ОХУ Украин руу довтолсноос хойш 5 долоо хоног өнгөрч байна. Москва ОХУ-аас байгалийн хий импортлогч барууны орнууд төлбөрөө рублиэр хийхгүй бол хийн нийлүүлэлтээ зогсооно хэмээн анхааруулжээ.
ОХУ-ын Ерөнхийлөгч Владимир Путин ОХУ-аас байгалийн хий импортлогч гадаадын орнууд төлбөрөө ОХУ-ын валют рублиэр хийх ёстой эс бөгөөс нийлүүлэлтээ зогсоох тухай захирамж гаргасан бөгөөд уг захирамж энэ баасан гарагаас хэрэгжиж эхлэх юм.
Ерөнхийлөгч В. Путин, "Хэн ч бидэнд юмаа үнэгүй өгдөггүй, бид ч бас юмаа үнэгүй өгөхгүй." хэмээн мэдэгджээ.
Энэ 4-р сарын төлбөрөө улс орнууд энэ сарын дундуур төлөх ёстой учраас Европын орнуудад хийн эрчим хүчгүй болох аюул тулчихаагүй байгааг мэргэжилтнүүд онцолж байна.
Мөн ОХУ-ын тогтоосон төлбөрийн шинэ механизм нь еврогоор тооцоо хийхийг бүр мөсөн хориглосон эсэх нь тодорхойгүй байгаа аж.
Франц, Германы эрх баригчид ОХУ-ын тавьсан шаардлага нь сүрдүүлэг, заналхийлэлтэй дүйцэж байна хэмээн буруушааж, ОХУ хий импортлогч компаниудтай хийсэн гэрээгээ зөрчиж байна гэж үзэж байгаагаа илэрхийлсэн юм.
Европын холбоо нийт байгалийн хийн 40 хувь, газрын тосны 30 хувиа ОХУ-аас импортлодог ба ОХУ-ын импорт зогссон тохиолдолд түүнийг нь орлох эх үүсвэр Европын холбоонд одоогийн байдлаар байхгүй билээ. Тийм ч учраас ОХУ Украин руу довтолсны дараагаар Европын холбоо АНУ, Канад зэрэг улс шиг ОХУ-ын байгалийн хий, газрын тосны импортонд хориг тавьж чадаагүй билээ.
Ерөнхийлөгч Владимир Путины хувьд улс орнуудаас төлбөрөө рублиэр хийхмйг шаардаж байгаа нь олон улсын хориг арга хэмжээнүүдээс болж уналтанд ороод байсан үндэсний валютынхаа ханшийг өсгөх оролдлого гэж ажиглагчид харж байна.
Эх сурвалж: BBC
Содномцэрэнгийн Энхзаяа
mongolcom.mn
Энэ мэдээ танд таалагдаж байвал LIKE хийгээрэй. Танд баярлалаа.
