“Камп Ноу”-д тэнцсэн залуусын мөрөөдөл аваргын цом

Twitter Print
2014 оны 04-р сар 02-нд 15:24 цагт
Мэдээний зураг,

Европын хөлбөмбөгийн холбооны хамгийн нэр хүндтэй тэмцээн “Аваргуудын лиг”-ийн шөвгийн наймын тоглолт эхэллээ. Урд шөнө Английн “Ман.Юнайтед”, Германы “Бавари Мюнхен”, Испанийн “Барселона”, “Атлетико Мадрид” багуудын тоглолт боллоо. Цомоо хамгаалан тоглож буй “Бавари” энэ үдэш Манчестер хотын Олд Траффорд цэнгэлдэх хүрээлэнд зочлон “Улаан чөтгөр”-үүдтэй 1:1-ээр тэнцсэн аж. 2009, 2011 онуудад “Барселона”-гийн хамтаар аварга цол хүртсэн П.Гвардьола Английн багуудын эсрэг сайн тоглодог. 2009 оны хагас шигшээд “Челси”-г мултласан бол финалд “Ман.Юнайтед”-ыг гомдоож байсан. Харин 2010 оны шөвгийн наймд “Арсенал”-ыг, 2011 оны тэмцээнд “Арсенал”, “Ман.Юнайтед” багуудыг мөн хожиж аварга цол хүртсэн түүхтэй. Үеийн үед Английн багуудын эсрэг сайн тоглодог П.Гвардьолагийн тактик энэ удаа хэрхэн ажиллах бол гэдгийг сонирхож Олд Траффордод 70 гаруй мянган үзэгч хүрэлцэн иржээ. Дунд шөвгийн эхний тулаанд хоёр баг харилцан довтолж нээлттэй тоглосон ч нэгдүгээр үед гоол орсонгүй. Харин хоёрдугаар үеийн 58 дахь минутанд Н.Видич гоолын салхийг хагалж нутгийн эзэд тэргүүлж эхэлсэн юм. Айлын талбайд гоолтой тэнцэнэ гэдэг хожил байгуулсантай адил тул Германы баг сөрөг довтолгоо ихийг хийж байсан. Үүний үр дүнд А.Роббен, Б.Швайнштайгер нарын хослол амжилттай болж 67 дахь минутанд тэнцээний бөмбөг Д.Хеагийн хаалганд хийв. “Аваргуудын лиг”-ийн хүрээнд 1993 оноос хойш ес дэх удаагаа хоорондоо тоглож буй шилдэг багуудын тулаанд ийнхүү эвийн гэрээ байгууллаа. Хариу тоглолт энэ сарын 8-нд Мюнхен хотод болно. Айлын талбайд гоолтой тэнцсэн Баварийн боломж  илүү харагдаж байгаа ч том багийн зангарагийг харуулж “Юнайтед” ч хагас шигшээд шалгарч магадгүй аж. Энэ улирлын дунд шөвөгт Испанийн хоёр баг учраа таарсан. Каталоны “Барселона”, Мадридын “Атлетико” дотоодын лигтээ нэг удаа тоглоход 0:0-ээр тэнцжээ. Ер нь 2013-2014 оны улиралд Диего Симеонегийн баг гайхамшигтай байна. Ла лигт 76 оноотой тэргүүлж байгаа бол “Аваргуудын лиг”-ийн шөвгийн наймд шалгарсан. Харин урд шөнө Каталоны талбайд 1:1-ээр тэнцсэн аж. “Барселона” шиг дээд зэрэглэлийн багийн талбайгаас оноо авна гэдэг тус багийг ямар түвшинд байгааг харуулж байна. Алдарт “Камп Ноу” цэнгэлдэх хүрээлэнд Испанийн хоёр Гранд тоглолтоо хийхэд дэлхийн сая сая хөлбөмбөгийн хорхойтнууд цэнхэр дэлгэцээрээ үзсэн. Боломжийн хувьд талбайн эзэд бүх талаараа жин дарж байсан ч бодит байдал Ж.Мартиньогийн санаснаар болсонгүй. 56 дахь минутанд Ла лигийн мэргэн бууч Д.Коста гоол оруулж “Барселона”-г хүнд байдалд орууллаа. Хэрэв талбай дээрээ ялагдал хүлээвэл хүний нутагт бүх зүйл тэдний эсрэг байдаг. Үлдсэн хугацаанд ямар нэг аргаар гоол оруулах л тэдэнд хамгийн чухал байлаа. Харин гоол оруулж давуу байдлыг олж авсан “Атлетико” хамгаалалтанд шилжсэн нь буруудаж 71 дэх минутанд Неймарын цохилтыг Коуртис хааж чадсангүй тооны харьцаа 1:1 болжээ. Ингээд сүүлийн 20 гаруй минутанд хоёр баг гоол хийж чадалгүй эвийн гэрээ байгууллаа. “Барселона”-гийн хувьд гэртээ тэнцэж гурван оноо авч чадаагүй нь эсрэг багт боломж олгосон гэхэд болно. 1993 оноос хойш шөвгийн наймаас цааш явж үзээгүй “Атлетико” талбай дээрээ 0:0-ээр тэнцэх эсвэл нэг гоолын зөрүүгээр хожвол хагас шигшээд шалгарна. XXI зууны түүхийг аваргын цомтой эхлүүлэх хүслээ биелүүлэхийн төлөө Диего Симеонегийн залуус одоо л юу чаддагаа харуулах үлдэж байна. М. Золбаатар

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.