Магадлан итгэмжлэлийг нь хүчингүй болгосон сургуулиуд элсэлт авахгүй

Twitter Print
2019 оны 05-р сар 27-нд 17:15 цагт
Мэдээний зураг,

БСШУС-ын сайд Ё.Баатарбилэг сургалт эрхлэх тусгай зөвшөөрөл хангаагүй сургуулийн тоог цөөлөх бодлого барихаа мэдэгдсэн билээ. Үүний хүрээнд төрийн бус их, дээд сургуулиудад хяналт хийснээс зургаан сургуулийн магадлан итгэмжлэлийг хүчингүй болгож, зарим сургуульд үүрэг даалгавар өгсөн гэдгийг мэдээлж байгаа юм.

Энэ тухай БСШУС-ын сайд Ё.Баатарбилэгээс тодруулахад тэрбээр “Чанаргүй сургалт явуулдаг, өөрийн хичээлийн байр, багшгүй зэрэг дээд боловсролын үйл ажиллагаа явуулах боломжгүй сургуулиудад арга хэмжээ авч байгаа. Нэр бүхий хэд хэдэн төрийн бус их, дээд сургуулиудын магадлан итгэмжлэлийг хүчингүй болгосон. Мөн нэлээд хэдэн сургуулийн хичээлийн хөтөлбөрийг хаасан. Одоогоор магадлан итгэмжлэлийг хүчингүй болгосон сургуулиудыг нэр зааж, цохон мэдээллийг олон нийтэд хүргэх нь зохисгүй. Сургалтын зөвшөөрлийг нь хүчингүй болгосон төрийн бус их, дээд сургуулиуд элсэлт авахгүй" гэлээ.

2019 онд 18 мянган орчим хүүхэд 12 дугаар анги төгсөж байна. Жилд дунджаар 35-40 мянган хүүхэд ахлах сургуулиа төгсдөг бол энэ жил 18 мянган болж буурсан гэсэн үг. Ингэснээр их дээд сургуулиудад томоохон сорилт болно гэдгийг БСШУС-ын сайд Ё.Баатарбилэг тодотголоо.

Тэрбээр "Цөөхөн төгсөгчдийн дунд маш өрсөлдөөнтэй сонгон шалгаруулалтууд явагдана. Цаашид их дээд сургуулиуд цомхон, чиглэл чиглэлээрээ сургалтын үйл ажиллагаа явуулдаг болох ёстой гэж үзэж байгаа. Өнөөдөр хамгийн их эрэлттэй мэргэжлүүдээр бараг бүх их, дээд сургуулиуд элсэлт авдаг болсон. ХААИС гэхэд эдийн засгийн чиглэлийн сургуультай болчихсон. Ялангуяа төрийн өмчийн их сургуулиуд төрөлжих нь чухал. Их, дээд сургуулиудын бүтэц тогтолцоонд анхаарах шаардлага зайлшгүй байна. Мөн сургалтын агуулга хөтөлбөрийг нь аттестатчилж төрөөс  онцгой анхаарахгүй бол тухайн сургууль бүр өөр өөрийнхөөрөө хөтөлбөр гаргаж  чанаргүй боловсон хүчнүүдийг  бэлтгэж байна" гэсэн юм.

Г.Ганаа

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.