Уулын оргилоос уруудаж явахад, хаанаас чухам эх авсан юм бэ бүү мэд, их холын улбаатай байж мэдэх газрын чийг, агь ганга, хээр талын цэцгийнх ч байж мэдэх тийм нэг барим тавим хэлж боломгүй анхилам үнэр зөөлөн сэвшээ салхины үзүүрээс үес үесхэн нөөлөглөн ирж ханхийнэ. Ийм үнэр -энэ хацар ирвэгэнүүлж, хамар цоргисон ч гэхэд хаашаа юм бэ, энэ үнэр миний алхаж яваа эндэх хангайнх уу, аль тэртээх манай нутгийнх уу, хэлж мэдэхгүй, хачин таатай.
Уулын оргилоос уруудаж явахад, модод бутдын хаахна чухам бөмбөгнөлдөөд байгаа нь тэр бүр тэмдэгтэй мэдэгдэхгүй хэр нь “Би жаргалтай байна, би жаргалтай”, “Чи жаргалтай байна уу, чи жаргалтай байна уу?” хэмээн жив жув хийлдэн, жиргэж шившилдэх болжмор шувуудын шулганааныг олон олон он жил олж сонссон хэр нь одоо л анх дуулж байгаа мэт цаанаа нэг сонсголонтой, соньхон содон.
Уулын оргилоос уруудаж явахад, аль хэдийнээс хойш тэртээ доороос дуу нь цуурайтаж хадаад байсан хэсэг хүмүүс одоо нэгэнт угтаад иржээ. Арван зургаа долоотой л болов уу гэмээр тэдгээр охид хөвгүүд нэг дороо бөөгнөрч, энд цугтаа аялж яваадаа сэтгэл нь хөөрч, чанга чангаар ярилцана, шалтагтай шалтаггүй хөхрөлдөнө, түүнийг нь бахдах мэт уулын модод дамжуулан цуурайлна. Намайг тэд анзаарах ч сөхөөгүй. Хажуугаар салхи татуулан зөрж өнгөрсөн мөнөөх залуусын хойноос хараа татагдан, эргэж анзаарвал ойр тойрд алга, тэртээ дээр хэдийнээ гарчээ. Ийм амархан уу, тийм төлөөгүй юү хэмээн асуумаар.
Уулын оргилоос уруудаж явахад, хэдхэн өдрийн өмнө газрын энгээр бөмбийтөл хучаатай байсан мөнөөх хунгар хунгар цас өнөө хэдийнээ хар тарлантан цоохортжээ. “Үгүй ер, шөнөдөө тэгж хүйтрээд байхад шүү” хэмээн энэ жил л би анх улирлын жамыг ухаарч байгаа идэр нэгэн мэт уулгалан боджээ. “Тийм дээ, тийм”, “Үгүй дээ, үгүй” гэсэн бодол эргэцэж зэрэгцсээр бүр сүүлдээ, “Тийм дээ, тийм хаврын урь унахаар юухан байх вэ дээ, ямар ч уул овоо шиг их цас ч дорхноо л хайлна, төдхөн дороос нь хэнзхэн яргуй соёолно. Залуу нас ч мөн л адилхан, ийм л байдаг, тийм л жамтай” хэмээн номхрон бодов.
Түрэн түрхэрсээр хавар иржээ.
До.Чулуунбаатар
Энэ мэдээ танд таалагдаж байвал LIKE хийгээрэй. Танд баярлалаа.
