МУБИС-ийн Биеийн тамирын сургууль “Дартфиш” программыг Монгол нутагшуулах гэрээг үзэглэлээ

Twitter Print
2019 оны 09-р сар 30-нд 18:22 цагт
Мэдээний зураг,

“Дартфиш” системийг Монголд нутагшуулах албан ёсны гэрээг БТСГ-ын дарга Ц.Шаравжамц, гадаад харилцаа, статистик, мэдээллийн технологийн хэлтсийн дарга Н.Оюунбат, МУБИС-ийн Биеийн Тамирын Сургуулийн захирал, доктор Г.Энхсайхан, "Dartfish" олон улсын байгууллагын Ойрх Дорнод, Азийн бүсийн Бизнесийн хөгжил хариуцсан захирал Мун Сэк Чун нар байгууллаа.

Программыг нутагшуулах сургалтад БТСГ-ийн мэргэжилтнүүд, БТС-ийн багш нар, шигшээ багийн дасгалжуулагчид хамрагдаж байна. Гэрээг үзэглэх ёслолын үеэр ноён Мун Сэк Чун "Dartfish" олон улсын байгууллага нь 20 жилийн түүхтэй. Энэ хугацаанд дэлхийн өнцөг булан бүрт хүрсэн. Ялангуяа Европын орнуудад энэ судалгааны системийг түлхүү хэрэглэдэг. Сургалт долоо хоног үргэлжлэх ч би та бүхэндээ мэддэг чаддаг бүх зүйлээ заах болно” хэмээлээ.

Дартфиш систем гэдэг нь тамирчдын дасгал, хөдөлгөөний техникийн гүйцэтгэлийг олон төрлийн үзүүлэлтээр шинжлэхэд ашиглагддаг программ юм. Үйл ажиллагааны үеэр БТСГ-ын дарга Ц.Шаравжамц "Монголын спортын салбарын хөгжил дэлхий нийтийн жишгээс хоцрогдонгуй байна. Бид цаашдаа хөгжихөд судалгаа шинжилгээ маш чухал учраас энэ программ Монголын спортод үр өгөөжөө өгнө гэдэгт итгэлтэй байна” гэж онцлон тэмдэглэсэн юм.

Дартфиш төслийн гэрээ байгуулагдсанаар энэхүү сургалтын системийг манай улсын их, дээд сургуулийн сургалтын хөтөлбөрт оруулах, үндэсний шигшээ багийн тамирчдын хөдөлгөөнийг нарийн үзүүлэлтүүдээр хэмжих, шинжлэх боломж бүрдэж байна. Мөн МУБИС-ийн Биеийн Тамирын Сургуулийн захирал, доктор Г.Энхсайхан "Биеийн Тамир Спортын Газартай хамтран энэ төслийг хэрэгжүүлж байгаа анхдагч их сургууль болсондоо туйлын баяртай байна. Энэ программыг манай дасгалжуулагчид эзэмшсэнээр судлаач дасгалжуулагчид бэлтгэгдэх юм” гэлээ.

Спортын анагаах ухаан, эрдэм шинжилгээг хөгжүүлэх ажлын хүрээнд Боловсрол, соёл, шинжлэх ухаан, спортын яамны захиалгаар Засгийн газрын хэрэгжүүлэгч агентлаг Биеийн тамир, спортын газар, МУБИС, "Dartfish" олон улсын байгууллагатай хамтран "Спортын сургалт дасгалжуулалтад дартфиш системийг нэвтрүүлэх"-ээр ажиллаж байгаа юм.

А.Алтанчимэг 

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.