Н.Энхбаяр: Хүний эрх, эрх чөлөөний тухай асуудал Монголд мартагдлаа

Twitter Print
2019 оны 06-р сар 28-нд 14:33 цагт
Мэдээний зураг,

МАХН-ын дарга Н.Энхбаяр, Дэд дарга Г.Эрдэнэжамьян, Ерөнхий нарийн бичгийн дарга Б.Тулга нар цаг үеийн асуудлаар сэтгүүлчдэд мэдээлэл хийлээ. 

МАХН-ын дарга Н.Энхбаяр "Бид УИХ-ын дарга Г.Занданшатар, УИХ дахь Үндсэн хуульд өөрчлөлт оруулах ажлын хэсэгт хандаж МАХН-ын саналаа хүргүүлж байна. Хамгийн гол нь бид төслөө ард түмэндээ хүргэхийг зорьж байна. Бид УИХ-ын дарга Г.Занданшатартай ярьсан яриандаа ач холбогдол өгч байгаа. Манай намаас хүргүүлж буй саналыг Үндсэн хуулийн нэмэлт өөрчлөлтөд оруулсан заалтуудтай харьцуулан үзэж аль нь нийгмийн бүхий л талыг тусгасан байна вэ гэдгийг тунгааж үзэхийг хүсье. Үндсэн хуулийн нэмэлт өөрчлөлтийн төслийг УИХ-д суудалгүй улс төрийн намууд, иргэний хөдөлгөөний байгууллагууд мөн ард түмний шууд оролцоотойгоор саналыг нь авах замаар Үндсэн хуульд нэмэлт өөрчлөлт, оруулах боломжтой гэж үзэж байна. Төлөөллийн ардчилал гэж байхгүй.

Тийм учраас нийт ард түмнээрээ хэлэлцүүлэх нь зүйтэй. Хуулийн өөрчлөлтийг нэг нам дангаараа хийж болохгүй. Энэ нь хаана ч байдаггүй жишиг. Нэгдүгээт, Үндсэн хуулийн нэмэлт өөрчлөлтийг хийх гэж байгаа бол хийсэн шиг хийх буюу онолынх нь дагуу судалгаатай хийж хуулийн төсөлд орж буй заалт бүхэн хэдэн хүний эрх ашгийг хөндөж, хэдэн хүнд өөрчлөлт авчрах вэ гэдгийг тодорхой тоо, баримттайгаар илэрхийлж үндэслэлүүдээ гаргахыг хүсч байна. Хоёрдугаарт, Үндсэн хуулийн нэмэлт, өөрчлөлт нь зөвхөн өндөр албан тушаалтнууд эрх мэдлээ хуваарилах, албан тушаалынхаа хугацааг уртасгах эсвэл богиносгох тухай асуудал огт биш. Хүн бүхэнд өр өгөөж өгөх хуулийн өөрчлөлт байх зарчимд нийцүүлэх ёстой. Гуравдугаарт, Үндсэн хуулийн нэмэлт, өөрчлөлтийг ард түмний дунд чөлөөт, шударга хэлэлцүүлэг зохион байгуулж түүнээс гарсан санал, зөвлөмжийг тусгаж шийдвэрлээч гэсэн гурван саналыг бид дэвшүүлж байгаа юм.

Мөн байгалийн баялгийн асуудлыг тодорхой болгох хэрэгтэй. 27 жил бид байгалийн баялгийн талаар ярилаа, шүүмжиллээ. Гэтэл хуулийн өөрчлөлтөөр дахиад л хэвээрээ, байгалийн баялаг төрийн өмч хэвээрээ гэж үлдээх юм бол өмнө нь, хойно нь ямар ч үг бичлээ гээд иргэдэд өгөөжтэй шийдэл болж чадахгүй. Үндсэн хуулийн нэмэлт, өөрчлөлтийн төсөлд боловсрол, эрүүл мэндийн салбарт тулгамдаж буй асуудлуудыг хэрхэх вэ гэдгийг орхигдуулсан. Өнөөдөр олон хүн эмнэлгийн үйлчилгээг авч чадахгүй нас барж эсвэл тахир дутуу болж байна. Энэ бүх нийгмийн асуудлыг хэрхэх вэ гэдэг нь Үндсэн хуулийн өөрчлөлтөд мөн л тодорхой бус. Ард түмэн анхдагч, төр засаг хоёрдогч гэсэн онолын зарчмаа Үндсэн хуулийн нэмэлт, өөрчлөлтөд суулгах шаардлагатай. Өнөөдөр эсрэгээрээ ард түмний гадныханы хойно буюу хамгийн сүүлд орно.

Дараагийн асуудал бол хууль шүүхийн байгууллага маш будилаантай байгууллага болж хувирсан. Шүүхийн алдаа дутагдлыг Үндсэн хуулийн нэмэлт, өөрчлөлтийн төсөлд тусгасан одоогийн заалтаар засаж чадахгүй. Засвал зассан шиг засах ёстой. Энэ талаар манай намаас тодорхой саналууд гаргасан. Хүний эрх, эрх чөлөөний тухай асуудал Монголд мартагдлаа. 21-р зуунд эрүүдэн шүүлтийн асуудал Монголд яригдаж байна. Энэ бол туйлын хоцрогдсон, оюун ухаан, улс төрийн соёлын хувьд ч тэр төрийн тогтолцооны хувьд ч тэр шүүх нь дээд зэргийн хараат байдалд орсноос гадна хэлмэгдүүлэлтийн байгууллага болсон. Ийм газар л эрүүдэн шүүлт бий. Үүнийг Үндсэн хуулийн өөрчлөлтөөр хэрхэн засах талаар манай нам мөн саналдаа тусгасан" гэлээ.

МАХН-ын дэд дарга Ж.Эрдэнэжамъян "Монголын ард түмэн байгалийн баялгаас эрх тэгш хүртэх ёстой гэж үзэж байна. Сүүлийн 20 жил лиценз нэрээр зарж, энэ нь ард түмний амьдрал нөлөөлдөггүй тогтолцоог бүгд шүүмжилж байна. Сүүлийн хэдэн жилийн улс төрийн тэмцлийн туг, далбаанд явж байна. Үндсэн хуулийн өөрчлөлт бол нийгэмд тулгамдсан асуудлыг шийдэх ёстой. Гэтэл ийм нэг ч үг өгүүлбэр алга" гэсэн юм. 

Монгол хүний эрүүл мэнд, үнэлэмжийн талаарх нэг ч үг өгүүлбэр байхгүй байгааг ч МАХН-аас хэлж байгаа юм. Тиймээс Үндсэн хуулийн нэмэлт, өөрчлөлтийн төсөл дээр боловсролын салбарын төлбөрийг төр бүрэн хариуцдаг болох гэсэн заалтыг оруулж өгөх юм байна. 

УИХ, Засгийн газар, хөрөнгө мөнгөтэй хүмүүсийн хүүхдүүд боловсрол эзэмшиж, төрийн албан хаагч, жирийн иргэдийн хүүхдүүд боловсро эзэмшиж чадахгүй байна гэдгийг МАХН-ын гишүүн хэлж байна" гэлээ. 

Э.Гүнтөмөр

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.