Хонгконгчууд илүү гарсан вакцинуудаа устгахад хүрээд байна

Хонгконгт коронавирусын эсрэг вакцинжуулалтанд хамрагдах хүсэлтэй иргэдийн тоо цөөн байгаагаас Хонгконгийн эрх баригчид илүү гарсан коронавирусын эсрэг хэдэн зуун мянган вакциныг устгахад хүрээд байна.

Гурван сарын дараа гэхэд Хонгконгийн эрх баригчдын худалдан авсан Pfizer компанийн коронавирусын эсрэг вакцины 2 сая орчим тун вакцины хадгалах хугацаа нь дуусах аж.

Хонгконгт нийт хүн амаа коронавирусын эсрэг вакцинд бүрэн хамруулах хангалттай хэмжээний вакцин байгаа ч өнөөдрийн байдлаар хүн амынх нь 20 хүрэхгүй хувь нь л коронавирусын эсрэг вакцинд хамрагдаад байна.

Хонгконгчууд коронавирусын эсрэг вакцинд хамрагдах хүсэлгүй байгаа нь тус бүс нутагт коронавирусын халдварын тохиолдол цөөн илрэх болсон мөн иргэдийнх нь засаг захиргаандаа итгэх итгэл буурсантай холбоотой хэмээн ажиглагчид үзэж байна.

Хонгконгийн коронавирусын эсрэг дархлаажуулалтыг хариуцсан албанаас хонгконгчуудад Pfizer/BioNTech компанийн коронавирусын эсрэг вакцинд амжиж хамрагдахад 3 сар л үлдээд байгаа тухай анхааруулсан байна. Мөн Pfizer/BioNTech компаниудын хамтран гаргасан коронавирусын эсрэг вакциныг иргэдэд хийх дархлаажуулалтын цэгүүд 9-р сараас хаагдана гэдгийг онцолжээ.

Хонгконг нь хүн амаа бүрэн дархлаажуулах хэмжээний коронавирусын эсрэг вакцин нөөцөлсөн хэрнээ иргэд нь вакциндаа хамрагдахгүй байгаа нь, бусад улс орнууд вакцины хомсдолд ороод буй нь харамсалтай хэмээн мэргэжилтнүүд онцолж байна.

Хэрэв хонгконгчууд коронавирусын эсрэг вакциндаа амжиж хамрагдахгүй бол хонгконгчууд коронавирусын эсрэг вакцинд энэ оны сүүлээс нааш хамрагдах боломжгүй болох аж. 7.5 сая хүн амтай Хонгконгийн удирдлагууд Америкийн Pfizer болон БНХАУ-ын Синовак компаниас тус бүр коронавирусын эсрэг 7.5 сая тун вакцин худалдан авсан ч өнөөдрийн байдлаар хүн амынх нь 14 хувь нь вакциныхаа 2 тунд бүрэн хамрагджээ.

Түүнчлэн Хонгконгийн эрүүл мэндийн салбарынхан ч коронавирусын эсрэг вакцинжуулалт удаашралтай хамрагдаж байгаа ба энэ сарын эхний байдлаар эмнэлгүүдийн ажилтнуудын зөвхөн ⅓ нь коронавирусын эсрэг вакцинд хамрагдсан гэсэн судалгаа гарчээ.

Хонгконгийн зарим улс төрчид иргэд вакциндаа идэвхтэй хамрагдахгүй бол илүү гарсан вакцинуудаа бусад улс орнуудад экспортлох санал гаргаад байна.

2019 онд болсон иргэний ардчилсан хөдөлгөөнөөс хойш хонгконгчуудын засаг захиргаандаа итгэх итгэл огцом буурсан юм.

Өнгөрсөн жил Бээжин Хонгконгийн нутаг дэвсгэр дээр Үндэсний аюулгүй байдлын тухай хуулийн төсөл хэрэгжүүлж эхэлсэн нь хонгконгчуудын төдийгүй барууны улс орнуудын бухимдлыг төрүүлсэн билээ.

Эх сурвалж: https://www.bbc.com/news/world-asia-china

Орчуулсан: Содномцэрэнгийн Энхзаяа

mongolcom.mn

 

Энэ мэдээ танд таалагдаж байвал LIKE хийгээрэй. Танд баярлалаа.