Н.Батцэрэг: Х.Тэмүүжингийн асуудлыг нухацтай авч үзнэ

Twitter Print
2014 оны 05-р сар 06-нд 09:09 цагт
Мэдээний зураг,
УИХ дахь “Шударга ёс” эвслийн Бүлгийн дарга Н.Батцэрэг ойрын үед олны анхаарлын төвд байгаа асуудлуудад доорх хариултыг өгч байна.

-Төмөр замын ажлын талаар нууц мэдээлэл сонссон гэсэн. Санхүүжилтийн хувьд болон бүтээн байгуулалтын хувьд хэр урагштай байна вэ? 
-Энэ талаар сайд нарын мэдээлэл зөрж байгаа. Эдийн засгийн хөгжлийн сайд Н.Батбаяр төмөр замын бүтээн байгуулалтад шаардлагатай хөрөнгийн эх үүсвэрийг хуваарилсан гэж хэлсэн. Гэтэл Зам, тээврийн сайд А. Гансүх “Чингис” бондоос 20 гаруй сая ам.доллар авсан, үлдсэн 50 гаруй сая ам.долларыг "Хөгжлийн банк"-наас аваагүй” гэсэн тайлбарыг өгч байна. Үүнээс харахад төлөвлөсөн ажил төдийлөн сайн явахгүй байна гэж харж болохоор байгаа юм.

-Х.Баттулга сайд огцрох хүсэлтээ өнгөрсөн долоо хоногт өгсөн. Танай Бүлгийн хуралдаанаар энэ талаар хэлэлцсэн үү? 
-Үйлдвэр хөдөө, аж ахуйн сайд Х.Баттулга УИХ-ын чуулганд хандаж хүсэлтээ тавьсан. Гэхдээ энэ асуудал энэ долоо хоногт Байнгын хороогоор хэлэлцэх асуудалд орж ирээгүй байна лээ. Сайдуудын хувьд ажил хийж байснаа гэнэтхэн чөлөөлөгдөх өргөдлөө өгөөд, шулуухан гараад явчихаж болохгүй. Ажил хариуцсан хугацаандаа юу хийсэн, юу хийхээр төлөвлөж байсан гэдгээ танилцуулах ёстой. Тиймээс энэ талаар Х.Баттулга сайдаас дэлгэрэнгүй мэдээлэл аваагүй байж бүлгийн зүгээс байр суурь илэрхийлэх нь зохимжгүй.

-О.Баасанхүү гишүүн Х.Тэмүүжин сайдыг уучлал гуйвал өргөдлөө татна гэдэг байр сууриа илэрхийлсэн. Хууль зүйн сайд ч албан ёсоор уйлчлал гуйсан тухай яригдаж байна. О.Баасанхүү гишүүний зүгээс энэ талаар мэдээлэл өгсөн үү?
-Одоогоор О.Баасанхүү гишүүн ямар нэг мэдээлэл өгөөгүй. Ер нь бол хоорондын харьцаагаар уучлалт гуйж, тоглоом шоглоом шиг загнаж болохгүй. Уучлалт гуйх асуудал бол хувь хүний хоорондын араншин, харилцаанд байх ёстой. Харин огцруулах тухай үндэслэл тухайн хүний ажлын хариуцлагатай холбоотой учраас УИХ-ын чуулганаар нухацтай ярина. Түүнээс биш хоорондын хувийн ааш, араншингаар хөөцөлдөж байгаа бол тэндээ ярих хэрэгтэй.

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.

Санал болгох