Эрх зүйн туслалцаа үзүүлэх харилцаан дахь ЗОХИСГҮЙ ҮЙЛДЭЛ

Twitter Print
2020 оны 08-р сар 21-нд 09:46 цагт
Мэдээний зураг,

Эрх зүйн туслалцаа үзүүлэх харилцаанд хуульч болон үйлчлүүлэгч хоёр талын аль аль нь заримдаа ёс суртахуун, ухамсрын хувьд зохисгүй үйлдлүүдийг гаргадаг. Мэдээж бүх хуульч, бүх үйлчлүүлэгч биш зарим хэсэг нь ийм үйлдлүүд гаргадаг бөгөөд аль аль тал нь энэ байдалдаа анхаараад, дараах үйлдлүүдийг гаргахгүй байвал хоёр тал хоорондоо бүрэн дүүрэн, сайн ойлголцож, урт хугацааны сайхан харилцаа тогтох болно.

Зарим үйлчлүүлэгчийн гаргадаг зохисгүй үйлдлүүд

• Тухайн хуульч, өмгөөлөгчийг ямар чиглэлээр үйл ажиллагаа явуулдаг тухай асуулгүй шууд өөрийнхөө хэрэг явдлыг асуудаг. Хуулийн салбар амьдралын бүхий л харилцааг хамарсан өргөн хүрээтэй асуудал байдаг бөгөөд дотроо иргэн, эрүү, захиргааны эрх зүй, цаашлаад тухайн салбар эрх зүй болгон нь олон задраад явдаг. Тиймээс хуульч, өмгөөлөгч нар хэд хэдэн салбараар мэргэшиж судлан, эрх зүйн үйлчилгээ үзүүлдэг. Бид нүдний эмчээс дотор эрхтэний тухай асуудаггүй шүү дээ.

• Нэг удаа нэг асуудлаар зөвлөгөө аваад төлбөрөө төлчихөөд дараа нь тэс өөр асуудлаар хандаж зөвлөгөө авахдаа төлбөр төлдөггүй. Зөвлөгөө болгон уг нь төлбөртэй шүү дээ.

• Утсаар юм уу чатаар юм асууж, зөвлөгөө авчихаад зүгээр утсаар ярьсан гэж бодоод төлбөр төлөх талаар боддоггүй. Тэр нэг асуултанд хариулахын тулд хуульч, өмгөөлөгч нар өчнөөн олон жил сурч, ажилласан байгаа. Бид хувийн эмнэлэг ороод үзлэгийн төлбөр төлөлгүйгээр үзүүлдэггүй шүү дээ. (Жич: сайн найз, таньдаг хүн ганц хоёр удаа юм асуухыг бичээгүй болно.)

• Эрх зүйн үйлчилгээ үзүүлэх гэрээнд заасан хуульчийн хийх ёстой үүрэг, даалгавраас өөр зүйл хийхийг шаардаад байдаг. Тухайлсан хэрэг маргаан дээр хуульч, өмгөөлөгч хөлсөлж авчихаад дундуур нь өөр хэрэг маргааны зүйл асуугаад байдаг, эсвэл хуульч, өмгөөлөгчийн хийх ажлын хүрээнд хамааралгүй хүсэлт бичүүлэх, ажил хөөцөлдүүлэх гэж оролдох гэх мэт.

• Хэрэг маргаан шүүхээр шийдвэрлэгдсэний дараа өөрийнх нь талд шийдвэр гараагүй бол өмгөөлөгчдөө уурлах, буруутгах зэрэг зохисгүй зан авир гаргадаг. Хуульч, өмгөөлөгч нар өөрсдөөсөө шалтгаалах бүхий л арга хэмжээг хуулийн дагуу авч хэрэгжүүлдэг бөгөөд гэсэн ч эцсийн шийдвэрийг шүүгч л гаргадаг учраас хэрэг маргааны нөхцөл байдал, үйлчлүүлэгчийн хийсэн буруутай үйлдэл зэргээс шалтгаалан үйлчлүүлэгчийн хүссэнээр шүүхийн шийдвэр, хүссэн үр дүн нь гарахгүй байх тохиолдол байдаг. Жишээ нь үйлчлүүлэгч гэмт хэрэг үйлдсэн үйлдэл байгаа л бол өмгөөлөгч тэрийг хийгээгүй, үйлдээгүй болгох боломжгүй шүү дээ, зөвхөн хуулийн хүрээнд ял хөнгөрүүлэх нөхцөл байдал байгаа эсэх дээр л ажиллана.

