Х.Тэмүүжиний үнэт ба үнэгүй зүйл

Twitter Print
2014 оны 05-р сар 13-нд 17:41 цагт
Мэдээний зураг,

Тэртэй тэргүй хоёрдмол, гуравдмал, бүр олдмол гажиг хав шинж төгс бүрдсэн өнөөдрийн Монголын улстөрд Хууль зүйн сайд Х.Тэмүүжин бас л нэг дуулианы эзнээр тодроод жил гаруйн хугацаа өнгөрч байна. Уг нь мань эрийн тухайд Ерөнхийлөгч Ц.Элбэгдоржоос эхлээд өнгөрсөн өдрүүдэд “Бид Тэмүүжинтэй хамт” хэмээн хотын гудамж талбайгаар зурагт хуудас барин жагссан өдрийнхөө хөлсөнд 20 мянган төгрөг авч хуушуур, ундаанд зарцуулсан хөдөөний голдуу оюутнуудын тухайд “үнэт зүйл” ихтэй нэгэн. Нөгөөтэйгүүр хууль зүйн салбарт дорвитой шинэчлэл хийхээр зориглосныхоо хувьд тэрээр яалт ч үгүй “үнэт зүйл”-тэй нэгэн. Гэхдээ өдрийн хагаст жагссан болоод 20 мянган төгрөг халаасласан оюутнууд болон тэдний ард сууж байгаа пиарчдыг өдөрт 10 саяар тэтгэж цалинжуулаад байгаа ядуухан хууль зүйн салбарын даржин сайдын тэр “үнэт зүйл” чухам хаанаас тэтгэгдээд байна вэ.

Анх Хууль зүйн сайдаар томилогдоод удаагүй байхдаа “Эрх мэдэлтэй нь хуулиас дээгүүр байх цаг дууссан” хэмээж авлига, хээл хахуульд хамгийн их орооцолддог, Монгол Улсыг хамгийн ихээр муухай харагдуулдаг цагдаа, хууль, шүүхийн байгууллагууд одоо л нэг цэгцрэх нь дээ гэсэн итгэл найдварыг нийгэмд сүүмэлзүүлсэн нь түүний гавьяа мөн. Түүнчлэн Хууль зүйн сайд Х.Тэмүүжин энэ өндөрлөгт урсгалаараа явж байгаад гараад ирээгүй. Тэрээр 2008-2012 онд УИХ-ын гишүүнээр ажиллаж байхдаа Монголд хууль зүйн салбарын шинэчлэл зайлшгүй хийгдэх ёстой талаар хамгийн их ярьсан хүн. Тэр ч утгаараа түүний санаачлан боловсруулсан “Нийтийн албанд нийтийн болон хувийн ашиг сонирхлыг зохицуулах, ашиг сонирхлын зөрчлөөс урьдчилан сэргийлэх тухай хууль” 2012 оны нэгдүгээр сарын 19-ны өдрийн УИХ-ын нэгдсэн чуулганаар батлагдаж байв.

Гэтэл ашиг сонирхлын зөрчлийг нэг нүдээрээ ч хардаггүй эрхэм гишүүн маань 2012 оны хоёрдугаар сарын 17-нд Канад улсад элчин зөвлөхөөр томилогдсон Л.Элдэв-Очир гэгчид өөрийн 15 настай том хүү Т.Бүгүнүтэйг хувийн ашиг сонирхлын үүднээс хэсэгхэн зуур үрчлүүлэхээр хөөцөлдөж эхэлсэн байдаг. УИХ-ын эрхэм гишүүний эрх дархаар далайлгаж хэдэн тийш нь албан бичиг шидээд л 15 настай хүүг үрчлэх асуудал мөн оныхоо долоодугаар сард шийдэгджээ. Чухам энэ хуурамч үрчлэлтээр Х.Тэмүүжиний 15 настай Бүгүнүтэй хүүгийн виз, сургалтын төлбөрөөс чөлөөлөгдөх нөхцөл бүрдэж, Канад улс руу ямар ч саадгүй нэвтэрсэн түүхтэй. Хэдийгээр хүүгийнх нь сурах, боловсрох орчин нөхцөл сайжрах утгаар дээрх “түр зуурын” үрчлэлтийг цагаатгаж болох ч энэ үйлдэлдээ гадаад улсад Монголын эрх ашгийг төлөөлж суугаа төрийн албан хаагчийг татан оролцуулсан нь яалт ч үгүй ашиг сонирхлын зөрчил мөн. Яг энэ тухай түүний санаачилж батлуулсан “Нийтийн албанд нийтийн болон хувийн ашиг сонирхлыг зохицуулах, ашиг сонирхлын зөрчлийн зөрчлөөс урьдчилан сэргийлэх тухай хууль”-ийн 3.1.2-т

