Унтарсан итгэл сэргэсэн, тасарсан найдлага эргэсэн өдөр

Twitter Print
2020 оны 05-р сар 05-нд 09:17 цагт
Мэдээний зураг,

2020 оны 5 дугаар сарын 4-ний өдөр. Энэтхэгт гацсан монголчуудын улаан голтойгоо хамт тасарчих гээд байсан итгэл сэргэсэн өдөр. Ингэж хэлж байгаа нь хэдий сүржин мэт боловч эцэстээ очиход үнэнд ойр юм. 

Төр түмэн нүдтэй, төрсөн бие ганц нүдтэй. Төрсөн биеийнхээ ганц нүдийг ширгэтэл хараад, долоон тамирыг барагдтал орилоод төрийн түмэн нүдэнд итгэл алдарсан үе. 2020 оны 5 дугаар сарын 4-ний өдөр. Төр түмэн нүдэндээ туйлдсан иргэдээ болгоож байдгийг, Улсын Ерөнхийлөгч нь хүртэл санаа чилээж явдгийг мэдсэн өдөр. Унтарсан итгэл сэргэсэн, тасарсан найдлага эргэсэн өдөр. 

“Гадаад улс орнууд руу дараагийн чартер нислэгүүдийг хийх нь зүйтэй гэж Улсын онцгой комиссын гишүүд үзсэн байна. Ингэхдээ Монгол Улсын Ерөнхийлөгчийн санал болгосноор Бүгд Найамдах Энэтхэг Улс руу захиалгат нислэг хийх боломж, нөхцөлийн талаар судалж, танилцуулахыг холбогдох албан тушаалтнуудад УОК-ын дарга үүрэг болгов” гэжээ.

УОК-ын шийдвэр иргэдийнхээ талд л гараасай билээ. Итгэл бүү бөхөөсэй. Энэтхэгт хагалгаанд амжилттай ороод анх удаа хөл дээрээ алхсан, хоол ундгүй сульдаад буцаад орондоо хэвтсэн 13-хан настай Учрал охин энэ зун Монгол эх орныхоо хөрсөн дээр зуны цэцэгтэй хамт ургаж, хөлд орж, зуны эрвээхэйтэй хамт дэрвэж гүйгээсэй. Ээжийнх нь ярилцлагыг уншаад хамт нулимс унагахдаа энийг элэг зүрхнээсээ ямар их хүсэв ээ. Тархалт ихтэй, дахисан хорт хавдрын хүнд хагалгааг 2 удаа хийлгэж, туяа, химийн эмчилгээгээ даваад, +40 хэмийн халуунд зүрх, даралт тогтворгүй, хоол ундгүй туйлдаж, эрүүл болоод үр хүүхдүүддээ очих гэсэн эхийн сэтгэлээр шүд зуун тэвчиж, тэмцэж байгаа Улсын алдарт эх Алтанжаргал эгч үр хүүхдүүдтэйгээ мэнд түргэн золгоосой.

Элэг солиулах хагалгаанд элэгнээсээ тасалсан хоёр сайхан охиныхоо элгийг авч орсон аав, донор болсон хүний сайн үрс, эх орондоо буцаж чадахгүй элэг эмтэрч суугаа нэг гэрийн 5 ам бүл эх нутагтаа очоосой. Улсын алдарт уяач өвгөн ахын хийморь “Эрүүл явж, улсынхаа наадмыг үзэж” сэргээд, бие нь тэнхрээд ирэхийг дуулах сан. Нутгийн зон олон, ахан дүүсийнхээ дэмээр 2 настай охиныхоо зүрхний хагалгааг амжилттай хийлгээд эх орон, элгэн түмэндээ эрүүл саруул охиноо тэврээд харих хоногоо тэсэж хүлээж байгаа Бааска Тогтох эгч бүү цөхрөөсэй. 

300 лам хүүхэд гэхээр л эсрэг нь 300 инженер яриад хүний нялх хүүхдүүдийг хүртэл доромжилж, муусаа цутгахдаа тултал дор орчихсонд харамсах юм. Хүний амьдралаар амьдарч үзээгүйгээс цааш хэнд ч гай тариагүй балчир хүүхдүүдийг шүүж яанам бэ? Хөөрхий энэ хэдэн хүүхдийн ихэнх нь ядуу тарчиг амьдралын мөрийг дагаж яваа болохыг, бүгд биш боловч их л олон нь өрх толгойлсон эмэгтэйчүүдийн хүүхдүүд байдгийг олж мэдсэн. Ямартай ч баян цатгаландаа лам болоогүй, баян цатгалан болох гэж номд шамдаагүйг ойлгосон. Эх орондоо ирээдүй нь тодорхойгүй гудамжинд явснаас мөр бүтэн, гэдэс цатгалан байг, бурхны номоор дамжиж, хүний номтой болог, эх дэлхий, хамаг амьтныг энэрэх сэтгэлтэй болог гэсэн эхийн сэтгэлээр л явуулснаас гарцаагүй, энх эсэн эргэж ирэхийг нь хүлээж байгаагаас зайлахгүй.

