Х.Баттулга чөлөөлөгдөх нь тодорхой болжээ

Twitter Print
2014 оны 05-р сар 14-нд 13:57 цагт
Мэдээний зураг,

Засгийн газрын гишүүнийг чөлөөлөх тухай УИХ-ын тогтоолын төслийг өчигдөр орой Засгийн газраас УИХ-ын даргад өргөн мэдүүлжээ. Тодруулбал, өөрийн хүсэлтээр сайдаасаа чөлөөлөгдөх хүсэлт гаргасан Үйлдвэр, хөдөө аж ахуйн сайд Х.Баттулгыг сайдаас нь чөлөөлөх талаар Засгийн газар саналаа хүргүүлсэн байна.

Засгийн газраас ирүүлсэн тогтоолын төсөлд, "Засгийн газрын гишүүнийг чөлөөлөх тухай УИХ-ын тогтоолын төслийг Үндсэн хуулийн 39 дүгээр зүйлийн 2 дахь хэсэг, Монгол Улсын Засгийн газрын тухай хуулийн 23 дугаар зүйлийн 1.1-т заасны дагуу УИХ-д өргөн мэдүүлж байна. УИХ-ын чуулганаар хэлэлцэж өгнө үү” гэжээ. Ингэхдээ Х.Баттулга сайдыг Засгийн газрын гишүүнээс нь чөлөөлсүгэй гэсэн тогтоолыг хавсаргажээ. Засгийн газрын энэхүү хүсэлтийг Ерөнхийлөгчтэй зөвшилцөж, улмаар УИХ-аар хэлэлцэн шийдвэрлэх юм.  

Ямартай ч Үйлдвэр, хөдөө аж ахуйн сайд Х.Баттулгын амны уншлага болсон “Дорвитой бүтээн байгуулалтын ажилд чөдөр, тушаа болсон Алтанхуягтай хамтран ажиллаж чадахгүй” гэдэг үгний хариу ийнхүү тун удахгүй шийдэгдэх бололтой. Төмөр замын бүтээн байгуулалтын ажилд Х.Баттулгын баримталдаг зарчим тун тодорхой. Тэрээр “Яадаг ч байсан өргөн царигтай төмөр зам тавина. Нарийн төмөр зам тавьчихвал нэг л өдөр хятадууд танкаа ачаад ороод ирнэ” хэмээн ил, далд тунхаглаж явдгийг бас ч гэж ор тас анзаарахгүй хаяж боломгүй. Гэтэл яаж ч болохгүй мөнхийн хөрш Хятад руу нарийн царигтай төмөр замаар холбогдож нүүрс, зэсийн баяжмал, төмрийн хүдэрээ зөөхөөс өөр сонголт Монгол Улсад алга. Хятадууд танкаа ачаад ороод ирнэ хэмээн төсөөллийн дайн тархи толгойдоо өрнүүлж суух хойгуур ОХУ, БНХАУ-руу хий дамжуулах асар том хоолой мөдхөн барих гэж байна. Хэрвээ энэ аварга хоолой баригдчивал Монголын говийн нүүрс улам л үнэ цэнээ алдах нь тодорхой.

Нөгөөтэйгүүр Х.Баттулга саяхан хэвлэлд өгсөн ярилцлагадаа “Надад Ерөнхий сайд болох хүсэл байхгүй” гэжээ. Тэгвэл Ерөнхий сайд болох гэж хоёр ч Засгийн газар дамжин хэрүүл хийж, хэрэг тарьж яваа нь чухам хэн болж таарах нь вэ. Аль эсвэл С.Баярын толгойлсон “стандарт бус” Засгийн газрын үед Шадар сайд байхдаа одоогийн Ерөнхий сайд Н.Алтанхуяг  Зам тээвэр, барилга хот байгуулалтын сайдаар ажиллаж байсан Х.Баттулгыг дарамталж зүүн тийш чиглэсэн төмөр замынх нь ажлыг боомилоод байсан хэрэг үү.

Гэтэл УИХ-ын гишүүн Ц.Нямдорж болохоор “Х.Баттулга хувийн дуусашгүй шунал, өчүүхэн атаархлаар улсын ажил хорлоод яваа хүн. Төмөр замыг хоёр жилийн дотор барьчихна гэж амлалт өгсөн хүн нь одоо төрийн ажлыг хорлоод байхад энэ хүнийг цаашид байлгаад байх хэрэггүй.Төмөр замаар ямар луйвар, будлиан хийгдсэнийг нэг бүрчлэн мэднэ. Хэнд ч хэрэггүй далан шороо ухаад 50 тэрбум төгрөгийг шороонд булсан. Энэ бол хариуцлагагүй үйл ажиллагаа бус цэвэр хорлон сүйтгэх үйл ажиллагаа” гэж шулуухан мэдэгдээд байдаг. Хэдийгээр өнөөдөр Үйлдвэр, хөдөө аж ахуйн сайдын үүрэг гүйцэтгэж байгаа ч цаагуураа Зам, тээврийн яамыг ч зааж зааварчлан чиглүүлж байгаа гэдгийг Ц.Нямдорж хэлээд авсан. Ийм л нэг сайд сайн дураараа ажлаа өгөх хүсэлт гаргаж тэрийг нь УИХ ёсчлон гүйцэлдүүлэх нь тодорхой болж байна. Харин түүний тушаал шийдвэрээр зүүн тийш чиглэсэн төмөр замын далангийн ажил нэрээр шороонд булсан 50 орчим тэрбум төгрөгийн асуудлыг чухам хэнтэй ярьж, тооцоо бодох ёстой вэ.

Мөн түүнчлэн түүний бие хамгаалагч, туслахаар ажиллаж байсан одоо Зам тээврийн яамны Төрийн нарийн бичгийн дарга Б.Батзаяа “Монголын төмөр зам” компаний Ерөнхий захирлаар ажиллаж байхдаа БНХАУ-ын  “China CNP Corporation limited” корпорациас нийт  60 сая ам.доллараар зургаан зүтгүүр худалдан авсан нь ашиглагдах боломжгүй, стандартын шаардлага хангахгүй гэсэн дүгнэлтийг “Улаанбаатар төмөр зам” компани гаргасан бөгөөд  60 сая ам. долларын уг хөрөнгө өдгөө Төмөр замын зүтгүүрийн “ДЕПО”-гийн хашаанд хог болоод хэвтэж байгаа дуулдсан. Бие хамгаалагчаас агентлагийн захирал болж суга дэвшсэн Б.Батзаяагийн тарьсан хэргийг Эрүүгийн хэрэг үүсгэн шалгах үндэслэл байгааг цагдаагаас мэдээлсэн. Тэгвэл Монгол Улсын зам тээврийн салбарыг чимээгүйхэн гартаа базчихаад сууж байгаа Х.Баттулга сайд тэрхүү будлианы талаар ямар бодолтой явдгийг асууж тодруулахад ч буруудах зүйлгүй.

Д.Энхтүвшин

Сэтгүүлч Д.Энхтүвшин

E-mail: mongolcom.mn@gmail.com
Утас: 76110303, 76110505

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.
    • BATZAYA

      (202.21.106.105) 2014-05-14 14:16
      • 0
      • 0

      battulga BATZAYAGIIN ene uildeliig tailbarlah ystoi gej bodoj baina

      Хариулах