Хүүхдээ тусад нь унтуулж сургах зөвлөгөө

Twitter Print
2021 оны 04-р сар 22-нд 13:00 цагт
Мэдээний зураг,

Үрстэйгээ тэврэлдэж унтах мэдээж сайхан л даа. Гэхдээ агааргүйтэх, нэг байрлалаар удаан хэвтэхээр нуруу, ууц чилэх, хөнжилтэй, хөнжилгүй унтах гээд хөгжилтэй асуудлууд бий.

Америк кинон дээр аав, ээж нь хүүхдүүдээ өрөөнд нь унтуулаад хөнжлөөр нь хучингаа духан дээр нь шүп хийтэл нь үнсээд сайхан амраарай гэж хэлээд гарахад нь "Хүүхэд нь ганцаараа айдаггүйн байхдаа. Яагаад ээж, аавтайгаа унтдаггүй юм бол" гэж гайхдаг л байлаа. Гэхдээ энэ бол хүүхдэдээ хайргүйдээ биш. Үрсээ ч өөрсдийнхөө төлөө хийдэг хамгийн чухал дадал, зуршил гэдгийг ээж болоод л ойлголоо.

За одоо яаж хүүхдүүдээ тусад нь унтуулж сургасан бяцхан туршлагаасаа хуваалцая. Гэнэт ухаа сэхээ орсон юм шиг шууд л чи одоо өрөөндөө унт аав, ээж нь амарсан болохгүй байна гэж хүүхдийнхээ сэтгэлзүйд халдаагүй. Нэлээн аажуу аргаар үзсэн. Хэрэв хүчилвэл бүүр тусдаа унтахаа байчих байх гэдэг эрсдэлийг тооцоолсон.

Эхний хийсэн алхам бол өрөөнд нь бүдэг жижиг гэрэл тавьж өгсөн. Дараа нь ор хөнжлийн давууг нь сайхан угаагаад, индүүдээд маш тухтай болгож тавьсан. Гэхдээ хүүгээ унтуулаагүй. Зүгээр л бэлдсэн. Ингээд тактикийн ажлууд бага багаар эхэлсэн дээ.

Эхний өдөр нь миний хүү орон дээрээ зүгээр хэвтээд үз дээ. Тухтай байна уу, үгүй юу ээж нь харах гэсэн юм. Нээрээ ээж нь гэрэл тавьчихсан анзаарсан уу. Хэрвээ миний хүү өрөөндөө унтдаг болохын бол айхгүй байх гээд тавьчихсан байхгүй юу гээд жаахан ярилцсан. Гэхдээ тэр өдрөө хүчлээгүй хуучин унтадгаараа олуулаа тэврэлдээд л унтсан. Дараа өдөр нь хүүтэйгээ хамт өрөөнд нь хоёулахнаа унтлаа. Хүүтэйгээ амрах тухтай юмаа.

Олуулаа унтахаар ээжийнх нь нуруу өглөө босохоор өвдөөд байхын сонин. Харин хүүтэйгээ хоёулахнаа унтсан чинь өглөө нь өд шиг хөнгөн сэрлээ ш дээ гоё байгаа биз гэсэн чинь хүү нээх бодлогшронгүй тийм үү гэж асуусан. Ингээд олуулаа унтахаар ээж амарч чаддаггүй юм байна гэдгийг эвтэйхэн яриан дундаа шургуулаад ойлгуулах гэж оролдсон. Үр дүнтэй байсан шүү.

Дараагийн өдөр нь гэрлийг нь асаагаад хүүгээ өрөөнд нь ганцааранг нь унтуулахдаа жаахан үлгэр ярьж өгөөд унтуулсан. Багаасаа тоглож өссөн жижигхэн чихмэл тоглоомыг аав нь унтахад нь тэврүүлээд унтуулдаг болсон.

Ингээд л бага багаар ахиулсаар байгаад нэг л мэдэхэд өврөөсөө гараагүй өөдөсхөн хүү минь өрөөндөө унтдаг болчихсон. Одоо өрөөндөө дориун гэгч нь харин ч дуртай унтдаг болсон.

Гэхдээ хүүхдээ тусад нь унтуулахад яг анх цэцэрлэгт өгдөг мэдрэмж эргээд сэргэдэг юм байна лээ. Өрөөнд нь унтуулчихаад нээх сонин байн байн босч гүйж хараад л духан дээр нь үнсээд л. Айж байгаа болов уу. Яршиг зүгээр дуудаад хамт унтдаг ч юм бил үү гээд түмэн шидийн бодол эхний ээлжинд нойр хулжаада юм билээ. Дан ганц хүүхдийн сэтгэлзүй гэлтгүй ээжийн сэтгэлзүй ч энэ тал дээр давхар бэлэн байх ёстойг ойлгосон.

Томыгоо өрөөнд нь унтуулдаг болгочихоод бага руугаа орсоон. Дөнгөж 2 ой гарч байгаа жижигхээн охиноо хажуудаа байгаа цагаан манежин дээр унтуулж сургахад санасныг бодоход амархан байсан. Биед нь эвтэйхэн унтлагын хувцас өмсүүлээд (Энэ насны хүүхдүүд ихэнх нь хөнжил тийрдэг тэрнээсээ болоод даараад орой сэрвэлзэж сэрээд байдаг болохоор унтлагын хувцас их тус болдог) ор, хөнжлийн даавуу, жижигхэн дэрийг нь бэлдээд тусад нь хэвтүүлж үзсэн.

Дуртай байсан. Томчуудтай агаар булаацалдахгүй. Сэрүүхэн тав тухтай, таатай байгааг бяцхан бие нь магадгүй зөнгөөрөө мэдэрсэн байх. За ингээд багыгаа асуудалгүй тусад нь унтуулдаг болчихсон. Мэдээж дунд нь сэрвэлзэж сэрэх тоолонд нь босч бүүвэйлээд эргээд орон дээр нь унтуулах зэргийн асуудлууд байсаан байсан. Гэхдээ л хажуу орондоо тусад нь гаргаж чадсан.

За харин одоо хүүхдүүдээ тусад нь гаргахын ач холбогдлыг мэдэрснээ хуваалцая. Хамгийн сайн үр дүн бол мэдээж нуруу маргааш өдөр нь маш сайхан амарч босч ирдэг болсон. Хажуу тийшээ нааш цаашаа жинкэн сайхан хөрвөөж байгаа юм чинь.

Адаглаад л олуулаа халууцаж, хөлөрч, том хүмүүс агаараас нь булаацалдахгүй болоод ирэхээр хүүхдүүдийн өсөлт, хөгжилтөд ч дэмтэй.

Гэхдээ хааяа ширүүн салхи салхилах үед хүүгээ өрөөнөөс нь дуудаж ирээд хажуудаа унтуулдаг. Өдөр их унтчихаад орондоо хөрвөөгөөд унтаж чадахгүй байгаа нь андашгүй мэдэгдээд байхад нь ирээд хамт хэвтээ гэдэг.

За өөрийнхөө хүүхдүүдээ тусад нь унтуулж сургасан бяцхан туршлагаа хуваалцлаа.

За тэгээд хүүхдүүдээ тусад нь унтуулж сургаарай. Загнаж бас хүчлэх хэрэггүй. Эвээр, бага багаар ойлгуулж ярилцах л хамгийн үр дүнтэй юм байна лээ шүү. Амжилт ээжүүд ээ.

Бямбадоржийн Саруул

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.