Генерал Б.Баярмагнай: Би Үндэсний фронтоо орхиогүй

Ард түмний эв нэгдлийг хүндэтгэнэ хэмээн хэдэнтээ тангараг өргөсөн генерал Б.Баярмагнай “шаардлагатай бол цэргийн эргэлт хийнэ”, “УИХ-ыг тараах хэмжээний том жагсаал зохион байгуулна” гэх зэргээр ард иргэдийг турхирч уриалан дуудсан.

Харин өөрийг нь шүүмжилсэн сэтгүүлчдийг бүлэглэлд үйлчилсэн, хөлсний гэх зэргээр гоочилж байсан нь саяхан. Гэтэл сүржин гэгч нь гарч ирээд эцэстээ “цэргүүдээ орхих”-оо тэр мэдэгдэв. Тэрбээр “Монголын үндэсний фронт” хөдөлгөөний тэргүүн бөгөөд өнгөрсөн баасан гарагт Сүхбаатарын талбайд “Эх орон дуудаж байна” гэх жагсаалыг зохион байгуулсан. Жагсаалд оролцогчид сэтгүүлч бүсгүйд бэлгийн дарамт үзүүлэхээс эхлээд Төрийн ордныг бүслэх зэргээр зохисгүй авирлаж байсныг эх сурвалж мэдээлж байв. Гэтэл тэргүүн нь өөрийн цахим хуудастаа фронтынхоо тэргүүн шугамыг орхиж буйгаа албан ёсоор зарласан юм.

Хошууч генерал Б.Баярмагнай “Миний бие ар гэрийн шалтгаанаар Монголын үндэсний фронтын ажлаас удаан хугацаагаар хөндийрч байгааг үүгээр мэдэгдэе. МҮФ-ыг Монголын төр, ард иргэд хүлээн зөвшөөрөгдөх хүртэл хэмжээнд хамт явсан фронтын нөхөддөө баярлалаа” гэсэн байв.

Харин өнөөдөр сэтгүүлчдэд "Би фронтоосоо гараагүй. Хадам хөгшний бие муудаад сахиж байна" гэх тайлбар өгчээ. 

Г.Ганаа

 

Энэ мэдээ танд таалагдаж байвал LIKE хийгээрэй. Танд баярлалаа.