Инээдмийн баярт зориулав

Twitter Print
2020 оны 04-р сар 01-нд 08:31 цагт
Мэдээний зураг,

Өнөөдөр дөрөвдүгээр сарын нэгэн буюу инээдмийн баярын өдөр. Энэ өдөр хүмүүс бие биеэ хуурч, тоглоом шоглоом хийдэг. Зарим оронд инээдмийн баярын өдрийг тэнэгүүдийн өдөр ч гэж нэрлэдэг. Манай улс энэ баярын өдрийг тэмдэглэдэг болоод төдийлөн удаагүй байгаа билээ. Харин сүүлийн үед өргөн тэмдэглэдэг баяруудын нэг болоод байгаа юм. Жил бүрийн энэ өдөр хүмүүс инээж, баяр хөөрөөр дүүрэн байдаг. Харин хэзээнээс энэ өдрийг тэмдэглэж ирсэн тухай янз бүрээр ярьдаг байна.

Дөрөвдүгээр сарын 1-ний өдрийг улс орон бүрт Францчуудын хувьд инээдмийн баярыг шинэ онтой холбон тэмдэглэх болжээ. Учир нь францчууд дөрөвдүгээр сарын нэгэнд шинэ оноо угтдаг байсан аж. Харин хаан уг баярын өдрийг нэгдүгээр сарын нэгэнд тэмдэглэх шийдвэр гаргаснаар тэнэгүүдийн гэх тодотголтой болжээ. Гэтэл иргэд уг шийдвэрийг хүлээн авахаас татгалзаж, уламжлал ёсоор бие биедээ загас бэлэглэсээр байсан аж. Тиймээс хүмүүсийг шоглон, тэнэгүүдийн өдөр хэмээн нэрлэжээ. Францчууд энэ өдрийг "дөрөвдүгээр сарын загас" ч гэж нэрлэдэг байна.

Харин Европын ихэнх оронд тэнэгүүдийн өдөр гэдэг. Энэ нь бие биенээ хуурч мэхлэх ба мэхлэгдсэн нэг нь тэнэгийн тоонд ордог байна.

Америк болон Их Британид XVIII зуунаас хуурдаг өдөр хэмээн тэмдэглэж иржээ. Эртний Ромд энэ өдөр инээдмийн бурханыг залж байсан түүхтэй.  Инээдмийн баяр хүн бүхэнд баяр хөөр, инээд бэлэглэдэг. Зарим тохиолдолд уурлах үе ч гардаг. Хэн нэгний худлаа хэлсэн үгнээс болж ажлаасаа хоцорсон, хайртай хүнтэйгээ хэрэлдсэн тохиолдол олон байдаг. Мөн олон нийтийн мэдээллийн хэрэгслээр үзэгчдийг хуурч, бухимдуулсан олон сонирхолтой зүйл гарч байжээ.

Дөрөвдүгээр сарын 1-ний шилдэг хууран мэхлэлтүүд 1957 онд "BBC" теле компани "Гоймонгийн арвин ургац хураасан тухай нийтэлжээ. Швейцарьт гоймон их хэмжээгээр хурааж авсан тул яахаа мэдэхгүй байгаа тухай бичээд "Энэ өвөл дулаахан байснаар фермийн аж ахуй эрхэлдэг хүмүүс гоймонгийн үрийг цэцэглүүлж чадлаа" хэмээн мэдээлсэн байна. Уншигчид үүнд үнэмшиж гоймон хэрхэн тарих тухай мэдэх гэж BBC руу тасралтгүй утасдаж байжээ. Харин уншигчдын хариуд BBC "Та гоймонгоо улаан лоолийн сүмсэнд хийгээд сайн залбир" хэмээн зөвлөж байсан гэнэ. Мөн 1994 онд Америкийн "National Public Radio" чихэн дээрээ "Pepsi" гэсэн шивээс хийлгэсэн хүн амьдралынхаа турш тус компанийн бүтээгдэхүүнийг 10 хувийн хөнгөлөлттэй худалдан авах болно хэмээн мэдээлжээ. Тэр өдрийн турш чихэндээ шивээс хийлгэсэн залуус шагналаа авъя хэмээн утасдсан байна.

1999 онд "Phoenix New Times" сонин ядуучуудад зориулсан шинэ сан байгуулсан тухай бичээд орон гэргүй хүмүүст зориулан байр барих хандивын мөнгө, хувцас, хоол хүнс цуглуулж байгаа гэжээ. Төгсөлд нь тэднийг зэвсгээр хангахад нь туслахыг хүссэн байна. "Associated Press" агентлаг энэ мэдээг нийтэлж Америк даяар цацжээ. Түүнийг уншсан хүмүүс дансаар мөнгө шилжүүлсэн гэнэ. "Irish Times" хэмээх сонин Лениний шарилыг худалдан авах тухай Орос, Францын хариуцлагатай ажилтнууд хэлэлцээ хийж байгааг уншигчдынхаа сонорт хүргэжээ. Лениний цогцсыг Парис хотын Диснейлэндэд тавих гэж байгаа тухай уншсан хүмүүс гомдол мэдүүлсэн байна. Францын "Le Paridien" сонин 1986 онд Засгийн газар Эйфелийн цамхгийг буулгаж Дислейндэд аваачиж дахин барина хэмээн уншигчдаа хуурчээ.

Цамхаг байсан газар нь 1992 оныг Олимпийн тоглолтыг зохион байгуулах цэнгэлдэх хүрээлэнг барина гэдгийг уншсан хүмүүс Засгийн газартаа гомдол гаргасан байна. Энэ мэт хуурах тохиолдол олон гарч байсан хэдий ч хүмүүс өнөөг хүртэл инээдмийн баяр буюу тэнэгүүдийн баярыг тэмдэглэсээр байгаа билээ. Инээвэл залуужина гэдэг. Тиймээс жилдээ ганцхан удаа болдог баяраараа ханатлаа инээгээд аваарай.    

Г.Ганаа

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.