нямдаваа АМГ-руу явуулснаар Ашиглалтын лиценз олгосон түүхтэй.

Баасанжавын Отгон-н зураг.

БАРИМТ-4: “ПЕГМАТИТ МАЙНИНГ” КОМПАНИД ЛИЦЕНЗ ОЛГОХЫН ТУЛД БҮТЭН ГОЛЫГ МЭДЭЭЛЛИЙН САНД БАЙХГҮЙ ГЭЖ МЭДҮҮЛЛЭЭ.

“Пегматит майнинг” компаний лиценз нь зөвхөн ойн сан биш усны эх бүрэлдэх газар. Лицензийн талбай дундуур урсч буй Шургадагийн голыг Монгол улсын голын мэдээллийн санд байхгүй гэсэн бичиг БОАЖЯ–ынхан хийж өгчээ. Холбогдох хүмүүсийг газар дээр нь очиж үзүүлж байж Шургадагийн голоо усны мэдээллийн санд бүртгүүлжээ. Гэвч Шургадагийн голыг байхгүй гэж олгосон ашиглалтын лиценз нь өнөөдөр хүчинтэй хэвээр. 2007, 2011 оны усны тооллогод бүртгэгдэж, цагаан дээр хараар “устай” гэх бичигдсэн Шургадагийн гол байгааг БОАЖЯ-ныхан мэдсээр байж лиценз олгохдоо нуун дарагдуулжээ.

БАРИМТ – 5: АЛТТАЙ ШОРОО ХУЛГАЙЛАН УЛААНБААТАР ХҮРТЭЛ ТЭЭВЭРЛЭЖЭЭ.

“Пегматит майнинг” компани өнгөрсөн жилээс эхлэн удаа дараалан уурхайгаас хулгайгаар шороо ачин Улаанбаатар хотын чиглэлд зөөх болжээ. Саатуулаад шалгах гэхээр шороо ачсан чингэлэгийнхээ амыг буруу харуулаад аччихдаг. Хамгийн сүүлд гэхэд тус компаний шороо ачсан машин Багануур дүүрэгт журамлагджээ. Бүтэн 2 вагон самар хулгайлж, үгүй хийдэг хүмүүст ч ачаатай машин алга болгох нь алга урвуулахын төдий зүйл юм.

Баримт -6: НУТГИЙН ИРГЭДЭД ТЭРБУМ ТӨГРӨГ АМЛАН ХУУРАН МЭХЭЛЖЭЭ.

“Пегматит майнинг” компани нь алтны үндсэн орд ашиглахдаа маш олон төрлийн химийн бодис ашиглахаар төлөвлөжээ. Онон голын сав газарт цианит натри ашиглан алт баяжуулвал Онон голын сав дагуу амьдарч байгаа 6 сумын 17000 хүний эрүүл аюулгүй орчинд амьдрах эрх, ирээдүйн амжиргаад сөргөөр нөлөөлөх учраас нутгийн иргэд эсэрүүцжээ. Гэтэл тэд баяжмалаа энд угаахгүй ачиж яваад Сэлэнгийн Бороо гоулд эсвэл Төв аймгийн Жаргалтантын Тэнхун, сүүлдээ Багхангай дүүрэгт баяжмалын үйлдвэр барьж боловсруулна гэж төөрөгдүүлсээр... Эцэстээ уурхайнхаа ойролцоо Онон голын сав газарт угаах нь тодорхой болсон байна.

Багийн иргэдийн нийтийн хурлаас лицензээ дэмжүүлэхийн тулд ТУЗ ийн дарга Довчингийн Ганхуяг өөрийн биеэр очиж Онон багийн дансанд 1 тэрбум төгрөг байршуулна. Жилийн 10 сая төгрөгийн хүүгээр нь багийнхаа асуудлыг шийд хэмээн хууран мэхэлж иргэдийн саналыг авчээ.

Баримт-7: Иргэдийн гарын үсгийг ашиглан, алт ухуулахыг дэмжиж байна гэсэн бичиг яам руу илгээжээ.

Гутайн даваа орчмыг улсын тусгай хамгаалалтад авах шийдвэр засгийн газарт гарсны дараахан өнгөрсөн намар БОАЖЯ , Уул уурхайн яаманд Батширээт сумын иргэдийн санал гэсэн нэгэн бичиг иржээ. Уг бичигт нутгийн иргэд нь “Пегматит майнин”-г компаний лицензтэй талбайг улсын тусгай хамгаалалтад авахыг эсэргүүцэж байгаа талаар дурджээ. Энэ дунд нь Гутайн даваа болон Онон голын эхэнд баяжуулах үйлдвэр барьж байгуулахыг эсэргүүцсэн иргэдийн гарын үсгүүд ч байлаа. “Пегматит майнинг” нутгийн иргэдийг ахуйн чанартай хүсэлт гуйлтаар барьцаалж, регистийн дугаар, гарын үсгийг нь авч үлдэнгүүтээ түүнийгээ өөрсдийнх нь эсрэг ашигласан байна.

БАРИМТ- 8: ГУТАЙН ДАВААГ УЛСЫН ТУСГАЙ ХАМГААЛАЛТАД АВАХ ҮНДЭСЛЭЛ

Гутайн даваа орчмоос нийт 27 гол эх авч байгаа нь Монголын төдийгүй дэлхийн цэнгэг усны үнэ цэнэтэй эх сурвалж юм. Энэ газар нь битүү ойн сан. Ойн сан нь гол мөрний ус, чийгийн горимыг тогтвортой барьж, зохицуулснаар экологийн тэнцвэрт байдлыг хангаад зогсохгүй зөвхөн энэ газраас жилдээ 5 тэрбум тонн цэвэр хүчилтөрөгч ялгаруулж агаар цэвэршүүж байна. Ховор ургамлын өлгий. Энэ газар 260 зүйл ургамал бүртгэгдснээс 19 нь ховор, 15 нь нэн ховор ургамал. Эмийн болон ашигт ургамал нь нийт ургамлын зүйлийн 31% эзэлж байна. Мөн ховордож буй хандгай, халиун буга, баавгай, бор гөрөөс, зэрлэг гахай зэрэг хөхтөн амьтдын чухал орогнол, нүүдлийн коридор нутаг. Энд уурхай ашигласнаар Монгол улсын эко системд нөхөж баршгүй хохирол учирна.

Онон голын эхийг тусгай хамгаалалтад авахыг эсэргүүцэж Олон улсын Арбитрын шүүхэд хандана гэж сүрдүүлж буй компаний ард ийм л хууль бус зүйлүүд бий. Илт хууль бусыг нь мэдсээр байж компаний талд үйлчлэх гишүүн байхгүй гэдэгт итгэлтэй байна. Эрхэм гишүүд мэдээлэлтэй байж, нутаг орноо хамгаалж үлдэнэ биз ээ.

Сэтгүүлч Б.Отгон

2020.05.03

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.