Оросын агаарын нисэх хүчний хоёр бааз дээр дэлбэрэлт болжээ

Оросын агаарын нисэх хүчний хоёр бааз дээр шалтгаан тодорхой бус дэлбэрэлт болжээ. Оросын хэвлэл мэдээллийн хэрэгслүүдийн мэдээлж байгаагаар мөн нийгмийн сүлжээнд нийтлэгдсэн дүрс бичлэгээс харахад дэлбэрэлт өнгөрсөн даваа гарагийн өглөө Саратов мужид байрлах Энгельс-2 агаарын нисэх хүчний бааз дээр болсон нь тодорхой байна.

Тус баазад Украины хотуудад цохилт үзүүлэхэд ашиглаж байгаа Ту-95 бөмбөгдөгч онгоцнууд байрлаж байжээ. Бас нэг дэлбэрэлт нь Москва хотоос 240 км хүрэхгүй зайд байрлах Рязань хотын дэргэдэх нисэх хүчний баазад болсон ба дэлбэрэлтэнд шатахуун зөөвөрлөдөг ачааны машин өртсөний улмаас 3 хүн амиа алдаж, 5 хүн шархджээ.

Тус нисэх хүчний бааз дээр мөн л Ту-95, Ту-22 алсын зайн бөмбөгдөгч онгоцнууд байрладаг аж.

Дээрх хоёр дэлбэрэлтийн шалтгаан одоогоор тодорхойгүй байгаа ч Оросын зарим хэвлэл мэдээллийн хэрэгслүүдэд бичсэнээр Энгельс-2 бааз тэнэмэл пуужинд оногдсон, мөн дэлбэрэлтийн улмаас цөмийн зэвсэгт тээвэрлэх хүчин чадалтай Ту-95 загварын хоёр онгоц устсан гэжээ.

ОХУ-ын Ерөнхийлөгч Владимир Путинд уг хэрэг явдлын талаар мэдэгдсэн ба Саратов мужийн удирдлагуудын мэдээлснээр аюулгүй байдлын албаныхан Энгельс-2 нисэх хүчний бааз дээр болсон дэлбэрэлтийн шалтгааныг мөрдөн шалгаж эхэлжээ.

Украины зүгээс өнгөрсөн долоо хоногт ОХУ Украинд дахин цохилт үзүүлэхдээ бэлдэн Энгельс-2 бааз руу пуужингууд тээвэрлэж, Рязань дахь баазад бөмбөгдөгч онгоцнуудаа төвлөрүүлж байгаа тухай мэдээлсэн билээ.

Дээрх хоёр баазад гарсан дэлбэрэлтэд Киев буруутай эсэх нь тодорхойгүй байгаа ч тус улс алсын зайн байг онох хүчин чадал бүхий зэвсэг бүтээж байгаа тухай мэдээлж байсан билээ.

Эх сурвалж: The Guardian

Содномцэрэнгийн Энхзаяа

mongolcom.mn

 

 

 

Энэ мэдээ танд таалагдаж байвал LIKE хийгээрэй. Танд баярлалаа.