Засгаар тоглох цаг нь одоо биш

Twitter Print
2014 оны 04-р сар 19-нд 17:16 цагт
Мэдээний зураг,

Өчигдрийн УИХ-ын нэгдсэн хуралдаанаар УИХ-ын гишүүд Засгийн газрын гишүүнээр хавсран ажилладаг тогтолцоог 2014 оны  7 дугаар 1-нээс хүчингүй болгохоор Үйлдвэр, хөдөө аж ахуйн сайд Х.Баттулга, УИХ-ын гишүүн Ж.Батзандан, Р.Бурмаа  тэргүүтэй 35 гишүүн санал өгснөөр Н.Алтанхуягийн толгойлсон Засгийн газар эрхзүйн хувьд эргэлзээтэй байдалд оров. Гэхдээ энэ нь 7 дугаар сарын 1-нээс энэ Засгийн газар огцорно гэсэн үг биш юм. Үндсэн хуульд засвар оруулах замаар удаан хугацаанд үргэлжлэх “хэрүүлийн алим”-ыг АН-ын 4, МАН, МАХН-МҮАН-ын “Шударга ёс” эвслийн 31 гишүүн эвсэж байгаад суулгачихлаа.

Харин аливаа асуудалд төдийлөн барьц алддаггүй Ерөнхий сайд маань хэзээний сурсан зангаараа өөрийнх нь танхимын нэгэн сайдын оролцсон түүний эсрэг ажиллагаанд төдийлөн ач холбогдол өгөлгүй “УИХ-ын санал хураалт Засгийн газрыг огцруулна гэсэн үг биш” хэмээн товчхон тайлбар хийсэн.

Түүний толгойлсон Засгийн газар огцрох хэмжээнд муу ажиллаад байгаа юм уу гэдгийг бага ч болтугай ойлгохын тулд дараах тоо баримтанд дүн шинжилгээ хийгээд үзэхэд буруудахгүй.

Өнгөрсөн жилийн хувьд дэлхийн өндөр хөгжилтэй орнууд болох АНУ-ын эдийн засаг 1,3 хувь, Европын бүс -0,5 хувь, Хятад 7.7 хувийн өсөлттэй гарсан бол Монгол Улс 11.7 хувийн өсөлттэй гарч. Харин энэ онд Монгол Улсын эдийн засаг 12.9 хувь хүрч өсөх боломжтой гэж Олон улсын валютын сан, Азийн хөгжлийн банкны зүгээс урьдчилсан прогноз гаргаад байгаа. Гэхдээ дэлхийн эдийн засгийн өсөлт удаан байхад дотоодынхоо эдийн засгийн өсөлтийг хоёр оронтой тоонд барих нь хэцүү ч үүнд хүрэхээр бүх талаар чармайн ажиллахаа Ерөнхий сайд Н.Алтанхуяг онцолсон. 

Засгийн газар өнгөрсөн онд бараа бүтээгдэхүүний үнийн өсөлтийг бууруулах зорилгоор олон зоригтой арга хэмжээ авсны томоохон нь Үнэ тогтворжуулах хөтөлбөр байсан. Уг хөтөлбөр хэрэгжсэнээр ид ажлын үед ямар ч гэсэн барилгын компаниуд материал, түүхий эдээр дутагдалгүй ажилласан. Инфляци өсч байгаа ч 2012 оныхтой харьцуулахад бага буюу, 2014 он гарсаар 12,4 хувьтай байгаа нь валютын ханшийн өсөлтөөс шалтгаалж байгааг хэн хүнгүй ойлгож мэдэрч л байгаа. Харин энэ өсөлтийг хязгаарлах боломж, нөхцөл бүрдэж байгааг Монголбанкны Ерөнхийлөгч Н.Золжаргалаас эхлээд Ерөнхий сайд ч онцлон тэмдэглэж байгаа.  Өнгөрсөн жил Засгийн газар барилгын салбарт дорвитой дэмжлэг үзүүлсний хүчинд энэ салбарын өсөлт нь 2013 оны Дотоодын нийт бүтээгдэхүүний өсөлтөд голлон нөлөөлсөн. Мөн хөдөө аж ахуй, уул уурхай, худалдаа, үйлчилгээний салбарын өсөлт ч нөлөөлснийг эдийн засагчид тооцоолоод гаргачихсан.

Ашигт малтмалын экспортын тухайд өнгөрөгч оны эхний гурван сард зэсийн баяжмал 82 сая тонныг  экспортолж  байсан бол энэ жил 150 сая тонн болсон. Энэ нь Оюутолгойн зэсийн экспорттой холбоотой. Мөн төмрийн хүдэр 501 орчим тонн байсан бол энэ онд 542.3, газрын тос 1 сая тонн баррель байсан бол энэ онд 1,5 сая тонн болж экспорт нь өссөн үзүүлэлттэй байгаа. Эдгээр нь эдийн засгийн өсөлтөд хувь нэмрээ оруулна гэж дүгнэж болно.

Гадаад худалдаа 2011 оны эхний гурван сард -345 сая, 2012 онд -580 сая, 2013 онд -400 сая ам.долларын алдагдалтай байсан бол энэ онд -9,1 сая ам.долларын алдагдалтай гарч. Гадаад худалдааны алдагдал ийнхүү багасхад төгрөгийн ханш суларсантай холбогдуулж, импортоо бууруулсан нь нөлөөлсөн. Тухайлбал энэ оны эхний гурван сард дизель түлш, автобензин, ачааны автомашин, цахилгаан эрчим хүч, хүнсний гол нэрийн барааны зарим нэр төрлийн импорт багассан үзүүлэлтэй байна. Мөн согтууруулах ундаа, тамхины импорт 25, үүн дотроо янжуур тамхины импорт 32 хувиар багассан нь гадаад худалдааны балансад ихээхэн нөлөөлсөн нь ойлгомжтой.

Түүнээс гадна Засгийн газрын томоохон бүтээн байгуулалтын нэг нь “шинэ сум” төсөл билээ. Энэ жил 16 сумыг шинэ сумын төв болгоно. Ирэх жилийн төсөвт бас тусгана. Мөн эдгээр сумдаас гадна 50 гаруй сумын төвийн сантехникийн газар доорхи байгууламжийг нь шийдэх зорилт дэвшүүлсэн. Шинэчлэлийн Засгийн газар 2016 он гэхэд аймгийн төвүүд хот шиг хот, ихэнхи сумын төвүүд тав тухтай орчин нөхцөл бүрдүүлсэн байхаар зорилго тавьж байгаа нь урьд өмнө хийгдэж байгаагүй дорвитой бүтээн байгуулалт гэж дүгнэж болно. Ийнхүү Н.Алтанхуягийн толгойлсон Засгийн газар нүдэнд үзэгдэж, гарт баригдах ажил хийж бүтээн байгуулж байгаа. Барьж босгосоноо нураах амархан. Харин буцаагаад сэргээх хэцүү байдаг. Ажил хийж байгаа нэгнээ ад үзэж тарааж бутрааснаар Монголчууд хожиж байсан түүх байхгүй. Товчхондоо Засгаараа тоглох цаг одоо биш.

Д.Энхтүвшин

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.