Лам нар дээрээсээ даалттай, дэргэдээсээ хангамжтай сайн байгаа л гэнэ. Арван хэдхэн хавар үзсэн хүний нялх үр харах хандах хайртай хүмүүсээсээ хол, нэг л дотор нь ороод ирвэл хэнийг ч ялгалгүй нэрвэж мэдэх аюулт тахлын дунд бяцхан зүрхэндээ юу тээж, балчир оюундаа юу тунгааж суугааг хэн маань мэдэх юм. Нэг л их хүний өмнөөс ярьсан улс. Харих хүсэлтэй болоод л горь итгэл тээж, буцах хүмүүсийн тоонд нь орж, толгойнд нь багтаа байлгүй дээ. 

300 инженер л гэнэ, хэзээ энэ хүүхдүүдэд олддог 300 инженерийн боломж юм. Үнэнийг шулуухан хэлэхэд, эрх мэдэлтэй хүмүүс үр хүүхдүүдээ аль хэдий нь тэр инженерээр чинь төрийн зардлаар сургаж, сэтэр зүүлгээд-дарга болгоод, одоо тэр төлбөрийн зээлийг нь тэглүүлэх гээд л яваа биз дээ. Тэр инженер чинь аль хэдий нь эзэн нь тодорхой болчихсон, одоо наад үлгэрээ зогсоо. Их яривал энэ нийгэмд чинь инженерийн гэрлээс илүү сэтгэлийн гэгээ хэрэгтэй байгааг инженер яриад байгаа хүмүүсээс нь олж харлаа. Гэтэл тэр ламхай нар чинь олноороо нэг дор суугаа бид л гэхгүй бол хүний газарт ядарч яваа нэгнийг минь хэн, хаанаас гэх вэ гээд бага ч болтугай мөнгө цуглуулаад тус болохоор хайж байна, мэдэв үү?

Гадаад хүн суулгаж болохгүй гэсэн төр захиргааны шийдвэрээс нь болоод сайхан сэтгэлтэй хүний нөмөрт хүнсний агуулахад нь хоног төөрүүлж байгаа монгол ахан дүүгээ үзлээ. Цар тахлын үед хууль журмыг нь зөрчөөд, машины тэвшин дээр хоргодож нутаг руугаа яваа өвгөн настныг тосгоноороо аминд нь хүртэл нүдэж байгаа бичлэг үзээд хөөрхий элэг нэгтэн минь ч бодогдож, түгшүүр төрөх. 

Нэг сар гаран махны бараа хараагүй оюутнууд, бага насны хүүхдүүдээ орхиод ирсэн ээжүүд, халуун орны уур амьсгал, орчин нөхцөл, хоол хүнсийг эрүүл мэндийн хувьд тэсвэрлэхэд хэцүү болсон, эх орондоо байгаа ар гэр нь болохоор санхүүгийн асуудалд орсон, Энэтхэгт өөрөө болохоор халдварын халуун цэгүүд хаяанд нь тулаад ирчихсэн, цар тахлын нэрвэгдэл, өлсгөлөн зовлон, хоол хүнсний хомсдолоосоо болоод ёс суртахууны уналт газар авч, засаглалын хийгээд хүмүүнлэгийн хямрал нүүрлээд, хэзээ мөдгүй дайраад ороод ирэх вий гэж ядуусын хороололтой хашаа залгаад түгшиж суугаа хэдий ч ямартай ч амарч зугаалаагүй урт болон богино хугацаагаар суралцаж байгаа оюутан залуус, төрийн албан хаагчид бид энэ хүмүүсийнхээ дэргэд юу ч ярих билээ дээ. 

УОК-ын шийдвэр иргэдийнхээ Үндсэн хуулиараа баталгаатай эдлэхээр заасан эрүүл, амьд явах, эх орондоо буцах эрхийн талд л гараасай билээ. Итгэл бүү бөхөөсэй. Одоо энэ сэргэсэн итгэл бөхвөл, эргэж сэргэхгүй. Итгэл бөхсөнөөсөө, төр засагтаа гомдсоноосоо эхэлж, энэ хүмүүс бие, хэл, сэтгэлээрээ зул шиг бөхнө, ул болно. Энэ цар тахлын үед гуравхан сая Монголын 500 гаруй элгэн садан, хүүхдийн ээж аав, хүний хүү охин энэ 1.3 тэрбум хүний дунд хумхын тоос болчихгүйхэн шиг, хэрхэн, аль болох удаан тэсэж үлдэх вэ гэдэгтээ бэлдэнэ. Шуудхан хэлбэл нөмөрч ирэх үхлийг хэрхэн сөрөх вэ, хэрхэн үхэлд бэлдэх вэ. 

Эцэст нь хэлэхэд ийм хүмүүс талхаа шиддэггүй, хоолоо голдоггүй юм за юу. Итгэл бүү бөхөөсэй. Төрийн минь сүлд өршөө.

С.Чулуунпүрэв

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.
    • ЗОЧИН

      (64.119.23.32) 2020-05-05 12:17
      • 0
      • 1

      Энэ төр засаг нь нэг арга хэмжээ аваасай. Шалтаг тоочвол нэг ч ажил бүтэхгүй, сэтгэл гаргавал бүтэхгүй ажил гэж нэг ч байхгүй. Төрийнхэн толгойгоо ажиллуулж, сэтгэл гаргаач! Цаана чинь олон хүн дээшээ тэнгэр хол, доошоо газар хатуу болоод сууж байна.

      Хариулах