Монгол төрийг чөлөөлнө үү

Twitter Print
2019 оны 11-р сар 18-нд 08:04 цагт
Мэдээний зураг,

Тив дэлхийн хүчтэнүүд цугласан олимпийн дэвжээн дээр эр хүний эгэл бор нулимстай хамт мандсан төрийн далбаа минь...

Эрийн цээнд хүрснээ зарласан эр цэргийн хөлстэй магнайг эрхшээж адисласан төрийн далбаа минь...

Эмч сувилагч, цагдаа...энх, эрүүлийг сахиулагчид мэргэжлийн тангараг өргөхдөө мэлмийгээ доошлуулж хүндэлсэн төрийн далбаа минь...

Ямар олон, ямар бахархам үйл хэрэг, үнэн сэтгэлийн гэрч нь юм бэ. Гэтэл Одбаярын зурагтай хамт жигшигдэж, Одбаярын алдаатай хамт адлагдаж, ой гутам тайлбартайгаар олны нүд, чихийг сортойлгов. Одбаяр гэдэг хувь хүний асуудал биш юм аа. Энэ хүн хувийн асуудлаар улсын хил алхаж хурал чуулган гэж яваагүй. Монголын төрийг төлөөлөн, төржсөн биеэ үүрээд, төрийн зардлаар, төрийн ажлаар хилийн чанадад зорчсон. Төр төлөөлөн олон улсад яваа нь байтугай загвар өмсөгч бүсгүйтэй хамт эх орондоо олон нийтэд харагдаж, хардах сэдэл төрүүлснийхээ төлөө Японы Засгийн газрын гишүүн албан ажлаасаа өөрөө татгалзаж, ингэснээрээ төрдөө итгэх ард түмнийхээ итгэл найдварыг аварч үлдсэн жишээ ч байдаг.

Гэтэл та минь бултаад яваа сурагтай, бурантаг чангаах мэдээтэй. Хүндийг өргөлтийн дэлхийн аварга Анхцэцэгийн нөмрөөд гүйж явсан далбаа, Олимпийн медальт Гүндэгмаагийн элгэндээ тэвэрч үнссэн далбаа, Монгол Улсын үе үеийн Ерөнхийлөгч нарын сөгдөж адис авсан далбаа...

Тэд бүгд төрөө төлөөлсөн төр. Харин Одбаяр төр байж чадсангүй. Монголын төр онгоцонд халамцаж, онжиго өгзөг илээгүй...Монголын төр хилээр гарах эрхээ хаалгаж хэдэн сая вонын торгууль төлөөгүй. Тиймээс Одбаяр та төрийн ажлаа хүлээлгэн өгнө үү. Зөөлөн суудалдаа үлдэх гэж зөрүү буруу харайлгаж явна гэнэ, сэтгүүлчдээс зугтаад сэмхэн нуугдсан гэнэ, хэвлэлийн бага хурал зарлачихаад хэлэх тайлбараа бодож байна гэнэ.

Уучлаарай, таны ичих булчирхай яасныг мэдэхгүй. Биднийх өвчлөөд хэцүүдлээ. Таны нүүр улайдаг, үгүйг мэдэхгүй, бид бүүр үрэвсчихээд байна. Улс орноороо ичих булчирхайн халдвараар өвчилмөөргүй байна. Тиймээс та Монгол төрийн нэр хүнд, Үндсэн хуулийн цэцийн даргын сэнтий болоод үүрэг хариуцлагыг хувь хүнийхээ хуудуутай алдаанаас чөлөөлнө үү.

Р.Эмүжин

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.
    • Зочин

      (202.55.188.81) 2019-11-08 10:12
      • 0
      • 1

      Yag zuv arga zam. Gevch, erh medeld hursen, deer ugaasaa ner turoo bus arisaa boddog mongol zangaar bol butehgui l dee.

      Хариулах