Авлигын хэрэгт холбогдсон Испанийн Хаан Хуан Карлос эх орноосоо явжээ

Twitter Print
2020 оны 08-р сар 04-нд 10:51 цагт
Мэдээний зураг,

Авлигын хэргээр шалгагдаж буй Испанийн Эзэн хаан асан Хуан Карлос эх орноосоо явахаар шийдсэн тухай Испанийн хааны ордноос мэдээлжээ. 82 настай Хуан Карлос эх орноосоо явж буй талаараа хүү 6-р Фелипед бичсэн захидалдаа бичсэн ба тэрээр прокурорын шаардлагыг биелүүлнэ гэдгээ ч мөн захидалдаа дурджээ.

Өнгөрсөн 6-р сард Испанийн Дээд шүүхээс Саудын Арабад хурдан галт тэрэгний зам тавих гэрээнд Испанийн Эзэн хаан асан Хуан Карлос холбогдсон хэргийг шалгаж эхэлсэн юм. 1975 онд Испани улсыг удирдаж байсан Франциско Франког нас барсны дараагаар улсаа дарангуйллын тогтолцооноос ардчилсан тогтолцоо руу чадварлагаар шилжүүлж чадсан удирдагч хэмээн түүхэнд тэмдэглэгдсэн Хаан Хуан Карлосын хувьд авлигын хэрэгт холбогдон, 2014 онд хаан ширээнээсээ бууж, хаан сэнтийгээ хүү 6-р Фелипед шилжүүлсэн билээ.

Өнгөрсөн 3-р сард Испанийн хаан 6-р Фелипе аав Хуан Карлосын хөрөнгийг өвлөж авахаасаа татгалзсан ба ордны зүгээс хаан асан Хуан Карлост жилийн 195 мянган еврогийн тэтгэмж олгодог байснаа зогсоохоор болсон юм. Испанийн Дээд шүүхээс Саудын Арабын Мекка хотоос Медина хот хүртэл Испанийн компаниуд хурдан галт тэрэгний зам тавих явцад хаан Хуан Карлос Саудын Арабын талаас олон сая ам.долларын авлига авсан хэргийг шалгаж байгаа аж. Түүнчлэн хэрэгт Швейцарийн банкууд холбогдсон ба Испанийн авлигатай тэмцэх газар Хуан Карлос хөрөнгө орлогын мэдүүлэгтээ мэдүүлээгүй их хэмжээний мөнгийг Швейцарийн банкуудад хадгалсан байж болзошгүй хэмээн үзэж байгаа аж.

Испанийн хаан Хуан Карлос чухам хаана байрлах нь тодорхойгүй байгаа ч тэрээр Испани улсыг хэдийн орхин гарсан талаар Испанийн хэвлэл мэдээллийнхэн онцолжээ.

Эх сурвалж: BBC

Содномцэрэнгийн Энхзаяа 

mongolcom.mn 

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.