В. Путин Донбасст цэргийн тусгай ажиллагаа эхлүүлэхээ мэдэгдлээ

Twitter Print
2022 оны 02-р сар 24-нд 12:12 цагт
Мэдээний зураг,

ОХУ-ын Ерөнхийлөгч Владимир Путин Украины Донбасст цэргийн тусгай ажиллагаа явуулахаар болсноо зарлажээ. Түүний хэлж байгаагаар уг цэргийн ажиллагааны гол зорилго нь иргэдийг хамгаалах аж.

Владимир Путин, "Нөхцөл байдал биднээс шуурхай, шийдэмгий арга хэмжээ авахыг шаардаж байна. Донбасс дахь Бүгд Найрамдах Ард Улсууд ОХУ-аас тусламж дэмжлэг үзүүлэхийг хүссэн. Тиймээс НҮБ-ын 7-р хэсгийн 51-р заалтын дагуу мөн ОХУ-ын Бүгд Найрамдах Луганск болон Бүгд Найрамдах Донецк Ард улстай хийсэн найрамдал, хамтын ажиллагааны гэрээний дагуу миний бие цэргийн тусгай ажиллагаа явуулах шийдвэр гаргалаа. Уг ажиллагааны гол зорилго нь өнгөрсөн 8 жилд Киевийн дэглэмийн зүгээс доромжлол амссан гэмгүй иргэдийг хамгаалах юм." хэмээн онцолжээ.

Түүнчлэн тэрээр Украины зэвсэгт хүчнийхэнд хандан зэвсгээ хаяж, гэр гэртээ харихыг уриалжээ. ОХУ-ын тавьсан шаардлагыг биелүүлсэн цэргийн албан хаагчид тулааны бүсээс ямар ч саадгүй гарч, гэр бүлийнхэндээ очих боломжтой гэжээ.

Владимир Путин гадны хүчнүүд ОХУ-д заналхийлсэн тохиолдолд ОХУ хариуг нь даруй өгөх болно хэмээн, ОХУ цөмийн зэвсэгтэй дэлхийн хамгийн хүчирхэг гүрэн гэдгийг онцолж, ОХУ руу дайрсан хэн ч болов аймшигтай үр дагаврыг амсах болно хэмээн анхааруулжээ.

ОХУ-ын төрийн тэргүүн НАТО-г өргөжүүлэхгүй байх, аюулгүй байдлын баталгаа авах гэсэн оросуудын бүх хичээл зүтгэл талаар болсон хэмээн НАТО байр сууриа чангатгаж байгааг ОХУ чимээгүй хараад суухгүй гэжээ.

Эх сурвалж: ntv.ru

Содномцэрэнгийн Энхзаяа 

mongolcom.mn

 
 
Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.