Монгол улсын ерөнхий сайд Н.Алтанхуяг: Зохион бүтээгч залуучууд нэгдэж амжилтанд хүрэх цаг нь болсон

Twitter Print
2014 оны 05-р сар 15-нд 15:02 цагт
Мэдээний зураг,

Өнөөдөр Монгол Улсын ерөнхий сайд Н.Алтанхуяг МҮНОРТ-ээс зохион байгуулдаг “Залуу зохион бүтээгч” уралдаанд шалгарсан шилдэг 37 бүтээлийг үзэж сонирхлоо. Н.Алтанхуяг сайд дээрх бүтээлүүдтэй танилцаад цаашид дэмжиж ажиллахаа мэдэгдсэн юм.

Тэрээр “Энэ уралдааныг үе үеийн Ерөнхий сайдууд дэмжиж ирсэн. Миний бие мөн адил дэмжиж, хамтран ажиллаж байгаадаа баяртай байна. Ноднин хүүхэд залуучуудынхаа бүтээлийг үзэж байсан. Шинэ санаа, шинэлэг бүтээл ихийг хийсэн байна лээ. Өнөө жил ч хүний амьдралд ойрхон, хэрэглэхэд хялбар шинэ бүтээлүүд их хийсэн байна” гэв.

“Залуу зохион бүтээгч” уралдаан нь дөрөв дэх жилдээ зохион байгуулагдаж байгаа юм. Энэ хугацаанд давхардсан тоогоор 4500 зохион бүтээгч өөрсдийн бүтээлээрээ оролцсон байна.

Оролцогчдын хувьд хийсэн бүтээлээ олонд таниулах, оюуны өмчийн газраар баталгаажуулах тал дээр хүндрэл учирдаг байж. Харин энэ жилээс залуучуудын бүтээлийг сурталчлах, оюуны өмчийн газраас гэрчилгээ авах зэрэгт зохион байгуулагчид их анхаарч байгаа аж. Үүний үр дүнд өнгөрсөн дөрвөн жилийн хугацаанд бүтээгдсэн 38 бүтээл үйлдвэрлэлд нэвтэрч, оюуны өмчийн газраас гэрчилгээ аваад байгаа гэнэ. “Залуу зохион бүтээгч” уралдаанд дунд сургуулийн сурагчид өргөнөөр оролцдог. Тэдгээр авъяаслаг хүүхдүүдийн дундаас 20 гаруй сурагч МУИС, ШУТИС, ХААИС-д урилгаар суралцах эрхээр шагнуулжээ.

2014 оны хувьд “Залуу зохион бүтээгч” уралдаанд 21 аймгийн төлөөлөл оролцсон нь энэ наадмын цар хүрээ хэрхэн өргөжин тэлснийг нь харуулж байна хэмээн Монгол Улсын ерөнхий сайд Н.Алтанхуяг онцолсон юм.

Энэ үеэр “Залуу зохион бүтээгч” уралдааны шилдэг 37 бүтээлийн нэгээр шалгарсан бага оврын тракторт суурилуулсан "малын өтөг цэвэрлэж ачих, цас малтаж бэлчээр гаргах төхөөрөмж” бүтээсэн Булган аймгийн Булган сумын “Эрдмийн өргөө” цогцолбор сургуулийн 10-р ангийн сурагч Р.Авирмэдтэй уулзаж бүтээлийг  нь сонирхсон юм.

-Өөрийнхөө бүтээлийн талаар товч танилцуулахгүй юу?

-Миний бүтээл хөдөөний малтай айлд зориулагдсан. Малын хотонд өтөг, цас, шавхай шалбааг цэвэрлэх төхөөрөмж байгаа юм.

-Малчин айлуудын өдөр тутмын хэрэглээнд ашиглахад ямар тустай вэ?

-Би өөрөө малчин айлын хүүхэд. Өдөр бүр малын хотонд өтөг бууц, цас, шавар шавхайг гараар, хүрзээр цэвэрлэх хүндрэлтэй байдаг. Харин энэ төхөөрөмжийг санаачлан хийснээр цаг хугацаа хэмнэж, ажил хөнгөвчлөхөд их тустай. Малчин айлуудад байж байхад хэрэгтэй төхөөрөмж болсон гэж бодож байна.

-Ажиллах хүчин чадлын хувьд?

-Энэ төхөөрөмж 1000 хонины хашааг хоёр цаг цэвэрлэдэг. Хэрэв гараар цэвэрлэх юм бол өдөржин цэвэрлэх болно.

-Үүнийг бүтээх санаагаа яаж олсон бэ?

-Би өөрөө санаачилсан. Тэгээд ах нартайгаа хамтраад энэ төхөөрөмжийг хийсэн. Малын хот цэвэрлэхэд их хүндрэлтэй, цаг их ордог болохоор яаж хөнгөвчилж болох вэ гэж бодож энэ санааг олсон.

-Хичнээн төгрөгийн зардал гарсан бэ?

-Трактор нь Монголд их байгаа. Гэхдээ яг ийм төхөөрөмж болгож хийвэл төмөр худалдаж аваад, урд ковш нь 500-600 мянга, хойд малтуур 300 мянган төгрөгөөр босох боломжтой. Би ч тийм л зардлаар хийсэн.  

-Нэг ийм төхөөрөмж хийхэд хэр хугацаа шаардах вэ?

-Бүх сэлбэг хэрэгслээ цуглуулаад угсрахад 20 хоног болж байсан.

Сэтгүүлч М.Золбаатар

E-mail: mongolcom.mn@gmail.com
Утас: 76110303, 76110505

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.