Н.Түвшинбаяр ОУОХ-ны анхны хуралдаа оролцлоо

Twitter Print
2020 оны 10-р сар 06-нд 16:43 цагт
Мэдээний зураг,

Олон Улсын Олимпын Хороо/ОУОХ/-ны ерөнхийлөгч Томас Бах энэ сарын 02-ны өдөр ОУОХ-ны нийт гишүүн Үндэсний Олимпын хорооны ерөнхийлөгчидтэй цахим уулзалт хийж, “Токио-2020” олимпын наадмын талаар чөлөөт ярилцлага өрнүүллээ.

Цахим уулзалтад нийт 150 гаруй орны Олимпын хорооны ерөнхийлөгч оролцсон бөгөөд ярилцлага хоёр цаг орчим үргэлжилсэн юм. Цахим уулзалтын эхэнд ОУОХ-ны Ерөнхийлөгч Томас Бах “Токио-2020” олимпийн наадмыг аюулгүй, амжилттай зохион байгуулахаар бэлтгэл ажлаа хичээнгүйлэн хийж, хичээл зүтгэл гарган шуурхай арга хэмжээ авч ажиллаж байгаа Японы шинэ Ерөнхий сайд болон Олимпын хорооны зохион байгуулах комисст талархал илэрхийлээд “ОУОХ-ны зүгээс бүх талаар нь дэмжиж, үйл ажиллагаанд нь нягт уялдаатай хамтран ажиллах болно гээд зарим мэдээллийг өгсөн юм.

Томас Бах: -Дэлхий даяар Ковид-19 цар тахал гарсантай холбоотойгоор олимпын наадмын үеэр онош хурдан тогтоох түргэвчилсэн тестүүдийг ашиглах болно. Үүнээс гадна Дэлхийн эрүүл мэндийн байгууллага/ДЭМБ/-тай хамтран Ковид-19 вакцин гаргаж авахад онцгойлон анхаарч ажиллаж байна. Вакцины хоёр болон гуравдугаар шатны туршилт амжилттай болбол дараагийн шатны туршилтуудыг ирэх онд болох олимпын наадмаас өмнө дуусгаж хэрэглээнд нэвтрүүлэх зорилготой байна гэсэн юм. Мөн цахим уулзалтын үеэр Беларусын улс төрийн нөхцөл байдал болон Иран улс тамирчиндаа цаазын ял өгсөнтэй холбоотойгоор ОУОХ-ны байр суурийг илэрхийлсэн.

Ингэхдээ хэдийгээр бид улс орнуудын дотоод үйл хэрэгт оролцох боломжгүй ч спортоор дамжуулан хүний эрх, эв нэгдлийг хангах, ялгаварлан гадуурхалтыг багасгах зорилготой хэмээн мэдэгдсэн. Энэ үеэр Монголын Үндэсний Олимпын Хорооны Ерөнхийлөгч Н.Түвшинбаяр “Монгол Улс “COVID-19” цар тахалыг дотооддоо алдаагүй орны нэг болсон. Мөн энэ халдварьт өвчин гаднаас зөөвөрлөгдөн орж ирсэн ч дотооддоо бүрэн хяналтад авч эмчилж чадаж байна. Түүнчлэн хэдийгээр дэлхий нийтийг хамарсан цар тахал гарч хөл хорио тогтоосон ч манай тамирчид “Токио-2020” олимпын наадмын бэлтгэлээ тасралтгүй хийж, бэлтгэлээ хангаж байна” гээд цар тахал гарсан энэ онцгой нөхцөл байдлын үед олимпын наадам зохион байгуулахаар ажиллаж буй нийт хамтран зүтгэгчиддээ амжилт хүссэн юм.

Үүний хариуд ОУОХ-ны ерөнхийлөгч Томас Бах Олимпийн аварга Н.Түвшинбаярыг МҮОХ-ны ерөнхийлөгчөөр сонгогдсонд баяр хүргээд ажлаа амжилттай хийнэ гэдэгт нь огтхон ч эргэлзэхгүй байна гэсэн юм.

Эх сурвалж: МҮОХ-ны хэвлэлийн алба 

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.