НАТО-гийн гишүүн орон Турк улс Швед, Финлянд улсын НАТО-д элсэх хүсэлтийг нь дэмжихээ илэрхийлжээ.
Турк улсын хувьд дээрх хоёр улс нь "Курдистаны Ажилчдын нам" зэвсэгт бүлэглэл болон өөр бусад алан хядах бүлэглэлүүдтэй холбоотой хүмүүсийг орогнуулдаг хэмээн НАТО-д элсэх хүсэлтийг нь хүлээн авахгүй гэж мэдэгдэж байсан билээ.
Нөгөө талаас Финлянд, Швед хоёр улс Туркийн дэмжлэггүйгээр Умард Атлантын эвсэлд нэгдэх боломжгүй юм.
ОХУ-ын хувьд Финлянд, Швед хоёр улс НАТО-д нэгдэх хүсэлтийг нь эсэргүүцэж буйгаа илэрхийлсэн юм.
Гэсэн ч ОХУ Украин руу довтолсон нь Швед, Финлянд хоёр улсын хувьд олон жилийн турш баримталж ирсэн төвийг сахих бодлогоосоо татгалзахад гол нөлөө үзүүлсэн юм.
Турк, Финлянд, Шведийн Гадаад харилцааны сайд нар Туркийн талаас тавьсан шаардлагуудыг биелүүлэх тухай аюулгүй байдлын хамтын гэрээнд гарын үсгээ зурсанаар Финлянд, Швед хоёр НАТО-гийн бүх гишүүн орнуудын дэмжлэгийг хүртэж байгаа юм.
НАТО-гийн тэргүүн Йенс Столтэнбэргийн хэлсэнээр Швед улс Туркийн талаас тавьсан шаардлагуудыг биелүүлэхээр ажиллаж эхэлсэн ба үүнд Туркд гэмт хэрэгт сэжиглэгдэж буй этгээдүүдийг Туркийн талд шилжүүлэн өгөх асуудал багтаж байгаа гэжээ.
Түүнээс гадна Финлянд, Швед хоёр Туркд зэр зэвсэг худалдаалахыг хориглосон шийдвэрээ цуцлах аж.
Шведийн Ерөнхий сайд Магдалена Андерссон Туркийн талтай зөвшилцөлд хүрсэн явдал нь "НАТО-гийн хувьд маш чухал алхам" байлаа хэмээн онцолжээ.
Харин Туркийн Ерөнхийлөгч Режеп Тайип Эрдоганы тамгын газар Турк улс Швед, Финлянд улсаас "хүсэж байсан зүйлсээ авч чадсан" хэмээн мэдэгджээ.
Швед, Финлянд улс НАТО-гийн гишүүн орон болсноор Швед улс 200 гаруй жилийн турш, Финлянд улс Дэлхийн 2-р дайнаас хойш баримталж ирсэн төвийг сахих бодлогоосоо татгалзах юм.
ОХУ Украин руу довтлохоос өмнө финляндчуудын 20-25 хувь нь НАТО-д элсэхийг дэмжиж байсан бол ОХУ Украин руу цэргээ оруулснаас хойш уг үзүүлэлт 79 хувь болтлоо өссөн байна. Харин Шведийн хүн амын 60 хувь нь Умард Атлантын цэргийн эвсэлд нэгдэхийг дэмжжээ.
Эх сурвалж: BBC
Содномцэрэнгийн Энхзаяа
Энэ мэдээ танд таалагдаж байвал LIKE хийгээрэй. Танд баярлалаа.
