Владимир Путин, Жо Байден нар ирэх сард Женевт уулзана

Twitter Print
2021 оны 05-р сар 26-нд 10:53 цагт
Мэдээний зураг,

АНУ-ын Ерөнхийлөгч Жо Байден, ОХУ-ын Ерөнхийлөгч Владимир Путин нар ирэх сарын 16-нд Швейцарийн Женев хотод уулзахаар болсон талаар Цагаан ордон болон Кремлийн зүгээс мэдэгджээ.

Цагаан ордны хэвлэлийн нарийн бичгийн дарга Жен Псакигийн мэдээлснээр талууд хоёр улсын харилцаанд тулгараад буй асуудлуудыг хэлэлцэж, хоёр улсын тогтвортой харилцааг сэргээх зорилт тавьжээ. Кремлийн зүгээс В. Путин, Ж. Байден нар хоёр улсын харилцаа, коронавирусын цар тахлын эсрэг хамтран тэмцэх явдал, бүс нутгуудын зөрчлийн талаар ярилцана хэмээн мэдэгджээ.

Уулзалтын үеэр Ерөнхийлөгч Жо Байден ОХУ-ын Ерөнхийлөгч В.Путинтэй ОХУ-ын зүгээс АНУ-ын сонгуульд хөндлөнгөөс нөлөөлөх гэсэн оролдлогууд, Оросын цахим халдлагууд, Украины нутаг дэвсгэрийн бүрэн бүтэн байдалд ОХУ-ын зүгээс заналхийлж буй явдал болон Оросын сөрөг хүчний тэргүүн Алексей Навальныйг хорьсон асуудлуудыг хөндөхөөр төлөвлөжээ. Хоёр улсын төрийн тэргүүнүүдийн уулзалтыг Оросын эрх баригчид Вашингтоны тодорхой байр суурийг Ерөнхийлөгч Жо Байдений зүгээс шууд сонсох боломж гэж харж байна.

Нөгөөтэйгүүр Ерөнхийлөгч В.Путин Вашингтон Оросын сөрөг хүчний тэргүүн Алексей Навальныйг мөн Орос болон Беларусийн ардчилсан хөдөлгөөний идэвхтнүүдийг дэмжсэнээрээ Оросын дотоод хэрэгт хөндлөнгөөс оролцож байна хэмээн үзэж байгаа юм.

Түүнчлэн Москва Вашингтоны зүгээс өнгөрсөн 4-р сарын 15-нд ОХУ-ын эсрэг хориг арга хэмжээ тогтоосон явдлыг эсэргүүцэж байгаа ба Москва АНУ-ын сонгуульд нөлөөлөх оролдлого хийсэн, АНУ-ын төрийн байгууллагуудын дотоод сүлжээнд нэвтрэхийн тулд SolarWinds компанийн сүлжээнд цахимаар халдсан, сөрөг хүчний тэргүүн А.Навальныйг "Новичок" бүлгийн бодисоор хордуулж, улс төрийн хэргээр хорьсон гэх мэдэгдлүүдийг бүгдийг нь үгүйсгэж байгаа билээ.

АНУ-ын Ерөнхийлөгч Жо Байден 2014 онд Оросын нутаг дэвсгэрт нэгдсэн Крымийн хойг болон Украины хил орчим байрлах Оросын зэвсэгт хүчний анги бүрэлдэхүүнүүдийн тоо нэмэгдэж буй явдалд сэтгэл зовж буйгаа илэрхийлж байсан ба тэрээр уулзалтын үеэр уг асуудлыг хөндөхөөс гадна Беларусийн эрх баригчид Ирландын Ryanair агаарын тээврийн компанийн зорчигч тээврийн онгоцыг Минскт буулгасан асуудлыг мөн хөндөхөөр төлөвлөжээ.

Оросын зүгээс онгоцонд байсан ОХУ-ын иргэд Минск хотод буусан гэсэн мэдээлэл ташаа болохыг онцолсон бол Цагаан ордон уг үйл явдалд ОХУ-ын оролцоо байхгүй гэж үзэж буйгаа илэрхийлжээ.

Эх сурвалж: https://www.reuters.com/world/europe/biden-putin-meet

Орчуулсан: Содномцэрэнгийн Энхзаяа

mongolcom.mn

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.