Тайландын шоронгууд коронавирусын халдварын голомт болжээ

Twitter Print
2021 оны 05-р сар 18-нд 09:08 цагт
Мэдээний зураг,

Тайландад коронавирусын цар тахал эхэлснээс хойш нэг өдөрт бүртгэгдэх коронавирусын халдварын тоо хамгийн өндөр үзүүлэлтэндээ хүрчээ. Өнгөрсөн даваа гарагт тус улсад КОВИД-19 өвчний 9635 тохиолдол бүртгэгдсэний 6853 нь хоригдлуудаас илэрсэн байна.

Тайланд улс өнгөрсөн жилийн турш коронавирусын халдварын тархалтыг хяналтандаа байлгаж чадсан ч өнгөрсөн 4-р сараас тус улсад коронавирусын халдварын тархалт огцом нэмэгджээ. Цар тахал эхэлснээс хойш тус улсад нийт 111 082 тохиолдол илэрсэн ба өнгөрсөн даваа гарагт уг вирусын халдварын улмаас 25 нас барж, нийт нас барагсдын тоо 614-т хүрчээ. Хүний эрхийг хамгаалах Human Rights Watch байгууллагын Ази тивийг хариуцсан захирлын онцолсноор Тайландын эрх баригчид нөхцөл байдал дордхоос өмнө яаралтай арга хэмжээ авч чадаагүй аж.

Тайландын засгийн газраас мэдээлснээр засан хүмүүжүүлэх 8 төвийн 24 537 хоригдлуудаас авсан шинжилгээгээр 10 748 нь коронавирусын халдвар авсан нь илэрчээ. Хойд зүгийн Чиан Мэй мужид байрлах засан хүмүүжүүлэх төвийн нөхцөл байдал хамгийн хүнд байгаа ба тус хорих төвийн нийт хоригдлуудын 61 хувь нь коронавирусын халдвар авсан нь тогтоогдсон байна.

Тайландын Шүүхийн шийдвэр гүйцэтгэх газар засан хүмүүжүүлэх төвүүд дэх коронавирусын халдварын тархалтыг хяналтандаа авахын тулд хоригдлуудыг коронавирусын эсрэг вакцинд хамруулж, шинэ хоригдлуудыг 21 хоног тусгаарлаж, коронавирусын халдвар илрүүлэх шинжилгээг эрчимжүүлэх ажлыг эхлүүлжээ.

Өнгөрсөн сарын 25-нд Бангкокийн Риманд хорих төвд коронавирусын халдварын 10 тохиолдол бүртгэгдэж байсан бол өнгөрсөн долоо хоногт энэ тоо 1960 болтлоо өсчээ.

Human Rights Watch байгууллагаас мэдээлж байгаагаар Тайландын 143 хорих төвүүдэд нийт 380 мянган хүн хоригдож байгаа ба хоригдлуудын тоо хэтэрхий их байгаагаас болж тэдгээр хоригдлууд бүгд коронавирусын халдвар авах өндөр эрсдэлд оржээ. Үүнтэй холбоотойгоор Тайландын эрх баригчид хоригдлуудад халдвараас сэргийлэх бүхий л арга хэмжээг авч, бусдад ноцтой аюул учруулахгүй хоригдлуудыг суллаж, хорих ангиудын ачааллыг багасгах шаардлагатай гэжээ.

Үүний хариуд Тайландын эрх баригчид хоригдлуудын тоог 310 мянга болтол бууруулсан гэдгээ мэдэгдсэн байна. Тайландын эрх баригчид Бангкок хотод үйл ажиллагаа явуулдаг зоогийн газруудыг нээх шийдвэр гаргахаар төлөвлөж байсан ч халдварын тоо огцом нэмэгдэж эхэлснээр уг төлөвлөгөөг хэрэгжүүлэх эсэх нь тодорхойгүй болоод байна.

Бангкок хот даяар амралт чөлөөт цаг өнгөрүүлэх төвүүд ажиллахгүй байгаа ба улс даяар томоохон худалдааны төвүүд оройн 9 цагт хааж байгаа юм. Тайландын хувьд өнөөдрийн байдлаар коронавирусын эсрэг 2.2 сая тун вакциныг эрүүл мэндийн салбарынхан болон халдвар авах өндөр эрсдэлтэй бүлгийн хүмүүст хийгээд байна.

Эх сурвалж: https://www.bbc.com/news/world-asia

Орчуулсан: Содномцэрэнгийн Энхзаяа

mongolcom.mn

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.