Токиогийн Олимпийн наадам эхлэхэд 50 гаран өдрийн хугацаа үлджээ. Тэгвэл ОУОХ-ны ерөнхийлөгч Томас Бах Токио хотод долдугаар сарын 12-нд хүрэлцэн ирнэ хэмээн ОУОХ-ны дэд ерөнхийлөгч Жон Коутс мэдэгджээ.
Олон улсын Олимпийн хорооны ерөнхийлөгч Томас Бах Олимпийн наадмын нээлтийн ёслол болохоос 11 хоногийн өмнө буюу долдугаар сарын 12-нд Токиогийн Олимпийн наадам болох Япон улсад хүрэлцэн ирнэ гэж ОУОХ-ны дэд ерөнхийлөгч лхагва гарагт мэдэгджээ. Коутс зургадугаар сараас эхлэн бэлтгэл ажлыг хянахаар Токио хотод байх болно гэж тамирчид, үндэсний Олимпийн хороо, олон улсын спортын холбоод зэрэг олимпийн янз бүрийн оролцогч талуудад хаягласан захидалдаа бичжээ.
Бах энэ сард тус улсад айлчлахаар төлөвлөж байсан боловч Япон даяар коронавирусын халдвар сэргэж байгаатай холбогдуулан түүний аялал хойшлогджээ. Тэрбээр 7-р сарын 23-ны нээлтийн ёслолын өмнө энэ аяллыг 6-р сард болгон өөрчлөх төлөвлөгөөтэй байгаа. Өмнөх хуваарь ёсоор ОУОХ-ны ерөнхийлөгч өнгөрсөн даваа гаригт Хирошима мужид бамбар дамжуулах арга хэмжээнд оролцож, маргааш нь Ерөнхий сайд Ёшихидэ Сүгатай уулзах ёстой байжээ.
Коутс захидалдаа COVID-19-ийн түгшүүртэй байгаа ч гэсэн Токиогийн наадмыг зохион байгуулахаар ОУОХ-нд өгсөн амлалтыг биелүүлж байгаад талархаж байгааг онцолжээ. Харин ОУОХ-ны ерөнхийлөгч Бах, Токио-2020 Олимпийн наадмын Ерөнхийлөгч Сейко Хашимото, Токио мужийн захирагч Юрико Коикэ нарын хэлсэн үгсээс харахад Олимпийн наадам аюулгүй зохион байгуулагдах болно гэсэн баталгаа өндөр байна.
Коутс "скрининг шинжилгээ, маск зүүх, хувийн ариун цэврийг сахих, хоорондын зай барих" зэрэг шинжлэх ухааны үндэслэлтэй шийдлүүдийг хэрэгжүүлэх чиглэлээр зохион байгуулагчдын хийсэн ажлыг сайшаажээ.
Олимпийн бэлтгэл ажлын талаарх цахим уулзалт гурван өдөр үргэлжлэх бөгөөд тус уулзалт өнөөдөр сүүлийн өдрөө явагдаж байгаа билээ. Саяхан Киодо Ньюсээс явуулсан санал асуулгад оролцогчдын 59.7% нь Олимпийн наадмыг цуцлах ёстой гэж хариулжээ.
Цар тахлын улмаас аль хэдийн нэг жилээр хойшлогдсон зуны наадамд дэлхийн өнцөг булан бүрээс 11000 орчим тамирчин оролцоно.
Спортын сэтгүүлч Дэлгэрмаагийн Баасанжаргал
mongolcom.mn
Энэ мэдээ танд таалагдаж байвал LIKE хийгээрэй. Танд баярлалаа.
