В. Путин Украин дахь ОХУ-ын армийг удирдуулахаар А. Дворниковыг томилжээ

Twitter Print
2022 оны 04-р сар 11-нд 11:37 цагт
Мэдээний зураг,

ОХУ-ын Ерөнхийлөгч Владимир Путин Украин дахь ОХУ-ын армийг удирдуулахаар ОХУ-ын зэвсэгт хүчний хамгийн туршлагатай офицеруудын нэг гэгддэг Александр Дворниковыг томилжээ.

АНУ-ын зүгээс мэдээлснээр 60 настай А. Дворников нь Сири болон Чеченьд Оросын армийг удирдаж байсан туршлагатай бөгөөд тэрээр Сирид алба хааж байхдаа энгийн иргэд ихээр төвлөрсөн хотуудад цохилт өгөх, эмнэлэг, цэвэр усны эх үүсвэрүүд зэрэг дэд бүтцийг нь бөмбөгдөх тушаал өгч байсан аж. Тийм ч учраас Вашингтон түүнийг Сири болон Чеченьд ашиглаж байсан тактикаа Украинд хэрэгжүүлнэ хэмээн үзэж байна.

Австрийн канцлер Карл Нехаммер энэ даваа гарагт ОХУ-ын нийслэл Москва хотод айлчилж, Ерөнхийлөгч Владимир Путинтэй уулзах ба тэрээр ОХУ-ын төрийн тэргүүнтэй уулзах үеэрээ ОХУ-ын зэвсэгт хүчний Бучад үйлдсэн дайны гэмт хэргийн асуудлыг хөндөх болно гэжээ.

Түүний хувьд өнгөрсөн амралтын өдрүүдээр Украины нийслэл Киев болон Буча хотод айлчилж, нөхцөл байдалтай танилцсан билээ.

Украины Ерөнхийлөгч Владимир Зеленский ХБНГУ-ын канцлер Олаф Шольцтой ОХУ-ын дайны гэмт хэрэг, ОХУ-ын эсрэг хориг арга хэмжээний талаар ярилцсан ба ХБНГУ-ын байр суурь өөрчлөгдөж, Украиныг дэмжиж буйд талархаж буйгаа илэрхийлжээ.

ОХУ-ын зэвсэгт хүчнийхэн Украины зүүн хязгаар дахь довтолгоогоо үргэлжлүүлсээр байна. Украины Харьков мужид 10 энгийн иргэн амиа алдаж, 11 хүн шархджээ.

Өнгөрсөн ням гарагт Украины хотуудаас 3000 хүнийг нүүлгэн шилжүүлсэн ба нийслэл Киев хотын ойр хавиас 1222 хүний цогцос олдсон талаар Украины ерөнхий прокурор Ирина Венедиктова мэдэгдсэн ба түүний хэлж байгаагаар Украины эрх баригчид ОХУ-ын зэвсэгт хүчнийхний үйлдсэн байж болзошгүй 5600 дайны гэмт хэргийг шалгаж байгаа аж.

Дэлхийн банкны тооцооллоор Украины эдийн засаг энэ онд 45.1 хувиар буурах төлөвтэй байна. НҮБ-аас мэдээлснээр ОХУ-ын дайралтаас хойш Украинаас 4.5 сая гаруй иргэн дүрвэжээ.

Эх сурвалж: Reuters

Содномцэрэнгийн Энхзаяа

mongolcom.mn

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.