Токио хотын дарга хүзүүтэй цамц өмсөж, эрчим хүчний хэрэглээгээ танахыг уриалжээ

Токио хотын дарга Юүрико Койкэ иргэдийг дулаан явахын тулд хүзүүтэй цамц өмсөж, эрчим хүчний хэрэглээгээ хэмнэхийг уриалжээ. Түүний хэлснээр хүзүүтэй ноосон цамц нь эрчим хүч хэмнэхэд туслах аж.

Тэрээр, "Хүзүү дулаан явах нь биеийн дулааныг хадгалахад тустай байдаг. Би өөрөө ч хүзүүтэй цамц өмсөж байна. Бас хүзүүндээ ороолт зүүх нь дулаахан явахад тустай байдаг. Дулаан явах нь эрчим хүч хэмнэхэд тустай. Энэ бол хатуу ширүүн өвлийн цаг агаарыг хамтдаа давахад туслах нэг арга зам юм." хэмээн өнгөрсөн баасан гарагт сэтгүүлчдэд мэдэгджээ.

Юүрико Койкэ уг мэдэгдлээ хийхдээ "хүзүүтэй цамц өмсөх дуртай" Францын Ерөнхийлөгч Эммануэль Макроныг онцолжээ.

Япон улсын хувьд жил бүр эрчим хүч хэмнэх кампанит ажил явуулдаг ба халуун цаг агаартай зуны улирлын үед явуулдаг "сэрүүн бизнес" кампанит ажлын хүрээнд оффист ажилладаг ажилчдадаа энгийн хувцаслахыг зөвшөөрдөг, харин өвлийн улиралд "дулаан бизнес" нэртэй кампанит ажил өрнүүлдэг аж.

2050 он гэхэд хүлэмжийн хий ялгаруулдаггүй улс болно гэсэн зорилт тавьсан Япон улсын хувьд Украинд болж буй дайнтай холбоотойгоор бусад улс орнуудын адилаар эрчим хүчний хямралд өртөөд байгаа билээ.

Японы Ерөнхий сайд Фүмио Кишида өнгөрсөн 8-р сард импортын эрчим хүчний үнэ нэмэгдсэнтэй холбоотойгоор цөмийн эрчим хүчнийхээ салбарыг дахин идэвхжүүлэхийг уриалсан юм.

2011 онд цунамигийн улмаас Фүкүшимагийн АЦС-д гарсан ослын дараагаар Япон улс цөмийн эрчим хүчний хэд хэдэн реакторуудынхаа үйл ажиллагааг аюулгүй байдлын улмаас зогсоосон юм.

Арван нэгэн жилийн өмнө болсон уг ослоос хойг Япон улс цөмийн 33 реакторынхаа 10-ыг нь дахин ажиллуулж эхэлсэн ч тэдгээр нь импортын эрчим хүчийг бүрэн орлож чадахгүй байна.

Эх сурвалж: The Guardian

Содномцэрэнгийн Энхзаяа

mongolcom.mn

 

Энэ мэдээ танд таалагдаж байвал LIKE хийгээрэй. Танд баярлалаа.