Германд иргэд зайлшгүй амны хаалт зүүх шаардлагатай болжээ

Twitter Print
2020 оны 04-р сар 23-нд 11:42 цагт
Мэдээний зураг,

ХБНГУ-ын бүх мужууд коронавирусын халдварын тархалтыг бууруулахын тулд иргэдээс зайлшгүй амны хаалт зүүхийг шаардах гэнэ.

Герман даяар нийтийн тээвэр, худалдааны төвөөр үйлчлүүлж буй иргэд зайлшгүй амны хаалт зүүх ёстой болж байгаа аж. Амны хаалт зүүх тухай журмыг мужуудын хууль тогтоох байгууллагууд баталснаар тухайн журам ирэх даваа гарагаас эхлэн Германы ихэнх мужуудад хэрэгжиж эхлэх юм. Түүнчлэн амны хаалтыг чухам хаана зайлшгүй зүүх шаардлагатайг мужууд өөрсдөө тогтоох ч Германы бүх мужид иргэд нийтийн тээврээр үйлчлүүлж байхдаа амны хаалт зүүх шаардлагатай болж байгаа аж. Германы хойд зүгт байрлах Мекленбург-Өрнө Померан мужид нийтийн тээвэрт амны хаалтгүй зорчсон иргэнд 25 еврогийн торгууль ноогдуулах гэнэ.

Германы Баден Вюртемберг мужийн Ерөнхий сайд Винфрид Кретшманн мэдэгдсэнээр эмнэлгийн нэг удаагийн амны хаалтыг эмч, эмнэлгийн ажилтнууд л зүүх ёстой ба жирийн иргэд ороолт, даавуун амны хаалт зүүх боломжтой аж. Германы баруун өмнөд зүгт байрлах Райнланд Пфальц муж ирэх сараас сурагчдад олон дахин ашиглах боломжтой амны хаалт тарааж өгөхөөр болсон бол Бавари мужид ирэх даваа гарагаас эхлэн 7 ба түүнээс дээш насныхан зайлшгүй амны хаалт зүүх шаардлагатай болж байгаа аж. Германы канцлер Ангела Меркель хөл хорионы дэглэмийг сулруулах тухай мэдэгдэх үедээ амны хаалтны ач холбогдлыг онцолж, амны хаалтыг зайлшгүй зүүхийг иргэдэд зөвлөсөн билээ.

Coronavirus: Germany makes wearing facemasks mandatory

Германы Роберт Кохийн Институтээс мэдээлж байгаагаар тус улсад коронавирусын халдварын нийт 145 694 тохиолдол бүртгэгдээд байгаа ба уг вирусын халдварын улмаас 4879 хүн нас баржээ. Өнгөрсөн лхагва гарагт л гэхэд Германд нэг өдрийн дотор коронавирусын халдварын улмаас 281 хүн нас баржээ. Өнгөрсөн лхагва гарагт ХБНГУ-ын Вакцины институт нь коронавирусын эсрэг вакциныг хүн дээр туршиж эхлэх тухайгаа мэдэгдсэн билээ. Уг клиникийн туршилтанд сайн дураараа 18-55 насны 200 хүн оролцож байгаа аж.

Австри, Чех, Словакт дэлгүүр, супермаркет болон нийтийн тээврээр иргэд зайлшгүй амны хаалт зүүж үйлчлүүлж байгаа бол Швейцарьт хөл хорионы дэглэмийг сулруулж байгаатай холбоотойгоор иргэдээс амны хаалт зүүхийг шаардахаа зогсоожээ. Испанид нийтийн тээврээр үйлчлүүлж буй иргэдэд амны хаалт тарааж эхэлсэн бол Францад иргэдийг амны хаалт зүүхийг зөвлөж байна. 

Эх сурвалж: BBC

Содномцэрэнгийн Энхзаяа 

mongolcom.mn 

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.