КОВИД-19 өвчний эсрэг вакцин энэ оны сүүлээр бэлэн болж болзошгүй

Twitter Print
2020 оны 04-р сар 30-нд 11:16 цагт
Мэдээний зураг,

ХБНГУ-ын Майнц хотод байрлах биотехнологийн BioNTech (Байонтех) компани, Америкийн эм үйлдвэрлэгч Pfizer (Пфайзер) компанитай хамтран коронавирусын эсрэг вакциныг хүмүүс дээр туршиж эхэлсэн ба дээрх хоёр компанийн зүгээс КОВИД-19 өвчний эсрэг вакцин энэ оны сүүлээр бэлэн болох боломжтой гэдгийг мэдэгджээ.

Пфайзер компани коронавирусын халдварын эсрэг вакцины туршилт АНУ-д ирэх долоо хоногт эхлэх талаар мэдэгдсэн ба энэ намар гэхэд онц байдлын үед хэрэглэгдэх КОВИД-19 өвчний эсрэг сая сая тооны вакциныг үйлдвэрлэн гаргах боломжтой хэмээн мэдэгдсэн талаар Уолл Стрийт Жорналд нийтэлжээ. BioNTech компанийн BNT162 нэртэй коронавирусын халдварын эсрэг вакцины клиникийн туршилтанд хэдийн 12 хүн хамрагдсан ба туршилтын явцын тухай өөр ямар нэгэн мэдээлэл байхгүй байна.

BioNTech компаниас өгсөн мэдээллээр КОВИД-19 өвчний эсрэг вакцины клиникийн туршилтанд сайн дураараа 18-55 насны 200 хүн оролцохоор бүртгүүлсэн ба эдгээр хүмүүст 1 микро граммаас 100 микро грамм хүртэлх тунг тарих аж. Түүнчлэн тус вакцины аюулгүй байдал, хүний дархлааны тогтолцоонд нөлөөлөх байдал зэргийг давхар судлах гэнэ. КОВИД-19 өвчний эсрэг BNT162 вакцины АНУ дахь клиникийн туршилт удахгүй эхлэх төлөвтэй байгаа ба ХБНГУ-ын Вакцин, Био Анагаахын эмний институт нь коронавирусын халдварын эсрэг вакцины клиникийн туршилтыг явуулахыг энэ сарын 22-нд зөвшөөрсөн билээ. Пфайзер компани өнгөрсөн мягмар гарагт нийтэлсэн тайландаа Пфайзер болон BioNTech компани 2020 оны сүүлээр хэдэн 10 сая, 2021 онд хэдэн зуун сая вакцин үйлдвэрлэх бүрэн боломжтойг онцолжээ.

Их Британид коронавирусын халдварын эсрэг вакцин гаргаж авахаар ажиллаж байгаа Оксфордын Их сургуулийн Женнер Институт нь КОВИД-19 өвчний эсрэг вакциныг энэ пүрэв гарагаас эхлэн хүн дээр туршиж эхэлсэн ба туршилтын үр дүнгээс хамааран, коронавирусын халдварын эсрэг вакцин ирэх 9-р сард бэлэн болох боломжтой хэмээн мэдэгджээ. Албан ёсны мэдээллээр КОВИД-19 өвчний эсрэг вакцины туршилт клиникийн түвшинд 6 газар явагдаж байгаа эхний шатандаа яваа 80 гаруй туршилт бүртгэгджээ.

Эх сурвалж: CNN

Содномцэрэнгийн Энхзаяа 

mongolcom.mn 

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.