ХҮН болон Монголын социал Демократ Нам эвсэж буйгаа зарлалаа

Twitter Print
2020 оны 02-р сар 03-нд 13:57 цагт
Мэдээний зураг,

Хөдөлмөрийн үндэсний нам болон Монголын Социал Демократ Нам эвсэж байгаагаа зарлан, хамтын ажиллагааны санамж бичигт гарын үсэг зурлаа.

Энэ үеэр Хөдөлмөрийн Үндэсний Намын дарга Б.Найдалаа “Манай хоёр нам хамтран хүнээ дээдэлсэн зүүн төвийн улс төрийн бодлоготой намуудын хувьд эвийг эрхэмлэн, хүчээ нэгтгэх, үйл ажиллагаагаа уялдуулан зохицуулах, хамтран ажиллах зорилгоор харилцан тохиролцож, хамтын ажиллагааны санамж бичгийг байгуулж байна. 2020 оны УИХ-ын сонгуульд эвсэл болон оролцох боломжтойг үүгээр мэдэгдэж байна” гэв. 

Харин Монголын Социал Демократ Намын дарга А.Ганбаатар “ХҮН-ын бодлоготой манай намын үзэл баримтлал ижил байсан тул цаашид хамтран ажиллах ёстой гэдэг байр суурин дээр ирсэнд баяртай байна. Энэ оны гуравдугаар сарын 31-нд манай нам 30 жилийн ойтойгоо золгож байгаа тул намынхаа их хурлыг хийнэ. Тус хурлаар 2020 оны сонгууль болон Монголын социал демократуудын дэвшүүлэх бодлого зорилгыг гаргаж тавина” гэлээ. 

Тус хоёр намын мэдэгдэлд,  “Монгол Улсад нийгмийн баялгийн хуваарилалт гажиж, баян ядуугийн ялгаа эрс нэмэгдэн, цөөхөн бүлэг этгээдүүдэд эрх мэдэл, эд хөрөнгийн хэт төвлөрөл үүсч, Монгол орон маань монгол ХҮН эрх тэгш, амар амгалан амьдрах боломжгүй, амьд үлдэхийн төлөөх тэмцлийн талбар болжээ. Улмаар Монгол Улсын тусгаар тогтнол, ардчилал, парламентын засаглал, хүний эрх, эрх чөлөө, эрх зүйт төр, эв нэгдэл зэрэг төр, нийгмийн суурь үнэт зүйлс алдагдаж, харь гүрний гар хөл бологчид, “авлигын сүлжээний эзэд”-ийн хууль ёсны дарангуйлагч болох шуналын золиос болж байна. Иймд тусгаар Монгол Улсад шударга ёсыг тогтоох, тэгш боломжийг бүгдэд олгох, хүмүүнлэг, иргэний, ардчилсан төрийн зарчмуудыг бодитоор хэрэгжүүлэх, хэсэг бүлгийн бус нийтийн сайн сайхны төлөө хүн төвтэй улс төрийн бодлогын зохистой шийдлүүдийг гарган хэрэгжүүлэх нь ардчилсан дэвшилтэт үзэлтэй улс төрийн хүчнүүдийн түүхэн үүрэг болоод байна. Манай хоёр нам хүнээ дээдэлсэн зүүн төвийн улс төрийн бодлоготой намуудын хувьд эвийг эрхэмлэн, хүчээ нэгтгэх, үйл ажиллагаагаа уялдуулан зохицуулах, хамтран ажиллах зорилгоор харилцан тохиролцож хамтын ажиллагааны санамж бичгийг байгуулж байна. Түүнчлэн нам тус бүрийн эрх бүхий байгууллагаас холбогдох улс төрийн шийдвэрээ гаргасан тохиолдолд 2020 оны УИХ-ын сонгуульд эвсэл болон оролцох боломжтойг үүгээр мэдэгдэж байна” гэжээ.

 Г.Ганаа 

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.