А. Навальныйг хорих ангийн эмнэлэгт хэвтүүлжээ

Twitter Print
2021 оны 04-р сар 20-нд 13:41 цагт
Мэдээний зураг,

Оросын сөрөг хүчний тэргүүн Алексей Навальныйг Владимир хотын засан хүмүүжүүлэх 3-р төвийн эмнэлэгт шилжүүлжээ. Тэрээр хорих ангийн удирдлагууд түүний биеийн байдал муудаж байгаа тухай гомдлыг удаа дараа хүлээж аваагүйг эсэргүүцэн өнгөрсөн сарын 31-нээс хойш өлсгөлөн зарлаад байсан юм.

А. Навальныйгийн өмгөөлөгч Алексей Липцерийн мэдээлснээр Владимир хотын Засан хүмүүжүүлэх 3-р төвийн эмнэлэгт хэвтэж буй А. Навальныйгийн биеийн байдал тааруу байгаа ба хорих ангийн удирдлагууд А. Навальныйгийн эмчлэгч эмчдээ үзүүлэх хүсэлтийг хүлээн аваагүй байна. Алексей Липцер, "Өмнө нь биед нь илэрч байсан зовууриуд нь бүгд арилаагүй хэвээр байна. Гар хөл нь бадайрч, мэдээ алдах, нуруу нь өвдөх шинж тэмдгүүд нь байсаар л байна. Биеийн байдал нь улам л дордож байна." хэмээн Ройтерс агентлагт өгсөн ярилцлагадаа онцолжээ.

Нөгөө талаас ОХУ-ын Шүүхийн шийдвэр гүйцэтгэх газраас мэдээлснээр 44 настай А. Навальныйгийн биеийн байдал "сайн" байгаа ба А. Навальныйд өөрийнх нь зөвшөөрсний дагуу" амин дэмийн эмчилгээ" хийж байгаа гэжээ. Харин Кремлийн зүгээс А. Навальныйгийн биеийн байдлын тухай мэдэхгүй, хоригдлуудын эрүүл мэндийн байдлыг хянах нь ОХУ-ын Ерөнхийлөгч Владимир Путины үүрэг биш хэмээн мэдэгджээ. А. Навальныйгийн өмгөөлөгчийн хэлж байгаагаар түүнийг А. Навальныйтэй уулзуулахаасаа өмнө хорих ангийн хамгаалагч нар 2 цагийн турш нэгжжээ. Түүнээс гадна А. Навальный маш ихээр турж, ядарч туйлдсан харагдсан гэжээ. А. Навальныйгийн үүсгэн байгуулсан Авлигын эсрэг сангийн тэргүүн Иван Жданов өөрийн твиттер хуудаснаа А. Навальныйг эмнэлэгт хэвтүүлсэн нь түүний биеийн байдал муудсаныг "тамлан зовоогчид" нь хүртэл хүлээн зөвшөөрсөн явдал юм хэмээн бичсэн байна.

Сөрөг хүчний тэргүүн А. Навальныйг дэмжигчид ирэх лхагва гарагт Оросын бүх хотуудад эсэргүүцлийн жагсаал цуглаан зохион байгуулахаар төлөвлөж байгаагаа мэдэгджээ Харин Оросын эрх баригчид эсэргүүцлийн жагсаал цуглаан нь хууль бус учраас иргэдийг дээрх жагсаал цуглаанд нэгдэхгүй байхыг анхааруулжээ. Өнгөрсөн ням гарагт АНУ-ын Үндэсний аюулгүй байдлын зөвлөх Жейк Салливан ОХУ-ын сөрөг хүчний тэргүүн Алексей Навальный хорих ангид нас барвал Оросын эрх баригчдад хариуцлага тооцно хэмээн анхааруулсан бол Кремлийн хэвлэлийн нарийн бичгийн дарга Дмитрий Песков, "Оросын нутаг дэвсгэр дээр ял авч, хоригдож буй иргэдийн эрүүл мэндийн асуудал нь бусад улс орнуудын хэлэлцэх сэдэв биш." хэмээн хариулжээ.

Эх сурвалж: Reuters

Орчуулсан: Содномцэрэнгийн Энхзаяа

mongolcom.mn

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.