“Хувийн ашиг сонирхол гэж нийтийн албан тушаалтан албаны бүрэн эрхээ хэрэгжүүлэхэд өөрөө болон түүнтэй хамаарал бүхий этгээдийн зүгээс нөлөөлж болохуйц эдийн болон эдийн бус ашиг сонирхлыг хэлнэ” гэж тун тодорхой заачихсан байгаа. Монгол Улсын эрх ашгийг гадаадад төлөөлөхөөр томилогдсон төрийн албан хаагчид хүүгээ түр үрчлүүлж, ингэснээрээ тухайн төрийн албан хаагчын нэр дээр хүүгээ улсын мөнгөөр сургах эрх олж авсан нь Хууль зүйн сайд Х.Тэмүүжиний хувьд яах аргагүй “Нийтийн албан тушаалтан албаны бүрэн эрхээ ашиг сонирхлын улмаас хувьдаа ашигласан үйлдэл” болно. Ингэснээрээ хууль зүйн салбарт шинэчлэл хийхээр зүтгэж яваа Х.Тэмүүжин сайдын үнэт зүйл нь хамгийн их зөрчилтэй, үнэгүй зүйл болоод хувирчихаж байгаа юм. Гэр бүл, үр хүүхдийнхээ эрх ашгийг албаны эрх ашгаас дээгүүр тавьсан тэрхүү үйлдлийг нь хойш нь тавиад үнэт зүйлээ үнэгүйдүүлсэн бусад баримттай нь танилцъя. 

2012 оны УИХ-ын сонгуулийн үр дүнгээр байгуулагдсан хамтарсан Засгийн газарт түүнтэй Хууль зүйн сайдын суудлыг булаацалдах зүрхтэй эрхэм байхгүй болтлоо Х.Тэмүүжингийн рейтинг өндөр байсан үе бий. Хууль зүйн сайдаар томилогдоод удаагүй байхдаа “Цензургүй яриа” нэвтрүүлгээр “Миний хууль зүйн сайдаар томилогдсоны гол зорилго нь төрийг цэвэрлэхийн төлөө, шударга ёсыг тогтоохын төлөө юм. Албан тушаал эрх мэдлийг хувьдаа ашиглах бус, эрх мэдлийг нийтийн ашиг сонирхлын төлөө ашигладаг болгоно” гэж чангахан дуугарч байв.

Гэтэл цагдаа, хууль, шүүхийн шинэчлэл хийхээр томилогдсон сайд маань хамгийн гол гар нийлэн ажиллах ёстой ЦЕГ-ын дарга, Бригадын генерал Б.Билэгттэй анхнаасаа л сөргөөцөлдөж, тэр ч байтугай хувийн тааламжгүй харилцаагаа цахим ертөнцөөр ил тод зарлан “Шинэчлэлийг эсэргүүцэж, ардчиллыг өмчлөх гэж оролдох тэр малыг тэвчих арга алга. Новш” хэмээн хараасан нь жирийн иргэдийн “Миний цагдаа намайг хамгаална” гэдэг ойлголт руу ус цацсанаас өөрцгүй хэрэг болсон. Тэртэй тэргүй ард түмний дунд тааруухан байдаг цагдаагийн нэр хүнд Хууль зүйн сайд Х.Тэмүүжиний турхиралтаар шалдаа хүртэл унасан гэж шулуухан дүгнэж болно. Тэрээр хууль зүйн шинэчлэлийг ганцаараа хийж яваа мэт дэндүү дураараа авирлаж, бүх гавьяаг өөртөө нялзааснаар Монголд хууль зүйн шинэчлэл явагдах бус жинхэнэ утгаараа бүтцийн хямрал, салж бутрах эхлэлийг тавьснаас өөр сүйдтэй гавьяа байгуулсангүй. Ерөнхийлөгч Ц.Элбэгдоржийн хэлсэнчлэн “Цагдаа бол түүний цэрэг, тэр өөрөө жанжин” байж чадсангүй. Нарийн яривал Хууль зүй, дотоод хэргийн сайд асан Ц.Нямдоржийн эхлүүлсэн хууль зүйн салбарын шинэчлэлийг ганц хар толгойдоо нялзаахаар зүтгэж цагдаа, шүүх эрх мэдлийн байгууллагынхныг байнга муу хэлж, өөрөөс нь өөр хуульч Монголд байхгүй  юм шиг авирлаад байгааг нь сануулж хэлсэн Ц.Нямдоржид хүртэл “Ирж яваа цагийнхны дууг буцаж яваа цагийнхан дуулдаггүй” юм хэмээн цэцэрхсэн нь ч түүнийг үнэгүйдүүлснээс өөр зүйлгүй.

