М.Пүрэвтунгалагийн аав С.Мөнхбат: Э.Сумъяа миний охины боломжийг хулгайлж явчихаад ядаж хөл аваад сурчихгүй

Twitter Print
2019 оны 10-р сар 02-нд 13:15 цагт
Мэдээний зураг,

Баянхонгор аймгийн харьяат 18 настай залуу тамирчин М.Пүрэвтунгалаг Чөлөөт бөхийн өсвөрийн болон насанд хүрэгчдийн УАШТ-ий 53 кг-д түрүүлж, ДАШТ-д оролцох эрхтэй болсон ч, эрүүл мэндийн гэх шалтгаанаар түүний оронд Э.Сумъяаг явуулсан билээ.

Үүнийг М.Пүрэвтунгалагийн аав эсэргүүцэн, өлсгөлөн зарлахаа мэдэгдсэн ч, эцэстээ ойлголцолд хүрч, тэмцлээ зогсоосон. Гэвч Э.Сумъяа ДАШТ-д амжилтгүй оролцож, хоёрдугаар тойрогт ялагдсан юм. Тэгвэл М.Пүрэвтунгалагийн аав С.Мөнхбат өнөөдөр дахин хэвлэлийн бага хурал зарлаж, түүний охины оронд ДАШТ-ын хүрэл медальт тамирчин Э.Сумъяаг явуулах тохироог аль эрт хийсэн байсан гэдгийг сэтгүүлчдэд мэдээллээ.

Тэрбээр “Миний охин М.Пүрэвтунгалаг 2013 оноос хойш чөлөөт бөхөөр хичээллэсэн. Энэ хавар АНУ-д болсон залуучуудын тэмцээнд оролцож, мөнгөн медаль авсан. Залуучуудын улсын аваргад 57 кг-д түрүүлсан. Насанд хүрэгчдийн УАШТ-д 53 кг-ын жинд өрсөлдөж, түрүүлсэн. Улмаар ДАШТ-д явах эрхээ авсан ч явж чадаагүй. Энэ жилийн ДАШТ-д оролцох эрх авсан 20 тамирчнаас миний охиноос бусад нь явсан. Оронд нь Э.Сумъяа явсан  ч амжилт үзүүлж чадсангүй.

Миний охиныг хатиггүй байхад нь хатигтай гэж шалтаг заагаад, явуулаагүй. Гэтэл ДАШТ-д оролцсон тамирчдаас хоёр нь хатигтай байсан юм билээ.  Эрэгтэй, эмэгтэй нэг нэг тамирчин. Би нэрийг нь хэлэх боломжгүй байна.  Би нэг баримт хэлье. Едсүгээр сарын 2-ны өдөр миний охиныг ДАШТ-д явуулахгүй байх тохироогоо хийчихсэн байсан юм билээ. Улмаар есдүгээр сарын 4-ний өдөр ДАШТ-ий мэдүүлэгт Э.Сумъяагийн нэрийг багтааж явуулж, 5-ны өдрөөс Насанбат гэдэг эмчтэй нийлж, хатигтай гэдэг тодорхойлолт гаргасан байдаг.  Энэ мэтээр хуйвалдаж, эмчилгээ хийлгэсэн асуудлыг нь мушгиж, гуйвуулж манай хүүхдийг зайлуулсан.

Чөлөөт бөхийн холбооны нарийн бичгийн дарга Батбаяр надад “Энэ тамирчинг алтан медаль авах хэмжээнд бэлтгэсэн” гэж надад хэлж байсан. Гэвч хоёр тойрогт барилдаад л ялагдсан. Баттулга аа, чиний төсвийн хөрөнгөөр 60 хоног бэлтгэсэн тамирчин чинь хоёрхон минут барилдаад л хялайсан. Э.Сумъяа аа, чи миний охиноос боломжийг нь хулгайлж явчихаад ядаж хүний хөл аваад сурчихгүй яасан юм. Чөлөөт бөх гэдэг чинь чөлөөтэй барилдахын нэр. Гэтэл ядаж л хөл аваад сурчихгүй, хоёр минут барилдаад л хялайж байна билээ. Тийм байж яагаад хүний боломжийг хулгайлдаг юм бэ. Өмнө нь бас Даваажав гэдэг тамирчны боломжийг хоёр ч удаа булааж байсан юм билээ. Улсын аваргад ганц л түрүүлсэн бөх. 

Image result for Чөлөөт бөхийн ДАШТ Э.Сумьяа уйлжээ

Чөлөөт бөхийн холбооны удирдлагууд миний хүүхдийг 3 том тэмцээнд явах боломжийг нь хаасан. Дэлхийн залуучуудын аварга шалгаруулах тэмцээнд явуулаагүй. Ази тивийн залуучуудын аварга шалгаруулах тэмцээнд бас явуулаагүй юм. Сая ДАШТ-д явуулсангүй.  Хэрвээ ДАШТ-д явуулахгүй гээд эрт хэлчихсэн бол би хувиасаа зардал гаргаад, бусад тэмцээнд явуулах байсан.

Дасгалжуулагч Баттулга Монголд ирээд ажлаа өгөх болов уу гэж би бодож байсан. Гэтэл амжилт муутай оролцчихоод хэвлэлээр “Би олимпын аварга төрүүлнэ” гэж ярьсан байсан.  Надад Э.Сумъяаг олимпын аварга болгоно гэж ярьж байгаа юм шиг санагдсан. Сүүлийн хэдэн жил шигшээ баг амжилт гаргахгүй байхад яаж ингэж хэлж чадаж байна аа” хэмээн ярилаа. 

Г.Ганаа 

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.