Д.Эрдэнэсувд: Албан тушаалын байдлаа урвуулан ашигласан хэрэгт Ерөнхийлөгч асан Ц.Элбэгдоржоос гэрчийн мэдүүлэг авсан...

Twitter Print
2019 оны 03-р сар 21-нд 17:13 цагт
Мэдээний зураг,

Нийслэлийн прокурорын газрын хяналтын прокурор Д.Эрдэнэсувд олны анхаарлыг татсан хэргүүдийн талаар өнөөдөр /2019.03.21/ мэдээлэл өглөө.

Мэдээллийн эхэнд “Өмнөх УИХ-ын үед Тавантолгойн нүүрсний ордын хөрөнгө оруулалтыг УИХ-аар батлуулах гэж байсан ажиллагаанд Ерөнхийлөгчийн зүгээс тодорхой баримтуудыг гаргаж, шалгуулахаар хүсэлт тавьсны дагуу НПГ-аас хяналт тавин ажиллаж байна.

Уг хэрэгт 2002 оны хуучин хуульд зааснаар эрүүгийн хуулийн 263 дугаар зүйл анги буюу албан тушаалын байдлаа урвуулан ашигласан гэсэн зүйл ангиар хэрэг бүртгэлтийн хэрэг нээн шалгаж байна. Энэ асуудлыг дээрх хэрэгтэй хамтатган шалгах асуудлыг АТГ-т шилжүүлээд байгаа. Уг хэрэгт өнгөрсөн хоёрдугаар сарын 22-ны өдөр Ерөнхийлөгч асан Ц.Элбэгдоржийг гэрчээр дуудаж, мэдүүлэг авсан. Одоогоор мөрдөн шалгах ажиллагаа үргэлжилж байна” гэв.

Дараа нь сэтгүүлчдийн асуултад хариулт өглөө.

-Худалдаа хөгжлийн банкны удирдлагуудыг яллагдагчаар татсан асуудалд тайлбар өгөөч?

-“Эрдэнэт” үйлдвэрийн 49 хувийг ОХУ-ын Ростех компаниас 400 сая ам доллараар худалдан авсан асуудалд эх үүсвэр нь тодорхойгүй гэдэг үндэслэлээр ЭЦА, АТГ-ын хамтарсан ажлын хэсгийн мөрдөн шалгах ажиллагаа явуулж байна. Уг хэрэгт мөрдөгчдийн зүгээс тус банкны ТУЗ-ийн дарга Д.Эрдэнэбилэг, гүйцэтгэх захирал О.Орхон, Монголын зэс компанийн захирал Ц.Пүрэвтүвшин, Г.Хүрэлбаатар нарыг Эрүүгийн хуулийн тусгай ангид заасан залилан, мөнгө угаах гэмт хэргүүдэд яллагдагчаар татах саналыг ирүүлсэн. О.Орхон, Д.Эрдэнэбилэг нарын хувьд банкны чадварыг алдагдуулсан зүйл ангиар тус тус яллагдагчаар татах саналыг ирүүлсэн. Прокуророос хэргийг хянаад нэмэлт ажиллагаа хийлгэхээр буцаасан. Учир нь “Эрдэнэт”-ийн 49 хувийг худалдан авахаар санхүүжүүлсэн 400 сая ам долларын эх үүсвэрийг хэрвээ төрийн мөнгөнөөс авсан бол тухайн үед ажиллаж байсан албан тушаалтнуудыг татан буулгах асуудал яригдана. Хэрэгт авагдсан нотлох баримтуудаар дээрх дөрвөн нэр бүхий хүнийг Худалдаа хөгжлийн банкнаас их хэмжээний зээл авсан, өгсөн хэрэгт шалгаж байгаа учраас одоогоор яллагдагчаар татах үндэслэлгүй байна гэж үзээд буцаасан.

-С.Зориг агсны хэрэгт нэр бүхий гурван хүнийг саатуулан шалгаж байгаа гэдэг мэдээлэл байна?

-С.Зориг агсны хэрэгтэй холбоотой өмнөх шүүхийн тогтоол өнөөдөр хүчин төгөлдөр явж байна. Хэвлэлээр гараад байгаа хоёр албан тушаалтныг тухайн үед шалгалт хийж байсан хоёр тагнуулын ажилтныг саатуулсан асуудал байгаа. Энэ хэрэг нууцын зэрэглэлтэй учир нарийвчлан мэдээлэл өгөх боломжгүй байна.

-Сүүлийн үед шүүгч нартай холбоотой мэдээлэл гараад байгаа шүү дээ. Хөрөнгийн эх үүсвэрээ баталж чадаагүй шүүгч нарыг шалгаж байгаа гэсэн мэдээлэл бий. Хэчнээн шүүгчийг шалгасан юм бол?

-Үндэслэлгүйгээр хөрөнгөжсөн хэрэгт нэр бүхий долоон шүүгчийг шалгаж байгаа. Албан ёсоор яллагдагчаар татаад хэрэг үүсгэсэн зүйл байхгүй. Харин хэвлэл мэдээллийн хэрэгслээр гараад байгаа хоёр нэр бүхий шүүгчийн бүрэн эрхийг түдгэлзүүлсэн асуудал байгаа. Уг асуудал хөрөнгөжсөн асуудалтай холбоогүй. Өөр зүйл ангиар шалгасан байдаг.

-Худалдаа хөгжлийн банкны удирдлагыг яллагдагчаар татахаас татгалзаж байгаа юм байна. Ямар үндэслэлээр?

-Хэрэгт авагдсан нотлох баримтуудтай нийцэхгүй байна гэсэн үндэслэлээр буцаасан. Хуулийн байгууллагууд хуульд заасан журмаараа шалгагдана.

-ЖДҮ-тэй холбоотой гишүүдийг нэмж яллагдагчаар татсан асуудал байгаа юу?

-Нэр бүхий таван гишүүнийг татсан. Мөрдөн байцаах албанаас нэмж хүний нэр өгөөгүй байна.

Г.Ганаа

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.