Ж.Батзандан, Р.Бурмаа нар байр сууриа тууштай хамгаалав

Twitter Print
2014 оны 04-р сар 30-нд 16:39 цагт
Мэдээний зураг,
Өнөөдөр УИХ-ын Төрийн байгуулалтын байнгын хороо хуралдаж, Ерөнхийлөгчөөс өргөн мэдүүлсэн Засгийн газрын тухай хуульд өөрчлөлт оруулах тухай, УИХ-ын тухай хуульд өөрчлөлт оруулах тухай хуулийн төслүүдийн эцсийн хэлэлцүүлгийг хийж, чуулганы нэгдсэн хуралдаанд хэлэлцүүлэхээр болов.

Байнгын хорооны өнөөдрийн хуралдаанд 19 гишүүний 18 нь  оролцов. Ерөнхийлөгчийн өргөн мэдүүлсэн хувилбараар бол Засгийн газрын гишүүн, УИХ-ын гишүүний албыг давхар хашихгүй байх, түүний дотор зөвхөн Ерөнхий сайд нь УИХ-ын гишүүний ажил, албан тушаалыг давхар хавсарч болохоор тусгасан. Тэгээд ч хуулийн хэрэгжиж эхлэх хугацааг 2016 оны 7 дугаар сарын 1 гээд тун тодорхой заачихаад оруулж ирсэн билээ. Эрхэм гишүүд энэхүү хуулийн давхар дээлээ тайлах гэсэн  зүйл заалт дээр нэгдсэн байр суурьт хүрээд байгаа ч хуулийн хэрэгжилтийг энэ оны 7 дугаар сарын 1-ээс хэрэгжүүлэх үү, эсвэл 2016 оны 7 дугаар сарын 1-ээс хэрэгжүүлэх үү гэдэг дээр байр сууриа нэгтгэж чадахгүй байгаа.

Байнгын хорооны өнөөдрийн хуралдаан ч энэ асуудлаар нэлээн ширүүхэн болж АН-ын эсэргүү гишүүн Ж.Батзандан, Р.Бурмаа нар хуулийн хэрэгжилтийг энэ оны 7 дугаар сарын 1-ээс эхлэх ёстой гэдэг дээрээ бат зогсож тэднийг МАХН-ын Л.Цог, МАН-ын  М.Энхболд, Сү.Батболд, Су.Батболд нарын гишүүд уухайлан дэмжсэн бол, АН-ын бүлгийн дийлэнх олонх нь 2016 оноос эхлэн хэрэгжих нь зүйтэй гэж үзэв.

Тухайлбал, УИХ дахь АН-ын бүлгийн дарга Д.Эрдэнэбат, “Өнөөдөр хуулийн өөрчлөлтийн талаар ярьж суух цаг биш, эдийн засгийн асуудал дээрээ төвлөрөх ёстой” хэмээж суусан. Түүний үзэж байгаагаар “Хэрэв давхар алба хашиж буй Засгийн газрын гишүүдийг ирэх 7 дугаар сараас хольж сольвол Засгийн газрын бүрэлдэхүүний 70 хувь нь шинэчлэгдэнэ. Энэ нь зарим хууль тогтоомжийн холбогдох заалттай харшилдаж, Засгийн газар огцорч байгаа юм шиг байдалд хүрнэ” гэснийг АН-ын эсэргүү хоёроос бусад гишүүд нь ч толгой дараалан дэмжсэн.

Хуулийн төслийн эцсийн хэлэлцүүлэгтэй холбогдуулан С.Баярцогт, Д.Эрдэнэбат, Су.Батболд нарын гишүүн байнгын хорооны даргаас асуулт асууж, М.Энхболд, Сү.Батболд, Д.Эрдэнэбат, Л.Цог, Ч.Сайханбилэг, Н.Батцэрэг, Р.Бурмаа, Ж.Батзандан, Н.Алтанхуяг нарын арав гаруй гишүүн үг хэлсэн. Эцэст нь хуулийн төслүүдийн эцсийн хэлэлцүүлгээр гишүүн С.Баярцогтын гаргасан уг хуулийг 2016 оны Улсын Их Хурлын ээлжит сонгуулийн дүнд байгуулагдсан Улсын Их Хурал бүрэн эрхээ хэрэгжүүлж эхэлсэн өдрөөс дагаж мөрдөх саналаар санал хураалгахад хуралдаанд оролцсон 17 гишүүний 11 нь дэмжиж, байнгын хорооны хуралдаанд оролцсон гишүүдийн гуравны хоёроос доошгүйн дэмжлэг авч чадсангүй. Иймэрхүү байдалтайгаар Төрийн байгуулалтын байнгын хорооны өнөөдрийн хуралдаан өндөрлөж, эцсийн шийдвэр УИХ-ын нэгдсэн хуралдаанаас гарах нь тодорхой болсон юм. 

Сэтгүүлч Д.Энхтүвшин

E-mail: eegii1967@yahoo.com 
Утас: 76110303, 76110505

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.