• Хэрэг маргаан шүүхээр шийдвэрлэгдсэний дараа өөрийнх нь талд шийдвэр гараагүй бол хуульчийн төлбөрөө нэхдэг. Эцсийн үр дүн яаж гарахаас үл шалтгаалан хуульч, өмгөөлөгч нар дээр дурдсаны дагуу хийх ёстой бүхий л арга хэмжээг авч хэрэгжүүлэн, шүүх рүү өчнөөн олон удаа ирж очин, олон хүсэлт, гомдол өгч, олон шүүх хуралд оролцоод явчихсан байдаг. Гэтэл хүссэн үр дүн гарсангүй гээд хуульч, өмгөөлөгчийн 2-3 жилийн хөдөлмөрийг үгүйсгэж болохгүй шүү дээ.

Зарим хуульч, өмгөөлөгчийн гаргадаг зохисгүй үйлдлүүд

• Үйлчлүүлэгчээс тухайн хэрэг маргаан дээр нь ажиллах төлбөрөө авдаг байж, нэмж өөр зүйл шаардаж, хийлгүүлээд байдаг. Жишээ нь заавал үйлчлүүлэгчээр хүргүүлэх, хоол авхуулах, үйлчлүүлэгчийн хийдэг ажилтай нь холбоотой зүйлс өөртөө хийлгүүлэхээр шаардах гэх мэт.

• Үйлчлүүлэгчээс цаашаагаа шүүх, прокурорт өгнө хэмээн мөнгө авч, авилгал дэмжсэн үйлдэл хийдэг.

• Үйлчлүүлэгчийнхээ эсрэг тал буюу нөгөө талд нь мэдээлэл өгөх зэргээр хоёр талд ажиллаж, хоёр талаас мөнгө авдаг.

• Үйлчлүүлэгчийнхээ мэдээллийг олон нийтэд дэлгэдэг. Сүүлийн үед зарим хуульч, өмгөөлөгч нар өөрийгөө сурталчлах, өөрийнхөө карьерийг өсгөх зорилгоор үйлчлүүлэгчийнхээ зөвшөөрөлтэй, зөвшөөрөлгүй нь хамаагүй үйлчлүүлэгчийнхээ мэдээлэл болон шийдэгдээгүй байгаа хэрэг маргааны талаар фэйсбүүк, сонин, сэтгүүл зэрэг хэрэгслээр дэлгэж байгаа нь холбогдох хууль, дүрмээ зөрчиж байгаа хэрэг. Зүй нь хуульч нь үйлчлүүлэгчээс зөвшөөрөл өгсөн, агуулгаараа нууцад хамаарахгүй, олон нийтэд нэгэнт ил болсон эсхүл үйлчлүүлэгчийн эрх, ашиг сонирхлыг хамгаалахын тулд зайлшгүй задруулах шаардлагатай мэдээллээс бусад үйлчлүүлэгчид хууль зүйн үйлчилгээ үзүүлэхтэй холбоотой мэдээллийг задруулахыг хориглодог.

• Шүүх хуралдаа хоцрох, ирэхгүй байх, хуралдааныг орхиж гарах зэрэг зохисгүй үйлдэл гаргадаг. Нэгэнт тухайн үйлчлүүлэгчтэй гэрээ байгуулаад, төлбөрөө авсан бол шүүх хуралд заавал очих, шүүх хуралдааны танхимыг өөрийн дураар орхиж гарахгүй байх ёстой.

Хуульч, өмгөөлөгч П.Анударь

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.