Түүнийг үнэгүйдүүлж байгаа бас нэг томоохон алдаа нь УИХ-ын бүрэн эрхэд халдан Төрийн тусгай албан хаагчдын эмнэлгийн хөрөнгө оруулалтын зориулалтыг дур мэдэн өөрчлөх шийдвэрийг  2012 оны 11 дүгээр сарын 3-ны өдрийн 122 дугаар тогтоолоор гаргуулж дөнгөсөн явдал юм. Засгийн газрын 122 дугаар тогтоолоор өөрийнх нь хариуцаж байгаа яамны мэдэлд ирсэн эмнэлгийн дотор суурилуулсан  3.2 тэрбум төгрөгийн үнэ бүхий  Имрай /IMR/ аппаратыг ямар ч хамгаалалтгүй орхисноос эвдрэн сүйрч, улсад онц их хэмжээний хохирол учирсан нь өөр хэн ч биш Хууль зүйн сайд Х.Тэмүүжиний алдаа, үнэгүй зүйл мөн. Түүнчлэн цагдаа, хүчний байгууллагуудын удирдлагыг удаа дараа халж, солин цагдаад итгэх ард иргэдийн сэтгэлзүйгээр тоглосоор байгаа нь түүний хамгийн том алдаа юм. Хамгийн сүүлд өөр дээр нь гүйцэтгэх ажиллагаа явуулаагүйг нотолсон Тагнуулын ерөнхий газрын дэд дарга С.Эрдэнийг Ерөнхий сайд Н.Алтанхуяг ажлаас чөлөөлсөн нь ч чухамдаа Хууль зүйн сайд Х.Тэмүүжиний амны алдаанаас үүдэлтэй. Түүний алдаа зөвхөн дээрх баримтуудаар хязгаарлагдахгүй. Одоо бүр эрх баригч АН түүнээс болж хоёр, гурав хуваагдахад хүрээд байна. Эрх баригчдын дотоод хямрал нь ганцхан Х.Тэмүүжингээр тогтохгүй Монгол Улсын Засгийн газрын тогтвортой байх эсэхэд ч нөлөөлж мэдэхээр эгзэгтэй байдал үүсгээд байна. Хэдийгээр Хууль зүйн сайд Х.Тэмүүжин үнэт зүйл ихтэй, залуу хүн хэдий ч түүнийг үнэгүйдүүлж байгаа бие тоох өвчин, алдаа завхрал  нь арай л дэндүү газар авчээ.

Д.Энхтүвшин      

Сэтгүүлч Д.Энхтүвшин

E-mail: mongolcom.mn@gmail.com
Утас: 76110303, 76110505

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.
    • Зочин

      (122.214.0.249) 2014-07-21 13:50
      • 0
      • 0

      Uneheer alban tushaalaa huviin asuudlaa shiidehed ashiglaj bgaa ni unen bol Huuli zuin yamnii said bitgii hel ter shugamiinhaa hariutslagatai ajil hiih erhgui gej bodoj ba.Hogjiltei orond bol iim l asuudal 1 udaa garahad ter hunii ajil amidral barag l duusdag.Saitar shalgaj agadlaad hurteh huuli durmeeree l hariutslaga huleeh l yostoi tegj baij irgen bur huuli durmee bieluuldeg tiim niigmiig baiguulah baih.

      Хариулах

    • Зочин

      (103.26.194.1) 2014-05-14 09:24
      • 0
      • 0

      Алдаагаа засаад урагшил гэж хэлье дээ. Харин жоохон охинтой янз бvр болсон нь vнэн бол тийм ес суртахуунгvй хvнийг бол хэзээ ч дэмжихгvй. Уучлахгvй.

      Хариулах

    • 1234

      (203.194.114.140) 2014-05-13 18:26
      • 0
      • 0

      Buu uhar. Buu shantar

      Хариулах