Өмнөд Солонгосын эрх баригчид Ким Жон Ун амьд байгаа гэв

Twitter Print
2020 оны 04-р сар 27-нд 12:30 цагт
Мэдээний зураг,

БНСУ-ын Ерөнхийлөгч Мүн Жэ Иний гадаад харилцааны зөвлөх Мүн Чүнин СиЭнЭн агентлагт өгсөн ярилцлагадаа Хойд Солонгосын удирдагч Ким Жон Ун амьд бөгөөд биеийн байдал нь сайн байгаа хэмээн мэдэгджээ.

Тэрээр, "Манай засгийн газар Ким Жон Ун амьд бөгөөд эрүүл мэнд нь сайн байгаа гэсэн хатуу байр суурьтай байгаа. Хойд Солонгосын удирдагч энэ сарын 13-наас эхлэн Вонсаны бүс нутагт байгаа ба тус бүс нутагт ямар нэг ер бусын хөдөлгөөн ажиглагдаагүй." гэжээ. Хойд Солонгосын удирдагч Ким Жон Ун энэ сарын 15-нд тохиосон өвөөгийнхөө ойн баярын үйл ажиллагаанд оролцоогүй нь олон нийтийн анхаарлыг татсан ба тэрээр уг үйл явдлаас 4 хоногийн өмнө Хойд Солонгосын улс төрийн товчооны хуралд суусан талаар тус улсын КэйСиЭнЭй сувгаар мэдээлсэн билээ.

Америкийн СиЭнЭн агентлагаар өнгөрсөн долоо хоногт Америкийн тагнуулын алба Хойд Солонгосын удирдагч Ким Жон Уны биеийн байдал зүрх судасны мэс засал хийлгэсний дараа муудсан талаарх мэдээллийг шалгаж байгаа тухай мэдээлсэн юм. СиЭнЭн агентлагийн мэдээнээс өмнө БНСУ-ын Daily NK сайтад Хойд Солонгосын удирдагч муу зуршил, хэт таргалалт болон ядаргаа зэрэг шалтгааны улмаас зүрх судасны мэс засалд орсон ба Ким Жон Ун Хянсан мужид байрлах эдлэндээ эмчилгээ хийлгэж байгаа тухай бичиж байжээ.

Amid mounting speculation, South Korea says Kim Jong Un is 'alive ...

Түүнчлэн Хойд Солонгосын удирдагчийн биеийн байдал сайжирсаны дараагаар түүний эмчилгээг хариуцсан эмч нарын багийнхны зарим нь энэ сарын 19-нд Пхеньян руу буцсан талаар ч бичжээ. Өнгөрсөн ням гарагт Хойд Солонгосын Родон Синмун сонин Хойд Солонгосын удирдагч Ким Жон Ун Самжён хотыг дахин зохион байгуулахад оролцсон ажилчдад талархал илэрхийлэл захидал илгээсэн тухай мэдээ нийтэлсэн байна. Хойд Солонгост тус улсын удирдагчийг тойрсон мэдээ мэдээллийг маш хатуу хянадаг бөгөөд төрийн өмчит хэвлэл мэдээллийн хэрэгслүүдээр түүний талаар мэдээ мэдээлэл багасах нь олон нийтийн анхаарлыг татах нь элбэг байдаг аж. Хойд Солонгосын талаарх мэдээ мэдээллийг түлхүү нийтэлдэг 38 North сайтад Ким Жон Уны эзэмшлийнх байж болох галт тэрэг Хойд Солонгосын зүүн эрэгт байрлах Вонсан дахь галт тэрэгний буудалд энэ сарын 21-нээс хойш зогсч байгааг батлах хиймэл дагуулаас авсан зурагнуудыг нийтэлжээ.

Вашингтонд төвтэй тус сайтад дээрх зурагнууд нь Ким Жон Ун Вонсан дахь тансаг зэрэглэлийн цогцолбортоо байгаа гэдгийг баталж чадахгүй ч Хойд Солонгосын удирдагч тус бүс нутагт байх боломжтой гэдгийг харуулж байна хэмээн бичсэн байна. Ким Жон Уны Вонсан дахь цогцолбор нь зочдод зориулсан 9 байшин, сувиллын төв, усан онгоцны зогсоол, буудлагын талбай, морин уралдааны замтай аж. 

Эх сурвалж: CNN

Содномцэрэнгийн Энхзаяа 

mongolcom.mn 

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.